د ولسي جرګې غړي: طالبان او حکومت له ملکي وګړو د سپر په توګه کار اخلي

د ولسي جرګې غړي وایي حکومت او طالبان دواړه له ملکیانو د سپر په توګه کار اخلي. د ولسي جرګې غړو د نننۍ غونډې په امتیازي ساعت کې د خبرو پر مهال د ملکي وګړو مرګ ژوبله د جدي اندېښنې وړ بللې ده او پر دواړو لورو یې غږ کړی چې جګړې کمې کړي او اوربند ته غاړه کېږدي. د ولسي جرګې غړو د کندهار په ارغنداب کې د تېرې ورځې برید ته چې یوولس ملکي وګړي پکې وژل شوي په اشاري ویلي، دغه برید جنګي جنایت دی او باید د پېښې هر اړخیزه پلټنه وشي. دوی همدا راز د کندهار په ځینو ولسوالیو کې وروستۍ نښتې هم د جدي اندېښنې وړ بللې دي او په خبره یې د ژمي په دې سړو ورځو کې زرګونه کسان په ګڼو ولسوالیو کې د خپلو کورونو پرېښودو ته اړ شوي دي. وکیلانو همدا راز ویلي دواړه لوري دې ژر تر ژره جګړه کمه کړي او همدا راز یې ویلي چې که پر وخت له اړو خلکو سره مرسته و نه شي نو ښایي بشري ناورین رامنځ ته شي نو ژر تر ژره دې جګړې ودرول شي.