د امریکا په جنجالي ټاکنو کې جوبایډن بریالی شو چې اوسني ولسمشر ډونالډ ټرمپ ته په غوڅ اکثریت ماتې ورکړي او د دغه هېواد راتلونکی ولسمشر شي. بایډن به د ۲۰۲۱ز کال په جنورۍ کې سپينې ماڼۍ ته ځي او خپل کار به رسماً د امریکا د ولسمشر په توګه پیلوي.
له دې سره د نړۍ سیاسیونو بایډن ته د بریا مبارکي ورکړې چې افغان سیاسیون هم له دې کاروانه وروسته پاتې نه دي. ولسمشر غني، د ملي مصالحې عالي شورا رییس ډاکټر عبدالله، پخواني ولسمشر حامد کرزي او ګڼو نورو افغان سیاسیونو بایډن ته مبارکي ورکړې او له هغه د سولې د راوستو تمې لري.
بایډن د امریکا ۴۶ام ولسمشر شو، هغه د امریکايي ټاکنو په تاریخ کې داسې ټاکنیز ټکټ دی چې تر ټولو ډېرې رایې یې ګټلې دي. بایډن تېره ورځ په یوه خبري کنفرانس کې راڅرګند شو او د بریا تر اعلان وروسته یې لومړنۍ وینا د امریکا او نړۍ لپاره هیله بښونکې وه. نوموړي وویل چې په امریکا کې به د یووالي لپاره کار کوي او دغه راز به د نړۍ په کچه د امریکا برم بیا ځلي را ژوندی کړي. بایډن ته د نړۍ له ګوټ ګوټ سیاسي رهبرانو او د هېوادونو ولسمشرانو د مبارکۍ پیغامونه لېږلي دي.
افغان ولسمشر اشرف غني په خپل پیغام کې هیله څرګنده کړې چې د بایډن د واکمنۍ پر مهال د افغانستان او امریکا ترمنځ اړیکې پیاوړې او پراخې شي. د ارګ له مطبوعاتي دفتره په خپره شوې خبرپاڼه کې راغلي چې امریکا او افغانستان ستراتېژيک ملګري دي او د دې ملګرتیا د لا پیاوړتیا او قوت لپاره لا ډېر کار ته اړتیا ده. ولسمشر غني تمه څرګنده کړې چې د بایډن د حکومت پر مهال به د سولې او ترهګرۍ سره د مبارزې په برخه کې د امریکا او افغانستان ستراتېژيکې اړیکې لا پراخې شي. د هغه په خبره: ((د امریکا متحده ایالات زموږ ستراتېژیک شریک دی. له امریکا متحدو ایالتونو سره زموږ ستراتېژیک مشارکت به له ترهګرۍ سره په مبارزه او په افغانستان کې د سولې او ثبات ټینګښت په برخو کې پیاوړی او دوام وکړي)).
د ولسمشر غني تر څنګ د ملي مصالحې عالي شورا رییس ډاکټر عبدالله عبدالله هم د بایډن د بریا مبارکي ویلې ده. نوموړي ویلي چې بایډن او امریکايي ملت ته د سختو ټاکنو د ترسره کولو او په دې سختو شرایطو کې د یوې تاریخي هڅې د ترسره کولو له امله مبارکي وايي. ډاکټر عبدالله عبدالله وايي: ((جو بایډن، کاملا هاریس او د امریکا ملت ته د دې سترې بریا مبارکي وایم)).
پخواني ولسمشر بیا تمه څرګنده کړې چې د بایډن بریا په افغانستان کې د سولې او ثبات ته راتګ سبب شي. پخواني ولسمشر د جو بایډن د بریا په مناسبت په خپاره کړي پیغام کې ویلي، چې بایډن او مرستیالې ته یې د بریا له امله مبارکي وايي، خو د دې تمه لري چې دوی په افغانستان او سیمه کې د سولې او امنیت د راوستو پالیسي او تګلاره ولري. نوموړي هیله څرګنده کړې چې د امریکا په نوي سیاست کې له افغانستان سره د دغه هېواد اړیکې د سولې او ثبات پر تامین متمرکزې وي او په دې توګه په افغانستان کې روانې جګړې او وینې بهېدنې پای ته ورسېږي. د پخواني ولسمشر حامد کرزي له مطبوعاتي دفتره په خپره شوې اعلامیه کې راغلي: ((ښاغلی کرزی هیله من دی، چې د امریکا نوی سیاست له افغانستان سره د اړیکو په برخه کې پر سولې او د ثبات پر راتګ متمرکز وي، چې په دې توګه له دلته روانې جګړې، وینې تویېدنې او نا امنۍ ختمې شي او د افغانستان خلک به یوې تلپاتې ارامتیا ته ورسېږي)).
افغان سیاسیون داسې مهال له جوبایډن د سولهییزې لارې د خپلولو تمه لري چې هغه د افغانستان په شل کلنه جګړه کې په یو ډول نه یو ډول ښکېل و. د اوباما د واکمنۍ پر مهال چې په افغانستان کې د امریکايي جګړې اوج و، بايډن د اوباما مرستیال و او په ځلونو یې افغانستان ته سفرونه هم کړي دي. هغه تر دې دمه په خپلو څرګندونو کې د افغانستان او دلته د روانې جګړې په اړه داسې د پام وړ او عملي خبرې نه دي کړې.
