د چین او افریقا د همکارۍ فورم د څه باندې ۵۰ غړو هېوادونو مشران، لوړ پوړي چارواکي او استازي، د افریقا لیګ د کمېسیون رئیس، د ملګرو ملتونو سرمنشي او د یو شمېر نړیوالو سازمانونو مسئولین به د سپټمبر له ۴مې تر ۶مې پورې په پلازمېنې بېجینګ کې راغونډ شي او د چین او افریقا د همکاریز فورم په سږنۍ سرمشریزه کې به ګډون وکړي.
د چين دغه چاره نه یوازې د چین او افریقا، بلکې د نړیوالې ټولنې لپاره لوی کار بلل کېږي.
په افریقايي لویې وچې کې ډېر زیات مخ پر ودې هېوادونه شته او چین هم يو لوی پرمختیايي هېواد دی، نو همدا وجه ده، چې چین له افریقا سره د مهربانۍ طبیعي احساسات لري.
رئیس شي جين پينګ له ۲۰۱۳م کال راهیسې ۵ ځلې افریقا ته سفرونه کړي، د چین او افریقا د همکاریز فورم د دوو سرمشریزو مشري یې کړې، د نړۍ په لر او بر کې یې له افریقايي مشرانو سره لېدنې کړي او د ټلیفوني، ویډيويي خبرو او پيغامونو له لارې يې له افریقايي ټولنو سره تماس نیولی او همهاله ورسره د چین او فریقا ترمنځ دوستانه تګ راتګ هم زیات شوی او د رسنيو پاملرنه یې راخپله کړې ده.
د ساري په توګه، رئیس شي جين پينګ د تېر ۲۰۲۳م کال د اګست د ۲۱مې نېټې په شپه په ځانګړې الوتکې کې د جنوبي افریقا جوهانیسبورګ ته ولاړ او له دغه هېواده یې څلورمه رسمي لېدنه وکړه او دا افریقا ته د شي جين پينګ ۱۰م سفر و. کله چې شي جين پينګ د جوهانیسبورګ هوايي ډګر ته ورسېد، نو د جنوبي افریقا ولسمشر ماتامیله رامافوسا ورته په هوايي ډګر کې په تمه او هرکلي ولاړ و.
هغه مهال د برېکس هېوادونو سرمشریزه په جنوبي افریقا کې روانه وه او جنوبي افریقا د دې سرمشریزې په بهیر کې د رئیس شي جين پينګ لپاره ځانګړي مراسم ترتيب کړي وو.
ولسمشر رامافوسا په بله ورځ د رئیس شي جين پينګ لپاره د هرکلي درنه مراسم ترسره کړل.
شي جين پينګ يادو مراسمو ته په وينا کې وویل، چې په تېرو ۱۰ کلونو کې د چین او جنوبي افریقا اړیکو ستر پرمختګ موندلی دی.
نوموړي ورپسې په جنوبي افریقا کې د دوربن ساینس او انجنیرۍ پوهنتون کې د کنفوسیوس انسټیټیوټ د جوړېدو جریان له نږدې وکوت او د چیني کال په نوم کلتوري فعالیت کې یې برخه واخېسته او له ولسمشر رامافوسا سره يې په ګډه په دغه هېواد کې د چیني موټرو شرکت د توليد فرعي څانګې د فعالېدو بټن کېکاږه.
شي جين پينګ د دغه سفر په ترڅ کې په ډاګه وويل، چې چین او جنوبي افریقا دې هڅې وکړي، چې د لوړ متقابل باور لرونکي ستراتيژيک دوستان، د ګډ پرمختګ برخوال، د عدالت او مساواتو ملګري وګرځي او دغو خبرو یې د دواړو هېوادونو د اړیکو د پرمختګ لپاره لوری روښانه کړ.
د چین او جنوبي افریقا اړیکې د چین او فریقا د اړیکو د ښه پرمختګ نمونه بلل کيږي.
کله چې شي جین پينګ د ۲۰۱۳م کال په مارچ کې د چین دولت رئیس په توګه وټاکل شو، نو هغه خپل لومړی سفر افريقا ته وکړ او د دغې لويې وچې لپاره یې صمیمي تګلارې وټاکلې او د چین او افریقا د دوستانه اړیکو نوې پاڼه یې پرانېستله.
نوموړي له ۲۰۱۳م کال تر ۲۰۲۳م کال پورې افریقا ته ۵ سفرونه وکړل او هر ځل یې تود هرکلی شوی دی. هغه د چینایانو په استازیتوب ژمنه کړې، که نړیوال حالات هر څنګه بدلېږي، چین يې پروا نه کوي او افریقا سره به پر خپلو دوستانه تګلارو ګامونه پورته کړي، د افریقايي هېوادونو د باور وړ ملګری به پاتې شي او د افریقا د سولې او پرمختګ لپاره به نور زیات خدمتونه وکړي.
اوس چین او افریقا د عصري کېدو بهیر په ګډه پرمخ بیايي او د خپلمنځي ګډ برخلیک د لوړې سویې ټولنې پر جوړولو بوخت دي.
شنونکي باور ښيي، چې د رئیس شي جين پينګ او افریقايي مشرانو تر ګډې لارښوونې لاندې به د چین او فریقا د همکاریز فورم سږنۍ سرمشریزه د پرمختیايي هېوادونو د ابادۍ او د انسانانو د ګډ برخلیک ګډې ټولنې په جوړونې کې مهم تاريخي رول ولوبوي.