کابل ښار کې د ۸۰ میلیونه افغانیو په لګښت ۴ سړکونه جوړ شول

د کابل ښاروالۍ له لورې نن په پلازمېنه کابل ښار کې د څه باندې ۸۰ میلیونه افغانیو په لګښت د سړک جوړونې ۴ پروژې بشپړې او ګټې اخیستنې ته وسپارل شوې. په یادو پروژو کې د دارالامان – ده دانا سړک جوړول د چهلستون او پډولې سړکونو د پاتې برخو جوړول او د سیاسنګ سړک پراخول شامل دي، چې لګښت یې د کابل ښاروالۍ له داخلي بودجې څخه ورکړل شوی دی. کابل ښاروال د یادو پروژو د پرانیستې پر مهال وویل چې کابل ښاروالۍ د ښار ودانولو او سموسورتیا ته پوره ژمنتیا لري او له کابل ښاریانو څخه يې هم په دغه برخه کې د همکارۍ غوښتنه وکړه. په ورته وخت کې د کابل ښاروالۍ استازي نعمت الله بارکزي وویل چې د جوړو شویو سړکونو مجموعي اوږدوالی شاوخوا ۲ کیلو مترو ته رسېږي، چې په مختلفو عرضونو جوړ شوي دي. د نوموړي په خبره کابل ښاروالۍ په روان کال کې ۱۳۵ کانکرېټي سړکونه جوړ او ګټې اخیستنې ته سپارلي او د ۶۵ نورو د ډیزاین کولو چارې روانې دي.