د ۲۰۲۴ کال لپاره د چين د خدماتي سوداګرۍ نړيوال نندارتون اوس د دغه هېواد په پلازمېنه بېجينګ کې روان دی. د چين د دولت رئيس شي جين پينګ سږني نندارتون ته د مبارکۍ په پيغام کې ويلي، د چين د خدماتي سوداګرۍ نړيوال نندارتون د مسلسلو ۱۰ کلونو لپاره جوړ شوی چې ترې د چين د خدماتي چارو او اړوندې سوداګرۍ د باکيفيته پرمختګ بهير څرګندېږي او د ورخلاص نړيوال اقتصاد د ابادۍ لپاره يې مثبت خدمتونه کړي دي.
د سويس IQAir شرکت سږ کال په لومړي ځل د چين د خدماتي سوداګرۍ په نړيوال نندارتون کې ګډون کړی. د دغه شرکت اجرائيوي مشر فرانک هام د رئيس شي جين پينګ مبارکۍ پيغام کې بیان شوي فرصتونه درک کړي او د چين د خدماتي چارو لا ورخلاصون يې د نړيوال اقتصاد يو مهم خوځنده ځواک بللی او په خبره يې، د چين ورخلاصون به بهرنيو شرکتونو ته ګټې ورسوي.
اوس مهال خدماتي سوداګرۍ ورځ تر بلې د نړيوال اقتصادي پرمختګ کليدي ځواک ګرځي. د سوداګرۍ نړيوال سازمان د اټکل له مخې، تر ۲۰۴۰ کال پورې د نړيوالې سوداګرۍ په حجم کې د خدماتي سوداګرۍ کچه به د اوس له ۲۲ سلنې نه څه باندې۳۳ سلنې ته لوړه شي. نو ځکه د ياد نړيوال نندارتون په سږنۍ دوره کې ۸۵ هېوادونو او نړيوالو سازمانونو خپلې غرفې جوړې کړې او د نړۍ له ۵۰۰ مخکښو تصديو څخه څه د پاسه ۴۵۰ پکې ګډون کړی دی. فرانسې د چين د خدماتي سوداګرۍ د سږني نړيوال نندارتون د وياړي مېلمه هېواد په حيث په لومړي ځل خپل ځانګړی نندارځی جوړ کړی او زيات شمېر ګډون کوونکو تصديو يې د دواړو هېوادونو د اړوندو همکاريو د لا ژورتيا هيله ښودلې ده.
د چين سوداګرۍ وزارت د اړوندو شمېرو له مخې، په ۲۰۲۳ کال کې د چين د خدماتي سوداګرۍ عمومي ارزښت ۶۵۷۵مليارډه او ۴۳۰مليونه يوانو ته رسېدلی چې په تاریخ کې يې ساری نشته. له دې جملې څخه له پوهنو څخه د ډکې خدماتي سوداګرۍ انډول ۴۱.۴سلنې ته لوړ شوی دی. له دې څخه څرګندېږي چې په نړيوال بازار کې د چين د خدماتي سوداګرۍ وړتيا او کيفيت پر له پسې لوړ شوی او د چيني اقتصاد نوښتي توان هم تر بريده پياوړی شوی دی. دا د چين د خدماتي سوداګرۍ نړيوال نندارتون لخوا د دومره زياتو بهرنيو تصديو د راجلبولو سبب شوی دی.
په چين کې د خدماتي سوداګرۍ بازار په پر له پسې سمسورېدو سره بهرنيو تصديو ته زيات فرصتونه برابرېږي. د روان کال په لومړۍ نيمايي کې د چين د خدماتي سوداګرۍ وارداتي ارزښت ۲۱۰۰مليارډو يوانو ته رسېږي چې د تېر کال د همدې مودې په مقايسه ۱۶.۴ سلنه زياتوالی يې موندلی دی. د Medtronic شرکت د لوړ پوړي مرستيال عمومي مېنيجر ښاغلي ګو يو شاو په اند، دا چې د چين د لويې پيمانې بازار او اړوندې چارې يې پر له پسې پرمختګ کوي، شرکت ته يې خورا زيات فرصتونه برابرېږي. هغه ويلي: موږ د چين بازار ته خوشبين يوو او هيله لرو چې په دا بازار کې لا پرمختګونه ومومو.
د چين حکومت د چين خدماتي سوداګرۍ د سږني نړيوال نندارتون په ترڅ کې يو لړ اغېزمنې تګلارې اعلان کړې چې پر چين د بهرنيو تصديو باور له دې امله خورا پياوړی شوی دی. په چيني زون کې د Philips ډلې عمومي مېنيجر ښاغلي ليو لينګ د ياد نندارتون له لارې د چين مخ په ښه والي سوداګريز چاپېريال او لا پسې ورخلاصه رويه احساس کړې او په چين کې د کاروبار د پراختيا باور او هوډ يې ټينګ کړی دی.
د چين کمونېست ګوند د ۲۰مې مرکزي کمېټې په درېيمې عمومي غونډې کې ويل شوي، هېواد يې بايد پر ورخلاصون ټينګار ولري او د لا لوړې سويې نوی ورخلاص اقتصادي نظام دې جوړ کړي. د خدماتي سوداګرۍ اړوندو چارو ته چټک پرمختګ ورکول د لوړې سويې ورخلاصون او د نړيوالې سوداګرۍ د پرمختګ لپاره ستر اهميت لري. اوس مهال چين د علم او تخنيک، مخابراتو، کلتور، سيلانۍ او پولي چارو په شمول ۱۳ ساحو کې د خدماتي چارو په مقابل کې کابو ۱۳۰۰ ازمويښتي تدبيرونه نيولي دي.
د چين د خدماتي سوداګرۍ سږني نړيوال نندارتون په جوړېدو سره نړۍ د چين لا زيات پرمختيايي ځواکونه پيدا کړي او د چيني شکله عصريتوب له انرژۍ ډک انجين او ستر فرصتونه يې کتلي دي.