ایران د هرمز تنګي د بیا پرانیستلو لپاره نوي شرطونه وړاندې کړل

ایراني چارواکو د هرمز تنګي د بیا پرانیستلو لپاره نوي شرطونه مطرح کړي دي. د ایران د ملي امنیت شورا منشي محمدباقر ذوالقدر ویلي، تر هغه به دغه تنګی خلاص نه شي چې امریکا خپل دریځ او چلند بدل نه کړي. ایران د جګړې او بریدونو د پای ته رسېدو، د امریکايي ځواکونو د وتلو، د سمندري محاصرې د لرې کېدو، د جګړې د زیانونو د جبران، د بندیزونو د لغوه کېدو او د کنګل شویو ایراني شتمنیو د ازادېدو غوښتنه کړې ده. بلخوا د ایران د بهرنیو چارو وزیر عباس عراقچي وايي، تهران او مسقط په هرمز تنګي کې د کښتیو د تګ راتګ د مسیر او حقوقي مدیریت په اړه هوکړې ته نږدې شوي دي. د هغه په وینا، دواړه هېوادونه لومړی د یوه موقتي مسیر پر جوړولو خبرې کوي چې وروسته به د دایمي مسیر لپاره بنسټ شي.