ځوانان د هر ملت د پرمختګ او روښانه راتلونکي ضمانت ګڼل کېږي. هغوی د نوښت، انرژۍ، او تخلیق ځواکونه دي چې کولی شي د یو هیواد ټولنیز او اقتصادي پرمختګ ته نوې لارې چارې پرانیزي. د افغانستان په څیر یوه هیواد کې، چې له اوږدې مودې راهیسې د جګړو او ناکراریو څخه اغیزمن شوی دی، ځوانان د هیواد تر ټولو ستره پانګه ګڼل کیږي. د ځوانانو نړیواله ورځ چې هر کال د اګست په ۱۲مه نمانځل کېږي، د دې ارزښتناک نسل د ستونزو او اړتیاوو په اړه د عامه پوهاوي د لوړولو لپاره یوه غوره موقع ده.
افغانستان کې ځوانان د ځينو نورو هیوادونو د ځوانانو په څیر له ډېرو ننګونو سره مخ دي، خو زموږ ځوانان یو زیات شمېر ځانګړي ستونزې لري چې د کار او ژوند په لټه کې دوی ته زیان اړوي. تر ټولو لویه ستونزه د بې کارۍ ده. افغانستان یو له هغو هیوادونو څخه دی چې د ځوانانو په منځ کې د بې کارۍ کچه ډېره لوړه ده. دا حالت نه یوازې د دوی فردي پرمختګ ته زیان اړوي، بلکې د ټول هیواد د اقتصادي پرمختګ مخه هم نیسي. بې کاري، په ځانګړې توګه د ځوانانو په منځ کې، کولی شي د ټولنیزې بې باورۍ، نا امیدۍ، او په پایله کې د هیواد پریښودلو سبب شي.
د ځوانانو نړیواله ورځ باید په افغانستان کې د دې حالت د بدلون لپاره د یوه مهم فرصت په توګه وکارول شي. افغان سرپرست حکومت ته پکار ده چې د هیواد په ځوانانو جدي پام وکړي او د دوی ستونزو ته اوږد مهالې حل لارې ولټوي. دا اړتیا په ځانګړې توګه د اقتصادي فرصتونو د رامنځته کولو په برخه کې څرګندېږي. حکومت باید داسې ستراتیژۍ جوړې کړي چې نه یوازې ځوانانو ته د کار موندنې فرصتونه برابر کړي، بلکې دوی ته د ځان بسیاینې او مسلکي روزنې زمینه هم برابره کړي.
په دې برخه کې یو له اغیزمنو ګامونو څخه د کارموندنې ځانګړي پروګرامونه جوړول دي. حکومت کولی شي د ځوانانو لپاره د کارموندنې فرصتونه د خصوصي سکتور، زراعتي پروژو، او صنعتي برخو د پراختیا له لارې رامنځته کړي. دغه راز، د حرفوي او مسلکي روزنې مرکزونه باید په پراخه کچه جوړ شي چې ځوانانو ته د کار او مسلک په برخه کې د ضروریاتو مطابق مهارتونه وروزي. د دې ترڅنګ، د نوري نړۍ تجربې په نظر کې نیولو سره، حکومت کولی شي د نوښت او ابتکار ملاتړ وکړي او د کوچنیو او منځنیو تشبثاتو لپاره د پورونو او مالي مرستو پروګرامونه رامنځته کړي.
د افغان ځوانانو د ناوړه حالت بله لویه ستونزه د کډوالۍ مسله ده. افغانستان کې د امنیتي وضعیت د ښه کیدو سره سره، ګڼ شمېر ځوانان د نا امیدۍ له امله هڅه کوي چې له هیواده ووځي او په بهرنیو هیوادونو کې ژوند وکړي. دا حالت نه یوازې د هیواد لپاره یو لوی زیان دی، بلکې د کډوالۍ په مسیر کې د ځوانانو د ژوند او راتلونکي لپاره هم لویې ننګونې را منځته کوي. سرپرست حکومت باید د ځوانانو لپاره داسې اوږد مهالې ستراتیژۍ جوړې کړي چې دوی ته د خپل هیواد دننه د ښه ژوند کولو فرصتونه برابر کړي او د هغوی هیلې بیرته راژوندۍ کړي.
په دې برخه کې د حکومت لخوا د اساسي بدلونونو او اصلاحاتو اړتیا ده. حکومت باید د کار فرصتونو، تعلیم او تربیې، او ټولنیزو خدمتونو د پراختیا له لارې د ځوانانو د کډوالۍ مخه ونیسي. د دې ترڅنګ، حکومت باید د ځوانانو لپاره د ګډون او مشورې فرصتونه برابر کړي چې دوی ته په حکومتي چارو کې د ونډې اخیستلو او د هیواد د پرمختګ په لاره کې خپل رول لوبولو فرصتونه برابر شي.
په پای کې، د افغانستان لپاره دا یو حتمي اړتیا ده چې د خپلو ځوانانو د قوت او استعدادونو څخه د ملي پرمختګ لپاره ګټه واخلي. سرپرست حکومت باید د ځوانانو د ملاتړ، روزنې، او فرصتونو رامنځته کولو لپاره اوږد مهالې ستراتیژۍ جوړې کړي. د ځوانانو نړیواله ورځ موږ ته دا موقع په لاس راکوي چې د ځوانانو اړتیاوې او ستونزې په جدي توګه وڅیړو او د دوی د غوره راتلونکي لپاره عملي ګامونه پورته کړو. افغانستان به یوازې هغه وخت یو روښانه راتلونکي ته ورسیږي کله چې ځوانان یې په خپل هیواد کې د پرمختګ او هوساینې فرصتونه ولري.
افغانستان او د ځوانانو نړیواله ورځ
