ایرانۍ رسنیو د دې هېواد د عدليې وزارت د بشر حقونو او نړۍوالو چارو مرستیال عسکر جلالیان په حواله لیکلي چې نن ۱۰۱ تنه افغان زندانیان یې د افغانستان سرپرست حکومت ته سپارلي دي. د دې رسنیو په راپور کې همداراز راغلي، دغه زندانیان د بند پاتې مودې د تېرولو لپاره په سيستان او بلوچستان ولايت کې د نيمروز له لارې د افغانستان د سرپرست حکومت چارواکو ته سپارل شوي دي. په ورته وخت کې د کډوالو او بېرته راستنېدونکو چارو وزارت وايي، چې د هرات د اسلام کلا بندر له لارې له ایران څخه دوه زره او ۵۳۴ افغان کډوال هېواد ته راستانه شول. د ځايي مسولینو په وینا؛ له یاد کسانو ۲۸۸ د مرستو په موخه د مهاجرت نړیوال سازمان ته ورپېژندل شوي دي.
