له څو ورځو راهیسې د چین په هانګجو کې د آسیايي لوبو ۱۹ م پړاو پيل شوی چې څه باندې سل افغان ورزشکاران هم ګډون پکې لري.
په لاندې کرښو کې د دې لوبو د اهمیت، افغانانو، آسیا خلکو او نړیوالو پاملرنو او د چین له خوا دې سیالیو ته د چمتووالي په اړه بحث شوی، خو لازمه ګڼو چې لومړۍ آسیايي لوبې وپېژنو.
آسیايي لوبې څه دي؟
دا په آسیا لویه وچه کې د څو ورزشي لوبو سیالي ده چې په هرو څلورو کالو کې یوځل د آسیا المپيک شورا له خوا د د دې لويې وچې په مختلفو برخو کې او د همدې وچې د ورزشکارانو ترمنځ ترسره کېږي.
دغه لوبې د المپيک نړیوالې کمېټې IOC له خوا په رسمیت پېژندل شوې او د المپيک له لوبو وروسته تر ټولو لویې ورزشي سیالۍ دي.
سږ دا لوبې د چین په هانګجو ښار کې ترسره کېږي.
د تېرې شنبې په شپه (د روان میلادي کال د سپټمر ۲۳مه) د چین په هانګجو ښار کې د آسیايي لوبو ۱۹مه دوره له یوې هنري نندارې وروسته د دغه هېواد د دولت د رییس شي جین پینګ په شتون سره رسما پيل شوه.
د دې لوبو اهمیت له دې هم ښکاري چې د چین د دولت د رییس شي جین پینګ له خوا يې پيلېدل اعلان شول.
د چیني رسنیو د معلوماتو له مخې په دې سیالیو کې ۴۵ آسیايي هېوادونو له ۱۲ زره ډېر ورزشکاران ګډون لري.
د افغانانو لپاره ښه خبر دا دی چې په دې لوبو کې په ۱۷ رشتو کې شاوخوا ۹۹ افغان ورزشکاران ګډون لري چې ښايي دا لومړی ځل وي چې په دې شمېر افغان ورزشکاران په آسیايي لوبو کې ګډون کوي.
ولې د هانګجو آسیایي لوبې د آسیا د خلکو له پراخ ملاتړه برخمنې دي؟
په دې سیالیو کې په دومره شمېر افغان ورزشکاران ګډون څه په ډاګه کوي؟
لکه مخکې مو چې وویل، دغه سیالۍ د ټولې اسیا لپاره د اهمیت وړ دي او په دې سره د اسیایانو د یووالي چانس لا زیاتېږي.
شناندي وايي، دا چې په دې لوبو کې د ګډونوالو افغان ورزشکارانو شمېر د پام وړ زیات دی، ظاهرا يې دوه لاملونه دي.
یو دا چې چین د افغانستان ګاونډی او دوست هېواد دی چې تل يې د حکومتونو ترمنځ روابط ډېر نږدې او دوستانه پاتې شوي دي.
بل دلیل دا دی چې د افغانستان سرپرست حکومت تراوسه د نړۍ د هېڅ هېواد له خوا په رسمیت نه دی پېژندل شوی، نو د سرپرست حکومت مسوولین هڅه کوي چې د چین په شان یو او مطرح هېواد سره په هر ډګر کې اړیکې ګرمې وساتي څو ځانته له ګوښي توبه نجات ورکړي.
د دې لوبو لپاره د چین له خوا ډېر ځانګړي، د پام وړ او ځانګړی چمتووالی نیول شوی چې د آسیا د یوه لوی مخ پر وده هېواد چین د عصري کېدو ښودنه کوي.
دغه راز یادې سیالۍ نړۍ ته د آسیا د یووالي، ګډ فرهنګ، اتحاد او اتفاق انځور وړاندې کوي.
دا لوبې نړۍ ته د آسیایانو سوله غوښتنه، ټولشمولیت او نوښتونه وړاندې کوي.
نو پورته یاد شویو خبرو ته په پام سره، د افغانستان په شمول د ټولې آسيا خلک له دې سیالیو ملاتړ کوي.
د دې سیالیو د افتتاح په مراسمو کې اوبه د یوه اصلي عنصر په توګه استفاده شوې او دا داسې تفسیر شوې چې «د آسیا څپه» د پرمختګ په نوي پړاو کې د چین، آسیا او نړۍ د یووالي او پرمختګ څپه ده.
په بېجینګ کې د ۱۹۹۰ میلادي کال آسیايي لوبو او په ۲۰۱۰ میلادي کال کې په ګوانجو کې له آسیايي لوبو وروسته دا د درېیم ځل دی چې چین د آسیايي لوبو کوربه توب کوي.
د اسیا المپیک شورا ټول ۴۵ غړي او له ۱۲ زره ډېر ورزشکاران په دې لوبو کې شتون لري.
د چیني رسنیو د خبر له مخې دا لوبې ۴۰ اصلي پېښې لري چې د آسیا ټولې سیمې پوښښوي او دودیز آسیايي ورزشونه او فرهنګ په پراخه توګه په بر کې نیسي.
د هانګجو آسیايي لوبې د چین راسخ عزم او د آسیا د خلکو لوړو هیلو منعکس کونکې دي.
چین نړۍ ته د دې سیالیو د جریان د منعکسېدو په موخه داسې آسانتیاوې برابرې کړې چې هر څوک که د نړۍ په هر ګوټ کې وي د مختلفو ټولنیزو رسنیو له لارې يې کتلای شي.