د چين ولسي جمهوريت د جوړېدو د ۷۵مې کليزې د نمانځنې ميلمستيا د سپتمبر د ۳۰مې نېټې په ماښام د بېجينګ د خلکو په لوی تالار کې ترسره شوه، چې پکې د چين د کمونېست ګوند د مرکزي کمېټې عمومي منشي، دولت رئيس او د مرکزي پوځي کمېټې رئيس شي جين پينګ هم ګډون او وينا کړې ده.
د چين لومړي وزیر لي چيانګ د دغې ميلمستيا مشري کړې او د دغه هېواد نورو لوړ پوړو چارواکو جاو له جي، وانګ هو نينګ، څای چي، دينګ شوی شيانګ، لي شي او هان جنګ هم پکې ګډون کړی و او د دې ترڅنګ شاوخوا ۳۰۰۰ چيني او بهرنيو ميلمنو هم پکې برخه اخيستې وه او په ګډه يې د نوي چين د جوړېدو ۷۵مه کليزه ولمناځله.
نوموړي ويلي، د چين کمونېست ګوند د نوي چين د جوړېدو د ۷۵ کلونو په درشل کې د هېواد د بېلا بېلو قومونو سره نه ستومانه کيدونکي کوښښونه کړي او د اقتصاد د چټک پرمختګ او د ټولنې د دايمي ثبات دوه لوی نوښتونه يې کړې دي. کمونېست ګوند په چين کې ستر بدلونونه رامنځته کړي او د چيني ملت بيا سمسورتيا يې يوه نه بدليدونکي تاريخي بهير ته داخله کړې ده.
شي جين پينګ باور ښودلی، چې د چين خلک به په نوې زمانې کې لا زياتې لاسته راوړنې ولري او د انسانانو د سولې او پرمختګ لپاره به نوي خدمتونه وکړي.
نوموړي په خپلې وينا کې د کمونېست ګوند د مرکزي کمېټې او دولتي شورا په استازيتوب د هېواد د بېلا بېلو قومونو خلکو، د چين د خلکو ازادۍ بښونکي پوځ، وسله والو ځواکونو، بېلا بېلو ډيموکراتيکو ګوندي ډلو او ناپېیلو شخصیتونو ته درناوی څرګند کړی او د هانکانګ او مکاو ځانګړو اداري سيمو، تايوان سيمې او په بهر کې مېشتو چيني وګړو ته يې نيکې هيلې وړاندې کړي او له نړيوالو دوستانو څخه یې مننه کړې ده.
شي جين پينګ چيني شکله عصري کېدل او د پياوړي هېواد د ابادۍ، د ملت د بيا سمسورتيا هڅول په نوې زمانې کې د چین د کمونېست ګوند او دولت مرکزي دندې بللي او د چين ولسي جمهوريت د جوړېدو د ۷۵مې کليزې د نمانځنې تر ټولو ښه فعاليت يې د يادو سترو چارو پرمخبېول ښودلې دي.
شي جينګ پينګ ويلي، حکومت او هېوادوال باید د چيني شکله عصري کېدو لپاره د کمونېست ګوند د عمومي لارښوونې او د بېلا بېلو خواوو د همغږۍ پر مرکزي رول ټينګار ولري، د کمونېست ګوند واکمني او واحده لارښوونه باید وساتي او په هراړخيز ډول باید د کمونېست ګوند اداره وهڅوي او دغه راز د چين د ځانګړي سوسياليزم پر لارې بايد ټينګار ولري، د هراړخيزو اصلاحاتو ژورتيا او ورخلاصون باید پياوړي کړي، د باکيفيته پرمختګ هڅونه باید وکړي او د هېواد د پرمختګ برخليک باید خلکو ته وسپاري.
نوموړي ويلي، د يادو چارو په بهير کې بايد د خلکو پر ارادې تمرکز وشي او د خلکو لپاره باید کار او د دوی په اتکا چارې ترسره شي، څو ټول خلک د ګډو هلو ځلو په بهير کې یو له بل سره د اصلاحاتو او پرمختګ ګټې شريکې کړي.
مونږ بايد په سوله کې د پرمختګ پر لارې ټينګار ولرو، د سولې، پرمختګ، همکارۍ او ګډو ګټو بيرغ باید اوچت ونیسو او د نړۍ د سولې او ارامتيا او د انسانانو د ګډ پرمختګ لپاره باید هڅې وکړو.
شي جين پينګ ويلي، د چيني ملت بيا سمسورتيا د هانکانګ، مکاو او تايوان د خلکو په شمول د ټولو چينايانو ګډه هيله ده او په يو هېواد کې د دوو نظامونو د پلي کولو، د هانکانګيانو لخوا د هانکانګ ادارې، د مکاويانو لخوا د مکاو ادارې پر تګلارو يې ټينګار کړی او په خبره یې، د هانکانګ او مکاو د دايمي سمسورتيا او ثبات باید وساتل شي.
شي جين پينګ ويلي، تايوان د چين خاوره ده او د تايوان تنګي د دواړو غاړو خلک ټينګې اړيکې لري او د يو چين د پېژندنې او د ۱۹۹۲م کال د ګډې نظريې پر اصولو باید ټينګار وشي، د تايوان تنګي د دواړو غاړو ترمنځ اقتصادي او فرهنګي تګ راتګ او همکارۍ باید ژورې شي، د خلکو دوستي یې باید ټينګه وساتل شي او له هېواد څخه د تايوان د جلا کېدو د هر ډول فعاليت او هڅې مخه باید ونيول شي.
د هېواد پوره يووالی عمومي تمايل او د خلکو هيله ده. انسانان په يوې کرې کې ګډ ژوند کوي او ټول هېوادونه ګډ برخليک لري.
شي جين پينګ زياته کړې، د چين د حکومت د ۷۵ کلنو هڅو په رڼا کې چيني شکله عصري کېدو بهیر غوړيدلی او ښه راتلونکی به ولري.
نوموړي ويلي، د پرمختګ پر وړاندې به خامخا ستونزې رامنځته کېږي، خو حکومت باید د ټولو احتمالي ستونزو او خطرونو پر وړاندې مقابله وکړي او کومه ستونزه د چين د خلکو د پرمختګ مخه نه شي نيولي.
چيني او بهرنيو ميلمنو په ګډه د چين ولسي جمهوريت د جوړېدو ۷۵مه کليزه ولمانځله او چين ته د سمسورتيا، د چين د خلکو د نيکمرغۍ او هوساينې او د چينايانو او نړيوالو ترمنځ د دايمي دوستۍ هيلې يې څرګندې کړې دي.