پر کابل پوهنتون له برید وروسته په تعلیمي او تحصلي ادارو کې وېره خوره ده. له برید وروسته کابل پوهنتون ته ځینې محصلین نه ورځي او د ډېرو کورنیو په زړونو کې لا هم وېره ده او خپلو اولادونو ته په سختۍ پوهنتون ته د تګ اجازه ورکوي. له دې سره ځینو تعلیمي ادارو ته له معلومو او ځینو ته له نامعلومو آدرسونو ویل شوي چې له ګواښ سره مخ دي. نو ځکه نه یوازې تدابیر زیات شوي، بلکې زده کوونکي، محصلین، ښوونکي او استادان د وېرې احساس کوي.
اوس پوښتنه دا ده چې دا ګواښ رښتیا هم جدي دی او ایا پر پوهنتونونو او ښوونځیو د بریدونو شونتیا شته او څنګه دا وېره ختمولی شو؟
پر کابل پوهنتون له وحشیانه برید تر یوې اونۍ ډېر وخت تېریږي، خو لا هم څوک نه پوهېږي چې دا برید چا، څنګه او ولې وکړ؟ د دغه برید په تړاو ډېرې پوښتنې او شکونه لا هم پر خپل ځای دي. که څه هم حکومت طالبان په برید کې په لاس لرلو تورن کړي وو، خو تر ننه یې هېڅ داسې ثبوت نه دی وړاندې کړی چې د دوی دغه ادعا ثابته کړي. له بله اړخه حکومت آن په دې برخه کې پړو امنیتي مسوولینو ته نه سزا ورکړې او نه یې هم له دندو ګوښه کړي دي.
که څه هم ځينې کسان دا یوه داسې پېښه ګڼي چې د سیاسي موخو لپاره پلان شوې وه او د تکرار شونتیا یې نه ویني، خو تر هغو چې د دغه برید په تړاو پوښتنو او شکونو ته ځواب ونه ویل شي، سخته ده چې په ډاډ سره دې څوک ووايي چې دا ډول بریدونه به نه تکراریږي. د دغه برید او تر دې وړاندې پر کوثر ښوونیز مرکز د برید لاملین او موخې لا هم نه دي څرګندې، نو دا هم څرګنده نه ده چې دا به وروستی دغه ډول برید وي او که به تکراریږي.
خو د دغه ډول بریدونو د مخنیوي لپاره څه کېدلی شي؟
لومړی خو تر ګردو مهم کار دا دی چې د جګړې ښکېل اړخونه په دې اړه په صراحت او وضاحت سره خپل دریځ څرګند کړي. له نیکه مرغه پرون طالبانو همدا کار کړی او په دې اړه یې په یوه خپره کړې اعلامیه کې په واضح ټکو ویلي، چې دوی نه پخوا داسې کوم برید کړی، نه یې کوي او نه هم دا دوی د خپل ځان په ګټه چاره ګڼي. که څه هم طالبانو حکومتي کړۍ تورنې کړې، خو حکومت بیا یو مخ طالبان تورنوي چې دغه ډول بریدونه کوي. اوس د دې لپاره چې پر ښوونیزو او تحصلي مرکزونو باندې خوره وېره ختمه شي، خلک خپل ماشومان او ځوانان ښوونځیو او پوهنتونونو ته ولېږي، نو پکار ده چې ښکېل اړخونه نه یوازې واضح دریځ ولري، بلکې په دې برخه کې عملي ګامونه هم واخلي. حکومت که داسې څه لري چې په دغو بریدونو کې طالبان ښکېل دي، نو له خلکو سره دې یې شریک کړي او که یې نه لري، نو د وېرې خپرولو پر ځای دې خپله هڅه وکړي چې د ښوونیزو او تحصلي مرکزونو امنیت خوندي کړي او پرېږدي چې د علم ډیوې همداسې رڼاوې خورې کړي او د افغان زخمي وجود لپاره پټۍ جوړې کړي.