د ټاکنو کمېسیون بالاخره د تېرو ولسمشریزو ټاکنو پایلې اعلان کړې. محمد اشرف غني د (۵۰.۶۴) سلنه رایو په ګټلو د افغانستان منتخب ولسمشر اعلان شو. د ټاکنو کمېسیون وايي چې په تېرو ټاکنو کې (۱۸۲۳۹۴۸) کسانو برخه اخیستې وه چې محمد اشرف غني وتوانید له دې ډلې د (۹۲۳۵۹۲) رایې تر لاسه کړي. ټاکنو کمېسیون وايي چې دا اعلان د ټاکنیزو شکایتونو کمېسیون له خوا د ځانګړي تفتیش د پرېکړې له عملي کېدو وروسته کوي. د ټاکنیزو شکایتونو کمېسیون ځینو غړو بیا ویلي چې د دوی پرېکړه سمه نه ده عملې شوې او ټاکنو کمېسیون خپلسري کارونه کړي دي.
اوس مهمه پوښتنه دا ده چې له دې سره ټاکنیزه لانجه حل شوې او که موږ د لانجو یو بل پېچلي پړاو ته داخل شوي یو؟
د عبدالله عبدالله په مشرۍ د ثبات او همپالنې او د حکمتیار په مشرۍ د اسلامي عدالت ټیم له وړاندې د دې پرېکړې مخالفت کړی او ویلي یې دي چې پر وړاندې به یې ودریږي. د ثبات او همپالنې ټیم مهمو ګډونوالو ګواښ کړی چې موازي حکومت به جوړوي. جنرال دوستم، محمد محقق، کریم خلیلي او د دې ټیم نورو ګډونوالو ویلي چې دوی د کمېسیون پرېکړه نه مني او خپل موازي حکومت به جوړوي. له دې ښکاري چې ټاکنیزه لانجه نه یوازې حل شوې نه ده، بلکې یو بل پړاو ته ننوتې ده. د ثبات او همپالنې ګواښ ساده نه دی او که دوی رښتیا هغه څه وکړي چې ویلي یې دي، نو ستونزه به لا پراخه شي. اوس وېره ده چې ښايي په ځینو ولایتونو کې پراخ لاریونونه وشي، یا لویې لارې بندې کړل شي او یا هم هڅه وشي چې ځیني سیمې د حکومت له کنټرول څخه و ایستل شي. په دې ډول د ټاکنو د پایلو اعلان یو بله لانجه جوړې کړې ده.
له بله اړخه ټاکل شوې درې ورځې وروسته د طالبانو او امریکا تر منځ د تاوتریخوالي د کمولو مرحله پیل شي او یوه اونۍ به دوام کوي. یوه اونۍ وروسته به د سولې هوکړه لیک لاسلیک کېږي او دا چاره به بین الافغاني خبرو ته لاره هواروي. اوس چې دلته د ټاکنو پایلې اعلان شوې او ورسره به پراخ اعتراضونه او لانجې پیلېږي، نو له شک پرته چې دا چاره به د بین الافغاني خبرو په مخ کې یو واقعي خنډ جوړ کړي. که په کابل او د حکومت تر کنټرول لاندې سیمو کې پراخې لانجې، اعتراضونه او اختلافات وي، نو دلته به د سولې د خبرو لپاره د حکومت، سیاسي ګوندونو او سیاستوالو تر منځ هم پر ګډ ټولمنلي، ملي او افغاني پلاوي اتفاق نه وي. دا چاره به د دې سبب شي چې بین الافغاني خبرې یا پیل نه شي، یا هم نیمګړې پیل شي او یا هم ښايي یو مخ وځنډېږي. له بله اړخه اشرف غني او ملګري یې چې له وړاندې د سولې د روانو هڅو مخالفت کوي، له دې اعلان سره ښايي ځان لا زیات پياوړی او مشروع احساس کړي او په لا زیات قوت د سولې له روانې پروسې سره مخالفت ته را ووځي.
په دې ډول د ولسمشریزو ټاکنو د وروستیو پایلو اعلان نه یوازې لانجه حل کړې نه ده، بلکې لا یې پېچلې کړې ده. له دې سره به نه یوازې د حکومت تر کنټرول لاندې سیمه کې سیاسي لانجې زیاتیږي، بلکې د سولې په چاره کې به هم خنډ او ځنډ پیدا شي.