کورومایا: د افغانستان له کرنې برخې سره همکاریو ته دوام ورکوو

د کرنې، اوبو لګولو او مالدارۍ سرپرست وزیر عطاءالله عمري د افغانستان لپاره د جاپان له سفیر تاکایوشي کورومایا سره کتلي دي. ياد وزارت د يوې خبرپاڼې په خپرولو سره ويلي چې په دې کتنه کې دواړو لورو د جاپان حکومت له لوري له افغانستان سره د کرنې او مالدارۍ په برخه کې د همکاریو او د ډاکټر تتسو ناکامورا د پروژو د تطبیق په اړه خبرې وکړې. تاکایوشي کورومایا په دغه کتنه کې ويلي چې جاپان به په افغانستان کې د بدیل معیشت، غلو، سبزیجاتو، د نشه یي توکو پر وړاندې مبارزې، د ناکامورا پروژو تطبیق او د اوبو لګولو پروژو په برخو کې خپلو فعالیتونو ته دوام ورکړي او ټینګار یې وکړ، چې د افغانستان ښه نوم باید نورو هېوادونو ته ورسول شي. په ورته وخت کې د کرنې، اوبو لګولو او مالدارۍ سرپرست وزیر په دغه کتنه کې ويلي چې د څو لسیزو اوږدې جګړې د افغانستان د کرنيز سکتور د شاته پاتې کېدو لامل شوې دي او له دې وضعیت څخه د راوتلو په موخه مرستې ته اړتیا لري.