د ويتنام د کمونيست ګوند د مرکزي کمېټې عمومي منشي او د دغه هېواد د دولت رئيس ټو لام چين ته په درې ورځني سفر تللی دی. دغه سفر د اګسټ په ۱۸مه نېټه پيل شوی او واک ته تر رسېدو وروسته چين ته د ويتنام د دولت رئيس لومړی سفر دی. د چين د بهرنيو چارو وزارت په يوه بيانيه کې ويلي چې «دا د دواړو هېوادونو او دواړو ګوندونو تر منځ د اړيکو د لوی اهميت څرګندونه کوي».
د اقتصادي او سوداګريزو اړيکو له پلوه، د ټو لام سفر خورا ستر ستراتيژيک اهميت لري. چين او ويتنام دواړو هېوادونو په تېرو څو کلونو کې د ژوند ښه والي او د ولسونو د ښېګڼې لپاره ډېر کارونه کړي دي.
چين په دوامداره توګه د ويتنام تر ټولو لوی سوداګريز شريک او د هغه هېواد د صادراتو لپاره دويمه درجه لوی مارکيټ پاتې شوی دی. د دواړو هېوادونو تر منځ د توکو د سوداګرۍ ارزښت په ۲۰۲۳م کال کې ۲۰۰ ميلياردو ډالرو ته رسيدلی و او چيني سوداګر په ويتنام کې د خپلو پانګونو پراخوالي ته لېواله دي. د چين د کمونيست ګوند د مرکزي کمېټې عمومي منشي او د چين د دولت رييس شي جين پينګ تېر کال ويتنام ته سفر وکړ او د دواړو هېوادونو په اړيکو کې یې د پام وړ تحرک رامنځته کړ.
پر رامنځته شوي تحرک په تکيې سره د چين او ويتنام د اړيکو د پراختيا په توګه اقتصادي او سوداګريزي همکارۍ پراخېدای شي او دواړه هېوادونه د عامه انکشاف په برخه کې لا پياوړې اجماع ته سره رسېدای شي.
د روان کال په لومړيو شپږو مياشتو کې د دواړو هېوادونو تر منځ د دوه اړخيزې سوداګرۍ ارزښت ۱۰۰ ميليارده ډالره ښودل شوی دی او ويتنام د سويل ختيځې اسيا د اتحادیې په غړو هېوادونو کې د چين تر ټولو لوی سوداګريز شريک ګڼل شوی دی. دغه پرمختګ بايد په ۲۰۲۳ کال کې ويتنام ته د رييس شي د سفر په پس منظر کې و ارزول شي چې د دواړو هېوادونو تر منځ د همکاريو اوږدمهالو اهدافو ته د ژمنتيا د تقويې سبب شو.
سيمه ييز جامع اقتصادي مشارکت، تر ټولو لوی سوداګريز بلاک چې چين او ويتنام یې غړيتوب لري، د چين او سويل ختيځې اسيا د اتحادیې د ازادې سوداګرۍ سيمه او د چين د صادراتو او وارداتو نندارتون يا د دغه هېواد پخوانی سوداګريز نندارتون چې په کلني ډول د سويل په کانټون کې جوړيږي، ټول هغه څه دي چې په بازارونو کې د توکو او توليداتو تر منځ د سياليو د رامنځته کېدو او د سوداګرۍ د ودې سبب کيږي. چين ته د لام سفر دواړو هېوادونو ته يو غوره فرصت دی چې له پورته يادو لاسته راوړنو برخمن شي، د بازارونو د انطباق لپاره ګډ ليدلوري تقويه کړي او خپلو ځايي صنايعو او مؤلداتو ته د ودې زمينه برابره کړي.
له کلونو راهيسې، د ويتنام او چين اقتصادي ښکېلتيا د پام وړ څو سکټوري ګټو له لوري پر مخ بېول کيږي. د دوی تر منځ د ډيجيټلي اقتصاد، زرغونو همکاريو او د کمربند او لارې وړانديز په برخو کې رسمي تړونونه موجود دي چې د چين او ويتنام تر منځ د ګډې پراختيا له منافعو د استفادې باالقوه ځواک ښيي.
د بېلګې په توګه، د چين چټک عصريتوب او ور خلاصون د ويتنام د اقتصاد لپاره ګټور ثابت شوي دي، په دغه هېواد کې یې د نوې کېدونکې انرژۍ له توليداتو سره مرسته او د ويتنام خلکو ته یې برېښنا ته لاسرسی او د دندو موندل اسانه کړي دي. د کمربند او لارې وړاندیز د نړيوالې زرغونې پراختيا ائتلاف د زرغونې انرژۍ اهدافو ته رسېدل چټک کړي دي؛ دا هر څه په داسې حال کې شوي چې صنعتي پارکونو او ځانګړو اقتصادي زونونو په دوامداره توګه د چين له لوري د رامنځته شويو کمپنيو په وده کې د پام وړ ونډه ترلاسه کوي. د دې ټولو هڅو او لاسته راوړنو په پایله کې ويتنام د دې جوګه شوی چې مستقيمه نړيواله پانګونه ور جلب کړي او په صنعتي سکټور کې د دندو شمېر د پام وړ لوړ کړي.
د چين او ويتنام رهبرۍ کولی شي چې د راتلونکې دوه اړخيزې سوداګرۍ د پراخولو لپاره نوي ګامونه واخلي. دا تېر کال د چين او ويتنام د جامع ستراتيژيکو همکاريو د مشارکت د رامنځته کېدو لوی عامل و او پر کليدي صنايعو لکه نساجۍ د چين پانګونه د دې سبب شوې چې د ويتنام ځايي صنعتي ځنځير د پام وړ تقويه شي.
چين په ويتنام کې د بهرنۍ پانګونې د شپږمې لویې منبع په توګه له ځايي بازار سره د پام وړ بلدتيا لري او په ډيرو پراختيايي پروژو کې د پام وړ شريک په توګه فعاله ونډه لري. پر دې اساس، د کمربند او لارې وړانديز او دوو دهليزونو او يوې اقتصادي کړۍ د ستراتيژيو تر منځ د مثبتې انرژۍ د خپرولو له لارې چې د دواړو هېوادونو تر منځ د اقتصادي همکاريو د تقويې لپاره وړانديز شوې دي کولی شي چې د ولس محوره پراختيا د چټکولو لپاره يو ګډ ليدلوری رامنځته کړي.
د چين او ويتنام اساسي اقتصادي او سوداګريزو همکاريو ته په پام سره، تمه کيږي چې د لام سفر د راتلونکو پانګونو په پراخولو، د انکشافي پروژو په چټک پليتابه او د سوداګريزو او صنعتي همکاريو د نويو اړخونو په موندلو کې د پام وړ رول ولوبوي.