د اې ایي يا مصنوعي ځيرکتيا د ظرفيت ابادۍ سيمينار د سپتمبر له ۳مې نېټې څخه تر ۶مې نېټې پورې د چين په شانګهای ښار کې ترسره شو، چې د نژدې ۴۰ پرمختيايي هېوادونو استازو پکې ګډون کړی و.
دغه سیمينار د چين او ملګرو ملتونو په ګډ کوربتوب ترسره شو، چې پکې د پروفېسورانو درسونه او د نظر تبادلې، لېدنې او څېړنې مختلف فعاليتونه ترسره شوي او ګډونوالو استازو ته يې د اې ایي يا د مصنوعي ځيرکتيا تخنيک د روان وضعيت او راتلونکي تمايل په اړه هراړخيز معلومات ورکړل شوي دي.
اې ایي تخنيک په روانې زمانې کې چټک پرمختګ کړی او د ژوند په ډېرو چارو کې کارول کيږي او پراختيا يې د توليد، ښار او طبي چارو په شمول ډېرو برخو کې د ټولنيز او اقتصادي پرمختګ لپاره مهم اهميت لري. اې ایي تخنيک د نوي پړاو د ټېکنالوژيکو اصلاحاتو او د صنايعو د بدلونونو مهم خوځنده قوت بلل کيږي او د هېوادونو د سيالۍ پر راتلونکي ځواک مهمې اغېزې لري.
چين د اې ایي تخنيک په برخه کې يو لوی ځواک یاديږي او د دغه تخنيک پرمختګ ته په درنه سترګه ګوري. د پوهنې ملکيت حق نړيوال سازمان يو راپور ښيي، چې له ۲۰۱۴م کال څخه تر ۲۰۲۳م کال پورې د چين د اې ایي د پوهنې ملکيت حق د غوښتنليکونو شمېر له ۳۸ زرو څخه زیات او لومړی نړيوال ځای يې خپل کړی و، چې امريکا په دغې برخې کې بیا دوهم ځای لري، خو د چين شمېر ترې ۶ چنده زيات دی.
که څه هم اې ایي تخنيک د چټک پرمحتګ په حال کې دی، خو د اکثرو هېوادونو او په تېره بيا د پرمختيايي هېوادونو خلکو ترې رښتينې ګټې نه دي پورته کړي.
د ملګرو ملتونو سرمنشي انټونيو ګوټرېش د ياد سيمينار د پيل مراسمو ته وينا کې ويلي، چې اې ایي تخنيک په حيرانونکې سويې پرمختګ کوي او نړۍ ته بدلون ورکوي، چې دا به د ملګرو ملتونو د دوامدار پرمختګ موخې پوره کولو کې پوره مرسته وکړي.
نوموړي ويلي، د اې ایي د چارو فرصتونه برابر نه دي ويشل شوي او زياتو هېوادونو ترې سمې ګټې نه دي اخيستي او په خبره یې، نړيواله ټولنه بايد د اې ایي پټ قوت پيدا کړي او د يووالي او همکارۍ د پياوړتيا له لارې باید د اې ایي تخنيک لوی واټن کم او له منځه يوسي.
چين د يو پرمختيايي هېواد په توګه د اې ایي چارو د نړيوالو همکاريو او حکومتوالي د پياوړتيا لپاره هلې ځلې کوي. د چين دولت رئيس شي جين پينګ د ۲۰۲۳م کال په اکتوبر کې د کمربند او لارې د نړيوالو همکاريو د درېيم فورم په سرمشريزې کې د اې ایي د نړيوالۍ حکومتوالۍ پېشنهاد اعلان کړی و. د ملګرو ملتونو عمومي اسمبلۍ د روان کال د جولای په لومړۍ نېټې د اې ایي د ظرفيت د ابادۍ په برخه کې د نړيوالو همکاريو د زياتوالي په اړه د چين پرېکړه ليک تصويب کړی او ۱۴۳ هېوادونو پرې لاسليکونه کړي دي. د اې ایي نړيوالې غونډې د جولای په ۴مې نېټې (( د اې ایي د نړيوال حکومتوالۍ په اړه د شانګهای اعلاميه)) خپره کړې ده. دغو اقداماتو د اې ایي د پرمختګ په برخه کې پر زغم، ټولشموليت او دواملرونکي پرمختګ ټينګار کړی او د اې ایي د پرمختګ په اړه يې د پرمختيايي هېوادونو تمې ته داسې ځواب ويلی، چې د بېلا بېلو هېوادونو پراخې ګټې پکې نغښتې دي.
چين د اې ایي په نړيوال حکومتوالۍ کې فعال او عملي کوونکی دی، له مختلفو هېوادونو سره یې د اې ایي همکارۍ پيل کړي او د اړوند ظرفيت د ابادۍ په برخه کې يې له پرمختيايي هېوادونو سره مرستې کړې دي.
د چين او پاکستان د اقتصادي دهليز په پروژې کې د اې ایي همکارۍ د پراختيا په حال کې دي. د بېلګې په توګه، د چين او پاکستان د ځيرک سيسټم لابراتوار په پاکستان کې د لوړ مؤثريت د ټرافيکي اداري سيسټم او د بنسټيزو تاسيساتو د څار او کنټرول سيسټم د جوړولو په شمول د ځيرک ښار په پروژو کې برخه لري او د طبي سيسټم د مؤثريت په لوړولو کې له دغه هېواد سره مرستې کوي. د چين او پاکستان د اې ایي کرنيزو چارو لابراتوار کرنيزو ماشينونو کې د ځيرک سيسټم د فعالولو له لارې د کرنيزو چارو د توليدي مؤثريت د لوړوالي او د حاصلاتو د زياتوالي په هڅه کې دی. دغې پروژې نه يوازې تخنيکي تبادلې او د مستعدو وګړو روزنې پياوړې کړي، بلکې ځايي ټولنيز او اقتصادي پرمختګ يې هم چټک کړی او د اې ایي د نړيوالو همکاريو لپاره يې ارزښتناکې تجربې او طريقې برابرې کړې دي.
چين له پرمختيايي هېوادونو سره ولاړ دی او د اې ایي د ستر توپير او فاصلو د له منځه وړلو ملاتړ کوي او د اې ایي د نړيوالې حکومتوالۍ لپاره يې خپل بصیرت او پلان وړاندې کړي، چې د يوه مسولانه لوی هېواد بڼه ترې ښکاري.