یونیسف ۹۴ سلنه افغان ښوونکو ته معاشونه ورکوي

د ا.ا د پوهنې وزارت مسوولینو د ملګرو ملتونو له ماشومانو د ملاتړ صندق یا یونیسف له مسلکي ډلې سره له کتنې وروسته اعلان کړی، چې دغه سازمان تر راتلونکې اوونۍ پورې په ټول هېواد کې ۹۴ سلنه ښوونکو ته معاشونه ورکوي. د پوهنې وزارت په یوه اعلامیه کې ویلي، چې یونیسف د بانکي حسابونو له لارې په ټول هېواد کې ۹۴ سلنه ښوونکو ته معاشونه ورکوي. هغه معاش چې ټاکل شوې ښوونکو ته ورکړل شي، د مخکیني اعلان له مخې هر ښوونکي ته ۲۰۰ ډالر دي. دغه وزارت هغو ښوونکو ته چې بانکي حساب نه لري، ویلي چې د راتلونکې اوونۍ له پيل څخه به د ولایتونو د پوهنې ریاستونو مالي څانګو سره په همغږۍ د یوې کړنلارې له طرحې وروسته معاشونه ورکړل شي. دغه معاشونه هغو ښوونکو ته ورکول کېږي، چې په دې وروستیو کې د ا.ا د پوهنې وزارت له مالي او اداري ریاست څخه یې لېسټ برابر شوی نه خیالي ښوونکي. دغه وزارت ویلي، چې په راتلونکي کې به له یونیسف سره په همکارۍ د ښوونکو د معاشونو ورکولو لپاره یوه کړنلاره رامنځته کړي.