ستاسې هیلې څه دي؟ ایا د ژوند په اوږدو کې به خپلو دې هیلو ته ورسېږی؟ ښه پوهېږم چې ستاسې زړه همدغه څه غواړي. باوري یم چې تاسې هیله لری چې همداسې دې وشي، خو ایا رښتیا تاسې کولای شی خپلو دې هیلو ته ورسېږی؟ څه فکر کوی، څومره ممکنه ده چې تاسې د بریالي شی؟ په پنځو کې یو، په سلو کې یو، په میلیون کې یو؟ څه پوهېږی چې ستاسې د بریالي کېدو چانس زیات دی او یا که ستاسې هیلې تلپاتې او رښتینې دي؟ ایا دې ته اماده یاستی چې خپل بخت و ازمویی؟
ډېری کسان چې زه یې پېژنم، هر یو یې هیلې لري. که دا ونه وایم چې له زرهاوو کسانو مې د هغوی د هیلو په اړه پوښتلي، خو له سل هاوو خو مې حتماً پوښتلي دي. ځینې په ډېره مینه د هغوی په اړه خبرې کوي. ځینې بیا د خپلو موخو په اړه له خبرو کولو کرکه لري، هغوی داسې مالومېږي چې په لوړ اواز یا پوره جرئت د خپلو موخو په اړه له خبرو کولو شرمېږي. دوی هېڅکله د خپلو موخو د لاس ته راوړلو په اړه خپل بخت نه دی ازمویلی. دوی نه پوهېږي چې نور خلک به ور پورې وخاندي او که نه. دوی پر دې باوري نه دي چې هیلې یې تر حد زیاتې لویې دي او که تر حد زیاتې کوچنۍ. دوی رښتیا هم پر دې نه پوهېږي چې ایا کولای شي خپلو هیلو ته ورسېږي او یا هم هغوی ته په رسېدو کې له ماتې سره مخ شي. هغوی په دې اړه چې څنګه کولای شي خپلو هیلو ته ورسېږي، هېڅ فکر او نظر نه لري. پر هغه څه چې دوی پوهېږي، هغه د خپلې خوښې او علاقې وړ موخې او هیلې په اړه یو مبهم او ارماني برداشت دی، چې هېڅکله یې په اصلي او حقیقي بڼه نه پوهېږي. دوی پر دې نه پوهېږي چې څنګه کولای شي خپلو دو هیلو ته ورسېږي. که ستاسې په اړه هم دا خبرې صدق کوي، باید خوشاله و اوسئ چې هر وخت ستاسې لپاره لا د هیلې لرلو فرصت شته او باوري یم چې د دې کتاب لوستل به درسره مرسته وکړي.
کله مو چې په ښوونځي کې درس لوست، ایا په یاد مو دي چې ښوونکي د ازموینې له اخیستو مخکې تاسې ته ویلي وو: «دغه مطلب چې تاسې ته یې وایم، په دې کې د ازموینې پوښتنه راځي؟» ډېر داسې ښوونکي مې لیدلي چې د زده کوونکو د تشویق او هڅونې لپاره دا او دېته ورته خبرې کوي. هغوی هر وخت زموږ د چمتووالي په نیولو سره غواړي چې موږ په ازموینه کې بریالي شو. رښتیا، له ازموینې اخیستو د هغوی هدف دا و چې موږ د بریالي کېدو لپاره اماده کړي.
د کتاب لیکوال وايي، زما هیله دا ده چې زه هم ستاسې لپاره له هغو هڅوونکو ښوونکو یو شم. غواړم تاسې دې ته اماده کړم چې د خپلو موخو په پېژندلو سره وشی کولای هغوی ته ورسېږی. څنګه؟ باوري یم که په دې کتاب کې پر راغلو پوښتنو سم پوه شی او هغه له ځانه وپوښتی او وشی کولای چې په سم ډول هغوی ته ځوابونه پيدا کړی، تاسې به خپلو موخو ته د رسېدو لپاره تر ټولو ښه چانس ولری. هرڅومره چې په دې اړه ستاسې خبرې مثبت وي، هماغومره به ستاسې د بریا چانس هم زیات وي. ما په همدې خاطر دا کتاب لیکلی دی.
مینه وال کولای شي یاد کتاب پر اکسوس سربېره، د ښار له نورو لویو کتابپلورنځیو هم په مناسب قېمت تر لاسه کړي.