د ۲۰۲۴م کال د ملي ورځې رخصتۍ د چين د اقتصاد لپاره د پرمختګ او باثباته بهير ننداره وړاندې کړه. دې مثبتې نښې د چين د کلنيو اقتصادي موخو د ترلاسه کولو هڅو ته پياوړې روحيه ورکړه.
د رخصتيو په ترڅ کې د سيمو تر منځ د تګ راتګ، ښاري پارکونو ته د خلکو د تګ او د سينما د باکس افيس عوايدو ارقام د مصرفوونکو په مارکېټ کې د پام وړ تحرک ښيي. د اکتوبر په پنځمه نېټه ۲۸۰ ميليونو خلکو له يوې سيمې بلې ته سفرونه کړي وو او ښاري پارکونو بيا د رخصتيو په ترڅ کې ۱۲۱ ميليونو ليدونکو ته خدمات وړاندې کړي وو. د اکتوبر د شپږمې نېټې د غرمې تر پاو باندې يوې بجې پورې د سينما د باکس افيس عوايد ۱.۸ ميلياردو يوانو ته رسېدلي وو. په دې هر څه کې د رخصتيو د اقتصاد وده او په کورني اقتصاد کې د تقاضا باالقوه وړتيا نغښتې ده.
د دغه مساعد بهير رامنځته کېدل د روان کال د سپټمبر په ۲۶مه نېټه د چين د کمونېست ګوند د سياسي بيورو د ناستې له روحیې او په ياده ناسته کې له صادرو شويو پاليسو سره تړلي دي. د چين د کمونېست ګوند د سياسي بيورو په ياده ناسته کې د پايدار او روغ اقتصادي پرمختګ پر تقويې او د اقتصادي ودې د ثبات، د صنايعو د عصري کولو او کورنۍ تقاضا د لوړولو لپاره د سياستي اقداماتو د ټولګې د شتون پر اهميت ټينګار وشو. يادو پاليسيو د ملي ورځې د رخصتيو پر مهال اغېز پيل کړ او د بازار د تمې په پوره کولو کې یې مهم رول ولوباوه.
د املاکو بازار د ملي رخصتيو په ترڅ کې مهم مثبت بدلونونه تجربه کړل. د املاکو د پاليسۍ تر خپرېدو وروسته د ملي ورځې د رخصتيو پر مهال په بيجيګ، شانګهای، ګوانجو او شنجين کې د املاکو د پېر او پلور دفترونه فعال وو او د کورونو د پېر او پلور انلاين معاملاتو هم د پام وړ فعاليت درلود. د رخصتيو په ترڅ کې د ملکيتونو د کتلو چارې هم روانې وې چې دا ټول د کورونو اخيستلو ته د خلکو په ليوالتيا کې د پام وړ ډيرښت څرګندونه کوي.
د سوداګريزو استوګنيزو املاکو د پېر کچه هم لوړه وه او د بازار اعتماد په تدريج سره مخ پر جوړېدو و. د شنجين د جونګيوان څېړنيز مرکز د شمېرو له مخې، د اکتوبر له لومړۍ تر درېيمې نېټې پورې په شنجين کې د پلورل شويو نويو کورونو په شمېر کې د تېر کال په پرتله ۵۶۹ سلنه ډيروالی راغلی دی، په داسې حال کې چې د دويم لاس کورونو د پلور کچه بيا د تېر کال په پرتله ۲۳۳ سلنه لوړه شوې ده.
د مصرفوونکو بازار هم د ملي ورځې د رخصتيو پر مهال خورا ګرم و. په ښاري پارکونو کې نږدې ۲۳۰۰ محفلونه جوړ شوي وو چې په لوړ شمېر خلکو پکې ګډون کړی و. د فلمي بازار مساعدوالي هم د مصرفوونکو د بازار په ګرم ساتلو کې حياتي رول ولوباوه.
د موټرو نندارتونونو ته ورتګ هم د ډير شمېر مصرفوونکو لپاره د علاقې وړ انتخاب و. د سوداګرۍ په برخه کې له سبسايډي سره يو ځای په سوجو، لانجو، شي ان، فوجو، تيانجين، نانجينګ او ځينو نورو ښارونو کې د موټرو نندارتونونه جوړ شول چې د مشتريانو په ور جلبولو او د موټرو په پلورلو کې یې د پام وړ ونډه ادا کړه. د موټرو د مختلفو توليدي شرکتونو له لوري پر اعلان شويو تخفيفونو سربېره مشتريانو کولی شول چې د خپلو زړو او پخوانيو موټرو په ورکولو سره له اعلان شوې سبسايډي هم استفاده وکړي او دوه چنده ګټې ترلاسه کړي.
کلتوري او ګرځندوی صنعت هم په کش کې و. د ملي ورځې د رخصتيو پر مهال په ټول هېواد کې توريستي جاذبې له ګڼې ګوڼې ډکې وې او په ښاري پارکونو کې د ګڼ شمېر خلکو را ټولېدل د چين د ګرځندوی صنعت د غوړېدو بله نښه وه.
په ورته مهال په جوهای بندر کې د جوهای – ماکاو- هانګ کانګ تر منځ د تېرېدونکو موټرو شمېر په لومړي ځل له ۲۰ زرو واوښت چې په دوی کې ۱۴۵۰۰ هغه د هانکانګ او مکاو يو پلېټه موټر وو. دا چاره د سيمو تر منځ د تګ راتګ د اسانتيا او د ګرځندوی صنعت د پراختيا لپاره د مساعدو شرایطو څرګندونه کوي.
د سپټمبر په ۲۶مه نېټه د سياسي بيورو د ناستې د روحیې په پياوړي کېدو سره د ملي ورځې تر رخصتيو مخکې د چين د اصلي سيمې د پانګې بازار خورا وده وکړه. که څه هم د ونډو الف بازار د رخصتيو پر مهال تړلی و، خو د هانکانګ سټاک مارکېټ په بشپړه توګه فعال و او معاملات یې د تاريخ تر ټولو لوړې کچې ته ورسېدل.
د هانګ سينګ شاخص د ملي ورځې د رخصتيو پر مهال ۷.۵۹ سلنې ته لوړ شو، په داسې حال کې چې د هان سينګ د ټکنالوژۍ شاخص بيا ۱۰ سلنې ته ورسېد. تر وروستي صعودي بهير وروسته د هانکانګ د ونډو بازار فعاليت په روان کال کې تر ټولو لوړې کچې ته ورسېد او د متحدو ايالتونو او جاپان تر بازارونو په مخکې کېدو سره یې په نړۍ کې لومړۍ مقام خپل کړ. د شمال صندوق حجم چې د بهرنۍ پانګونې د مسير په توګه په پام کې نيول کيږي، په وروستيو کې دوه چنده شوی دی. د چين MSCI او Nasdaq طلايي ښامار شاخصونو ګټه چې د چين د مفهومي ونډو فعاليت څاري تر ټولو لوړې کچې ته ورسېده.
د چين د اقتصاد ليدلوري ته په پام سره د کال په وروستيو دريو مياشتو کې د خوشبينۍ لپاره د پام وړ دلايل شته. د پاليسيو د جوړولو لپاره پايدارې هڅې به اقتصادي بهير لا تقويه او باثباته کړي. د سياسي بيورو د ناستې روحيه به د اقتصادي پراختيا لپاره د پاليسو په جوړولو او پلي کولو کې د ځايي حکومتونو رهنمايۍ ته ادامه ورکړي. د بېلګې په ټوګه، د املاکو د بازار پاليسۍ به لا تقويه شي څو د پايدار او سالم انکشاف سبب شي. د مصرفوونکو په بازار کې به د مصرف د هڅولو او کورنۍ تقاضا د لوړولو لپاره کوټلي ګامونه واخيستل شي.
له دې هر څه سره سره بايد دا ومنو چې اقتصادي پراختيا به له ننګونو سره مخ شي. د نړيوال اقتصادي وضعيت نه ډاډمنتيا او په کورني مارکېټ کې د رقابت شديدوالی ښايي پر اقتصادي ودې اغېز ولري. له همدې کبله، سره له دې چې خوشبيني ساتلی شو، بايد په اقتصادي وضعيت کې بدلونونه هم له نږدې وڅارو او پر باالقوه ګواښونو او ننګونو د برلاستيا لپاره خپل سياستونه له شرايطو سره برابر کړو.