مجاهد: امریکا افغانستان کې د خپلو اهدافو لپاره نورې پلمې لټوي

د افغانستان اسلامي امارت وايي، آمریکا د ښځو د زده کړو د ځنډ په پلمه د اسلامي امارت د مشرانو پر سفرونو د بنديز اعلان د افغانستان له ملت سره د خواخوږۍ له مخې، نه بلکې د نورو اهدافو لپاره ورته پلمې لټوي. دا په داسې حال کې ده، چې د امريکا د بهرنیو چارو وزارت دوه ورځې مخکې د نجونو د نړيوالې ورځې په مناسبت اعلان وکړ، چې د افغانستان د سرپرست حکومت هغه مشران او مسوولین چې د نجونو د ښوونځيو په تړلو کې لاس لري، پرې د ويزو او سفرونو محدوديتونه لګوي. د اسلامي امارات ویاند ذبیح الله مجاهد پر خپله ټویټرپاڼه لیکلي، افغانستان یو خپلواک او مستقل هېواد دی او د افغانستان اسلامي امارت مستقل، د خپلې ارادې خاوند او خپلو دیني او کلتوري ارزښتونو ته ژمن نظام دی. مجاهد ويلي، لکه څنګه چې د افغانستان اسلامي امارت د بل هېڅ کوم هېواد په داخلي موضوعاتو کې مداخله نه کوي، له نورو ټولو هيوادونو څخه ورته تعامل خپل حق بولي او ورنه غوښتنه يې کوي.