کډوالو چارو وزارت: بغلان کې د سېلابونو له امله ۳۱۵ تنه مړه شوي

د کډوالو او بېرته راستنېدونکو چارو وزارت ویلي، چې په بغلان ولایت کې د وروستیو سېلابونو له کبله ۳۱۵ تنه مړه شوي او ۱۶۳۰ تنه نور ټپیان دي. یاد وزارت د بغلان ولایت د کډوالو چارو ریاست له قوله راپور ورکړی، چې د سېلابونو له کبله ۲ زره ۶۶۵ کورونو په کلي او قسمي ډول تخریبېدو تر څنګ زر څاروي هم تلف شوي دي. راپور زیاته کړې، دغو سېلابونو تر ټولو زیات زیانونه په شیخ جلال کلي، د مرکزي بغلان ولسوالۍ په سولې ښارګوټي او د بورکې ولسوالۍ شرشر کلي کې اړولي دي. یاد وزارت ویلي، دغه ارقام لومړني دي او د ځاني او مالي کچې د زیاتېدو احتمال شته دی.