ارګ د یوې خبرپاڼې په خپرولو سره د کندهار په پنجوایي ولسوالۍ کې د ماین چاودنې له امله د یوې ماشومې او ښځو په ګډون د یو شمېر هېوادوالو پر وژل کېدو ژوره خواشیني څرګنده کړې ده او پر طالبانو یې غږ کړی دی چې د سولې او مخامخ مذاکراتو پیلېدو په درشل کې باید له تاوتریخوالي، ځانګړې توګه لویو لارو کې د ماینونو له خښولو چې ډېری وخت د ملکي وګړو د مرګ ژوبلې لامل کېږي لاس واخلي. خبرپاڼه کې دغه راز پر یاده ډله غږ شوی چې تلپاتې او باعزته سولې ته د رسېدو لپاره دې د ولس، حکومت او سولې مشورتي لویې جرګې غږ ته لبیک ووایي.