یو شمېر ولایتونو کې سېلابونو خلکو ته مالي او ځاني زیانونه اړولي

طبیعي پېښو ته د رسېدو په چارو کې د دولت وزارت وايي چې، په تېره یوه ورځ کې د هېواد په پنځو ولایتونو کې د سېلابونو له امله ۵ تنه مړه شوي دي. د دې وزارت ویاند جانان سایق وايي چې، په پکتیا، غزني، لغمان، بغلان او ننګرهار ولایتونو کې د ورښتونو او سېلابونو له امله ۱۵ استوګنیز کورونه هم نړېدلي دي. بل لور ته د ننګرهار د کرنې، اوبو لګولو او مالدارۍ ریاست وایي چې په تېرو دوو ورځو کې د دغو سېلابونو له امله ۱۶ زره او ۵۲۵ جریبه کرنیزه ځمکه، ۵۰۷ مېوه لرونکي او ۲۰۸۵ غیر میوه لرونکي ونې له منځه تللي دي. له دې سره سره د هېواد په بېلابېلو ولایتونو کې ځينې زیانمن شوي وایي چې وروستیو ورښتونو او سېلابونو ګڼ مالي زیانونه ور اړولي دي.