د برېکس د غړيو هېوادونو د مشرانو ۱۶مه سرمشريزه د اکتوبر په ۲۲مې نېټې د روسيې په کازان ښار کې پيل او په ۲۳مې نېټې پای ته ورسېده. دا د نويو غړيو له منلو وروسته د دغه سازمان لومړۍ سرمشريزه وه.
له تېرو څو کلونو راهيسې د برېکس د همکاريز ميکانيزم جاذبه قوه پياوړې شوې او ډېرو هېوادونو يې غړيتوب ته لېوالتيا ښودلې ده.
تايلنډ د روان کال په جون کې د برېکس د غړيتوب رسمي غوښتنه وکړه او يوه میاشت وروسته يعنې په جولای کې د ماليزيا صدراعظم انور ابراهيم هم د دغه سازمان د غړيتوب هيله وښوده او ويې ویل، چې حکومت يې د برېکس نوبتي هېواد ته په دغه سازمان کې د غړيتوب غوښتنليک وړاندې کړی دی.
ښايي د برېکس غړي د روانې میاشتې په پای کې د يادو دواړو هېوادونو غوښتنليکونو ته منظوري ورکړي.
د لاوس، ويتنام، کمبوډيا او ميانمر په شمول د جنوب ختيځې اسيا نورو هېوادونو هم په برېکس کې د ګډون هيله څرګنده کړې ده. د لاوس د پلان او پانګونې مخکيني وزير په ۲۰۲۳م کال کې رسنيو ته ويلي وو، چې حکومت به يې په برېکس کې د غړيتوب غوښتنليک تر جدي فکر لاندې ونيسي. هممهال د ميانمر د پانګونې او بهرنيو اقتصادي اړيکو وزير هم په برېکس کې له غړيتوب سره د دغه هېواد لېوالتيا ښودلې وه او ويلي يې وو، چې حکومت يې د برېکس د غړيو هېوادونو د پرمختګ په اړه څېړنې کوي او په ورته وخت کې ويتنام هم په دغه سازمان کې د ګډون د چارو په اړه د څېړنې خبر ورکړی و.
د دغو هېوادونو يادې مثبتې رويې د برېکس له مفکورو او نظرونو سره تطابق ښيي او د دې ښکارندويي هم کوي، چې په نړيوال ډګر کې به د برېکس اغېزه لا لوړه شي.
شمېرې ښيي، له ۳۰ زياتو هېوادونو په برېکس کې د غړيتوب هيله څرګنده کړې ده.
ولې ډېر هېوادونه د برېکس غړيتوب ته لېواله دي؟
يادې پوښتنې ته لومړی اسان ځواب دا دی، چې د برېکس همکاريزې رويې د ډېرو هېوادونو لېوالتيا راماته کړې او د دوی ملاتړ یې ترلاسه کړی دی. برېکس د هغو هېوادونو په خلاف، چې د کوچنیو کړيو يا پارټبازيو د جوړولو شوق لري، د ورخلاصون، ټولشموليت، همکاريو او ګډ پرمختګ پر رويې ټينګار لري او غړو هېوادونو ته يې توان ورکړی، چې په نړيوالو همکاريو کې برابر او عادلانه ګډون وکړي. دغه ټکي يې د پرمختيايي هېوادونو لپاره ډېر جذابه قوت لري.
چين او د اسيان غړي هېوادونه د همکاريو پياوړتيا ته اهميت ورکوي او اسيان له تېرو څو کلونو راهيسې د سيمې د هېوادونو ترمنځ د خبرو اترو او همکاريو د هڅولو او له پرېکون سره د مخالفت په برخو کې مثبت رول لوبولی دی.
يادې پوښتنې ته دوهم ځواب داسې ورکولی شو، چې د برېکس د غړو هېوادونو ترمنځ په اقتصادي او سوداګريزو چارو کې همکارۍ مخ پر زياتېدو دي.
د چين د ګمرکاتو ملي ادارې تازه شمېرې ښيي، چې د روان کال په نهو مياشتو کې د برېکس هېوادونو د سوداګرۍ اندازه په نړيوال سوداګريز حجم کې له يو په پنځمې برخې څخه اوښتې او په همدې مودې کې د چين او د برېکس د نورو غړو ترمنځ د سوداګرۍ اندازه ٪ ۵.۱ زياته شوې ده. چين په تېرو ۱۵ کلونو کې د اسيان د لومړي سوداګريز ملګري مقام ساتلی او اسيان بیا په تېرو ۴ کلونو کې د چين لومړی سوداګريز ملګری پاتې شوی دی. د دواړو خواوو ترمنځ د صنعتي او عرضې ځنځيرونو همکارۍ انعطاف منونکې او په تېره بيا د برېښنايي موټرو په شمول د نويو صنعتي چارو همکارۍ يې د چټک پرمختګ په حال کې دي او د نورو برخو همکارۍ يې هم را پارولې دي.
د چين دولت رئيس شي جين پينګ تېر کال د برېکس مشرانو ۱۵مې سرمشريزې ته ويلي وو: (( موږ بايد د ورخلاصون، ټولشموليت، همکارۍ او ګډ پرمختګ په بڼه د برېکس پر روحيې ټينګار ولرو، په دغه سازمان کې د نورو زياتو هېوادونو غړيتوب ته باید اجازه ورکړو او په ډېر دقت باید د نړيوالې ادارې د عادلانه او معقول کېدو لپاره پياوړې هڅې وکړو. ))
چين غواړي د پرمختګ پر لارې له نورو هېوادونو سره د لوی برېکس د سالم او دايمي پرمختګ لپاره ګامونه پورته کړي، د پرمختيايي هېوادونو د ځاني پياوړتيا نوې پاڼه ورسره پرانيزي او په ګډه ورسره نړيواله سوله او پرمختګ پياوړي کړي.