د افغانستان د سولې د هڅو چټکتیا لپاره تازه ګامونه اوچت شوي دي. راپورونه وایي چې تازه په مسکو کې د افغان سولې په اړه کنفرانس جوړېدونکی دی او په افغانستان کې د ملګرو ملتونو د مرستندویه دفتر مشره بیا دوحې ته تللې او هلته هڅه کوي چې د افغان سولې روان بهیر چټک شي. رسنیو ته رسېدلي معلومات ښيي چې روسیې بیا خپلې غونډې ته ګڼ سیاسیون او همدا راز د افغان حکومت مهم چارواکي وربللي دي. افغان حکومت تر اوسه په دې اړه غبرګون نه دی ښودلی.
وروسته تر هغې چې د افغانستان د سولې خبرې په دوحه کې به خنډ او ځنډ سره مخ شوې د امریکا په ګډون ګڼو اړخونو هڅه پیل کړې چې په دغه خبرو کې پرمختګ راشي او اوسنی په ټپه ولاړ وضعیت بدلون وکړي. د سیمې د هېوادونو د هڅو په دوام تازه روسیې غوښتي چې د افغان سولې په اړه په مسکو کې یو کنفرانس جوړ کړي. رسنیو ته رسېدلي معلومات ښيي چې روسیه غواړي د سیمې د هېوادونو، طالبانو او افغان چارواکو او سیاسیونو له ګډون د سولې په تړاو یو کنفرانس جوړ کړي او په دې کنفرانس کې وکړی شي چې د سولې بهیر چټک کړي او د سولې په ټپه ولاړ وضعیت بدل شي.
د راپورونو له مخې تر راتلونکو اتو ورځو پورې به مسکو د داسې یوې غونډې کوربه وي چې هدف به یې د دوحې د مذاکراتو چټکتیا او د سولې په برخه کې نوي پرمختګونه وي. سرچینې وایي چې ولسمشر غني، د ملي مصالحې عالي شورا رییس ډاکټر عبدالله عبدالله، د چین، پاکستان، ایران او امریکا استازو او د بهرنیو چارو وزیرانو ته په دې غونډه کې د ګډون لپاره بلنه ورکړل شوې ده. د ملي مصالحې عالي شورا ویاند فریدون خوځون هم بیا رسنیو ته تایید کړې چې ډاکټر عبدالله ته په دې کنفرانس کې د ګډون بلنه ورکړل شوې ده. د ده په خبره، د ملي مصالحې عالي شورا به په دغه غونډه کې د ګډون په تړاو سلا مشورې ورکړي. هغه وایي: «دې غونډې ته افغان سیاسیونو ته د ګډون بلنه ورکړل شوې ده. د ملي مصالحې عالي شورا رییس هم د بلل شوو له ډلې دی. خو معلومه ده چې ګډون به پکې وکړي کنه».
بلخوا په کابل کې د ملګرو ملتونو د مرستندویه دفتر مشره دیبورا لاینز هم دوحې ته تللې ده. د یوناما له لوري په خپره شوې اعلامیه کې راغلي چې دیبورا لاینز به په دې سفر کې له طالب استازو او دغه راز د سولې په برخه کې له نړیوالو همکارانو سره وګوري. سرچینه کاږي چې په دې سفر کې به د سولې پر نورو ګامونو او دغه راز د اوسني بهیر پر چټکتیا خبرې کوي. په اعلامیه کې راځي: «په دې سفر کې به د سولې له نړیوالو شریکانو سره خبرې کېږي. د سولې اوسنی بهیر به چټکېږي».
بلخوا راپورونه وایي چې طالبان د امریکا له لوري پر نوې شریکه شوې طرحه په خبرو بوخت دي. طالبانو ته نږدې سرچینې وايي چې ښايي دوی ډېر ژر له امریکا سره پر نوې طرحه هوکړې ته ورسېږي. پخوانی طالب چارواکو عبدالسلام ضعیف وایي چې طالبان او امریکا د زندانیانو پر خوشي کولو، د بندیزونو پر لرې کولو او نورو مهمو مسایلو خبرې کوي او ښایي ډېر ژر هوکړې ته سره ورسېږي.
دغه خبرې او پرمختګونه داسې مهال دي چې امریکا هم وایي د افغان سولې د روان بهیر د بریا امکان شته دی. رویټرز تازه د امریکا د بهرنیو چارو زوارت د ویاند له خولې ویلي چې دا ځل به خلیلزاد تر اوږدې مودې پورې په دوحه کې پاتې شي او په دې سفر کې به هڅه وکړي چې د افغان سولې بهیر یوې پایلې ته ورسوي. سرچینه وایي د افغان سولې د بریا امکان شته دی او امریکا هڅه کوي ژر تر ژره روانه جګړه ختمه شي. د طالبانو پخوانی چارواکی عبدالسلام ضعیف هم په دې باور دی چې امریکا د افغان سولې د روان بهیر د بریالي کولو لپاره جدي ده او له اقداماتو یې ښکاري چې دا ځل دا بهیر پایلې ته رسول غواړي.
