ولسمشر محمد اشرف غني د حکومت له زندانانو د دوه زره طالب بنديانو د خوشي کېدو فرمان ورکړ. له دې وړاندې افغان حکومت زر طالب بنديان خوشي کړي وو. ولسمشرۍ ماڼۍ کې سرچینو تایید کړې ده چې ولسمشر غني د دوه زره نورو طالب زندانیانو د خوشي کولو فرمان نن صادر کړی دی، سرچینې وایي ددغه بندیانو د آزادۍ پروسه به دوه یا درې ورځې وروسته په رسمي توګه پیل شي.
ولسمشر محمد اشرف غني نن ورځ د اختر له لمونځ وروسته ولس ته د مبارکۍ پيغام په ترڅ کې وويل د طالب بنديانو د خوشي کېدو بهير به بیا پيل شي. ولسمشر غني د طالب بنديانو خوشي کېدل د ښه نيت او سولې خبرو ته د لار پرانېستل بلل دي.
طالبانو تېره شپه وويل چې درې ورځې به پر افغان ځواکونو بريدونه کوي او اوربند يې اعلان کړ. افغان حکومت د طالبانو ياد ګام وستايلو او اوربند اعلان کړ.
