یوه چینايي شرکت په ښه قیمت او لوړ کیفیت د کانونو استخراج ته چمتووالی ښوودلی دی. د چارو ادارې د عمومي ریاست له لوري په خپره شوې اعلامیه کې راغلي چې د کانونو د استخراج په برخه کې د یوه خصوصي چینایي شرکت مسوولینو د چارو ادارې له رییس سره کتلي دي.
په دې لیدنه کې د کانونو پر استخراج او وضعیت خبرې شوې دي. د وان یس تایناز چینایي شرکت مسوولینو ویلي چې دوی په افغانستان کې د کانونو استخراج ته تیار دي او په خبره یې مسلکي کارکوونکي او پیاوړي ټیمونه لري چې کولی شي د افغانستان کانونه په مناسبه بیه او لوړ کیفیت استخراج کړي.
د چارو ادارې مسوولینو دغه شرکت ته ویلي چې دوی د بهرنیو پانګه والو پانګونې ته ښه راغلاست وایي خو دغه شرکت کولی شي خپلې طرحې په لیکنۍ بڼه له افغان لوري سره شریکې کړي او دوی به یې له وزارتونو او نورو اداراتو سره شریکې کړي چې تر هغه وروسته به یې په اړه پرېکړه کېږي.
