مسوولین: ایران ته د افغان صادارتو کچه ۱۷ میلیون ډالرو ته رسېدلې

سوداګرۍ خونه وایي چې د روان لمریز کال له پیله تر اوسه پورې ایران ته د افغان توکو د صادراتو کچه ۱۷ میلیون ډالرو ته رسېدلې چې د تېر کال په پرتله پنځوس سلنه ډېروالی ښیي. د سوداګرۍ خونې سرپرست محمد یونس مومند ویلي چې له تېرو درې لسیزو ډېر وخت کېږي چې ایران ته د افغانستان صادارت کېږي خو بیا هم ایران د افغان توکو لپاره ښه بازار نه لري. د نوموړي په خبره هلته پرې لوړې تعرفې لګول کېږي او دوی غواړي چې ایران هم د نورو هېوادونو په څېر پر افغان توکو خپلې تعرفې کمې کړي څو په یاد هېواد کې د افغان توکو بازار ګرم شي. په همدې حال کې د هرات سوداګرۍ او پانګونې خونې مسوولین وایي چې ایران ته د وچې مېوې، کرنیزو توکو او د ډبرو سکرو صادرات د تېر کال په پرتله پنځوس سلنه ډېر شوي دي.