ولسي جرګې د ۱۴۰۰مالي کال بودیجه تایید کړه

د ولسي جرګې غړو تر اوږدو ناندریو وروسته نن د رایو په اکثریت د ۱۴۰۰مالي کال بودیجه تایید کړه. د مالیې وزارت په تېرو دوو میاشتو کې په پرله پسې توګه د راتلونکي کال د مالي بودیجې درې طرحې ولسي جرګې ته ولېږلې چې دوې یې ددغه جرګې له لوري د ښوونکو، سرتېرو او ملکي مامورینو په معاشونو کې د تعدیل نه راوستلو له امله رد شوې، خو د ولسي جرګې غړو وویل چې د بودیجې په درېیمه مسوده کې ددوی غوښتنې پوره شوې دي. د ولسي جرګې رییس ددغه بودیجې تر تایید وروسته وویل، چې د خلکو له زغم مننه کوي او په خبره یې د ولسي جرګې غړي په هېواد کې د ټولو ملي مسایلو د حل په برخه کې د حکومت تر څنګ ولاړه دي او هڅه کوي د جګړې په پای ته رسولو کې هم اغېزناک ګامونه اوچت کړي.