د چین د سوداګرۍ وزارت د مارچ په ۱۳مه نېټه اعلان وکړ چې د چین او امریکا د اقتصادي او سوداګریزو مشورو شپږم پړاو به په فرانسه کې ترسره شي. دواړو هېوادونو د اقتصادي او سوداګریزو مشورو میکانیزم تر چوکاټ لاندې په ژنیو، لندن، ستاکهولم، مادرید او کوالالمپور کې خبرې اترې ترسره کړې وې.
روان کال د چین او امریکا د اړیکو لپاره یو لوی کال دی. د دواړو خواوو ترمنځ د اقتصادي او سوداګریزو مشورو دغه پړاو ستر اهمیت لري. د چین دوه ملي غونډې په دې وروستیو کې پای ته رسېدلې دي او د دوو غونډو په ترڅ کې د چین ۱۵م پنځه کلن پلان تصویب شوی چې پکې د راتلونکو پنځو کلونو لپاره د چین د پرمختګ نقشه جوړه شوې او نړیوالې ټولنې ته د فرصتونو لېست هم وړاندې شوی دی.
چین به په راتلونکو پنځو کلونو کې په دوامداره توګه د لوړ کیفیت پرمختګ ته وده ورکړي، د لوړې کچې ورخلاصون به پراخ کړي، د خپل لوی بازار پټ توان خلاصولو ته به دوام ورکړي او بېلا بېلو هېوادونو ته به لازیات نوي فرصتونه برابر کړي.
د چین په همکارانو کې امریکايي شرکتونه هم شته، له همدې امله د امریکا بېلا بېلو ټولنو د چین دوو ملي غونډو ته ډېره پاملرنه کړې ده. د سي ان ان په ویبپاڼه یوه خپاره شوي راپور لیکلي: (( له بېجینګ څخه خبر به دا وي چې د چین نوښت او نوی پرمختګ به نړۍ ته ګټه ورسوي. ))
د امریکا شرکتونه د چین او امریکا په همکارۍ کې نویو فرصتونو ته سترګې په لار دي، خو دا چې یاد فرصتونه عملي کېدای شي، په دې پورې اړه لري چې د امریکا حکومت له چین سره خپلې اقتصادي او سوداګریزې اړیکې څنګه اداره کوي.
پر ورخلاصون او همکارۍ د ټينګار او د محافظت پالنې تعقیب ترمنځ انتخاب یو ځل بیا راڅرګند شوی. د چین ځواب ثابت پاتې دی چې د چین او امریکا د اقتصادي او سوداګریزو اړیکو جوهر د ګډو ګټو پر بنسټ همکارۍ دي او دواړه خواوې باید یو له بل سره همکاري او ګډ پرمختګ ومومي.
د چین او امریکا د اقتصادي او سوداګریزو اړیکو ثبات اسانه کار نه دی او دا وضعیت باید ګډوډ نه شي. د چین او امریکا اقتصادي او سوداګریزو ټیمونو په تېر کال کې د اقتصادي او سوداګریزو مشورو پنځه پړاوونه ترسره کړل. تر بدلونونو وروسته، دواړه خواوې بالاخره د خبرو اترو له لارې د اختلافاتو د حلولو سمې لارې ته راستانه شول چې د نړۍ اقتصاد یې له زیانونو څخه وژغوره.
د مشورو د نوي پړاو لپاره د چین دریځ روښانه دی: چین تل پر دې ټینګار کوي چې د مساوي مشورو له لارې په سمه توګه توپیرونه حل کړي او هېڅکله به د امتیازاتو په بدل کې پر خپلو مشروع حقونو او ګټو له چا سره جوړجاړی ونه کړي. د چین او امریکا اقتصادي او سوداګریزې مشورې باید په نوي کال کې د دواړو هېوادونو د اقتصادي او سوداګریزو اړیکو د ښه پیل په توګه کار وکړي.