پاکستان د خپلو دوه مخو لوبو په دوام اوس وایي چې هند د افغان سولې په برخه کې خنډونه جوړوي. د پاکستان د بهرنیو چارو وزیر شاه محمود قریشي تازه په یوه خبري غونډه کې ویلي چې پاکستان د افغان سولې لپاره هڅه کوي، خو هند په دې لار کې خنډونه جوړوي. بلخوا پاکستان بیا تازه د طالبانو لوړپوړي مشران په تور لېست کې شامل کړي چې شنونکي یې د سولې په لار کې د خنډ جوړولو په مانا بولي. له دې سره هممهاله د طالبانو یو پلاوی پاکستان ته تللی او وايي چې د سفر موخه یې افغان سوله ده.
پاکستان د افغانستان هغه ګاونډی ګڼل کېږي چې دلته په روان ۴۰ کلن ناورین کې ښکېل دی او په مستقیمه توګه یې د جګړو په دوام کې ونډه اخیستې ده. اوس تازه ځان د افغان سولې همکار بولي، خو په عمل کې داسې اقدامات کوي چې له سولې سره په ټکر کې ګڼل کېږي. پاکستان داسې مهال چې د افغان سولې لپاره په نړیواله کچه هڅې روانې دي، طالب مشران تر بندیزونو راوستي دي. د پاکستان د بهرنیو چارو وزارت د تېرې شنبې په ورځ په یوه اعلامیه کې ویلي وو چې د طالبانو دوه مهم مشران ملا برادر او سراج الدین حقاني له دې وروسته پاکستان ته سفر نه شي کولی او په پاکستان کې یې ټولې شتمنۍ کنګل دي. د چارو شنونکي د پاکستان دغه کار د سولې په لار کې په ښکاره توګه د خنډ جوړولو په مانا بولي.
اوس بیا پاکستان هڅه کوي د خپل بام واورې پر بل واچوي. د پاکستان د بهرنیو چارو وزیر شاه محمود قریشي وایي چې هند د افغانستان د سولې په پروسه کې خنډونه جوړوي. نوموړي په دې اړه نور هېڅ وضاحت نه دی ورکړی چې هند په دې لار کې کوم خنډ جوړ کړی دی. قریشي په یوه خبري غونډه کې وویل چې دوی د افغانستان د سولې پروسې ته ژمن دي او په دې برخه کې همکاري کوي، خو هند په دې لار کې د خنډونو جوړولو ته ادامه ورکړې ده. د ده په وینا: ((د سولې په برخه کې زموږ رول ټوله نړۍ ستایي. موږ د سولې لپاره ډېره هڅه کوو، خو هند اوس هڅه کوي چې دغه پروسه له خنډ سره مخ شي)).
محمود قریشي داسې مهال دغه څرګندونې کوي چې د طالبانو یو پلاوی له بندیزونو سره سره له قطر اسلام اباد ته تللی دی. د پاکستان د بهرنیو چارو وزیر وایي چې د ملا برادر په مشرۍ دغه پلاوی یې د سولې په اړه د خبرو لپاره پاکستان ته وربللی دی. ملا برادر پر ده د بندیزونو له وضع کېدو یوازې یوه ورځ وروسته پاکستان ته تللی دی او دا مسئله ټولو نړیوالو رسنیو ته د حیرانتیا وړ ده.
د قطر دفتر ویاند سهیل شاهین بیا وایي چې دا بندیزونه مخکې هم پر طالبانو وو، خو د سولې هوکړې له لاسلیک سره یو څه نرم شوي وو. نوموړی وايي چې له پاکستان سره به د سولې په تړاو د دوی تګ راتګ دوام لري، خو په دې وروستیو کې د کرونا ویروس د پراختیا له امله سفرونه ځنډېدلي وو. طالبان بیا د خپل سفر موخه صرف د افغان کډوالو په اړه خبرې، بین الافغاني مذاکراتو په تړاو بحثونه او ځینې نور مسایل ښيي.
طالب پلاوي په داسې وخت کې پاکستان ته سفر کړی دی چې په افغانستان کې یې جګړې شدیدې کړې دي او له افغان حکومت سره مخامخ خبرو ته نه حاضرېږي. دوی د پاکستان حکومت په رسمیت پېژني، خو افغان حکومت ته د امریکا د لاسپوڅي په سترګه ګوري. بلخوا نړیوالې رسنۍ بیا وایي چې د امریکا د بهرنیو چارو وزیر ښايي منځني ختیځ او خلیج هېوادونو ته د سفر په لړ کې قطر ته هم لاړ شي او له طالب استازو سره وګوري. په دې اړه دقیق راپورونه نه دي خپاره شوي.
افغان سوله په ظاهره توګه د پاکستان له لوري منحصره شوې ښکاري او پرون هم د چارو یو شمېر شنونکو مسیر ورځپاڼې ته ویلي وو چې دغه هېواد غواړي له افغان سولې د خپلو ګټو د تامین لپاره ګټه پورته کړي.