کرکټ؛ افغانستان له هند سره د ۳ شل اوریزو لوبو لړۍ ترسره کوي

ټاکل شوې چې افغانستان د سپټمبر له ۱۳مې تر ۱۷مې پورې د هند پر وړاندې د درې شل‌اوریزو نړیوالو سیالیو کوربه وي. دغه درې واړه لوبې به د هند په ډهلي کې د ارون جېټلي کرېکټ لوبغالي کې ترسره شي.  افغانستان په وروستیو کلونو کې د کورنیو نړیوالو سیالیو لپاره له متحده عربي اماراتو او نورو هېوادونو څخه د کوربه لوبغالي په توګه کار اخیستی دی. د امنیتي اندېښنو له امله لا هم په افغانستان کې نړیوالې کرېکټ سیالۍ نه ترسره کېږي. د افغانستان د کرېکټ بورډ مشر میرویس اشرف هند د دغو سیالیو لپاره مناسب ځای بللی، او د هند د کرېکټ بورډ مشر هم د افغان کرېکټ د ملاتړ پر دوام ټینګار کړی دی.  افغانستان او هند وروستی ځل د جون په میاشت کې په ټېسټ او یو ورځنیو سیالیو کې مخامخ شوي وو، چې هند په ټېسټ کې د ۳۰۰ منډو او په یو ورځنۍ لوبلړۍ کې د ۳-۰ بریا ترلاسه کړه.