د چين اووم نړيوال وارداتي نندارتون د نومبر په ۵مې نېټې په شانګهای کې پرانيستل شو، چې د همدې مياشتې تر ۱۰مې نېټې پورې به دوام ولري.
د چين سږنی وارداتي نندارتون په نوې زمانې کې د ګډ راتلونکي په عنوان ترسره کېږي.
د معلوماتو له مخې، د چين وارداتي نندارتون د وارداتو تر ټولو لوی نړيوال نندارتون دی، چې د نړۍ د ګڼو هېوادونو او سيمو شرکتونه پکې برخه لري او خپل توليدات يې پکې پېر او نندارې ته وړاندې کړي دي.
د چين د اووم نړيوال وارداتي نندارتون پراخوالی ۴۲۰ زره متره مربع ښودل شوی، چې د نړۍ ۱۵۲ هېوادونه، سيمې او سازمانونه پکې ګډون لري او په ټولو ګډونوالو شرکتونو کې يې ۲۹۷ هغه شرکتونه دي، چې ځيني يې د نړۍ د لومړيو ۵۰۰ پياوړو شرکتونو په نوملړ کې ځای لري او ځيني يې بيا په خپل سکټور کې ډېر پياوړي دي او دغه شمېر د دغه نندارتون په تاريخ کې نوی ريکارډ جوړ کړی دی.
د ګډونوالو شرکتونو په اند، هغوی د چین د لوی بازار له لارې خپلو توليداتو ته پراخ بازار موندلی او د لازياتو نویو پرمختيايي فرصتونو په لټه دي.
چين د نړۍ دوهم لوی اقتصاد دی او په توليدي صنعت کې یې له تېرو ۱۴ کلونو راهيسې لومړی ځای نيولی او په تېرو ۷ کلونو کې يې د مالونو په سوداګرۍ کې هم لومړی ځای خپل کړی دی.
اوسمهال د نړۍ وضعيت په سخت بدلون کې روان دی او ګڼ هېوادونه د پرمختګ په برخه کې له زیاتو ننګونو سره مخ دي او د ښه پرمختګ په موخه یې د ورخلاصون او همکاريو انتخاب کړی دی.
د چين د تېرو شپږو نړیوالو وارداتي نندارتونونو په ترڅ کې د ورخلاصون خپاره شوي تدبيرونه ښه پلي شوي او ښې لاسته رواړنې لري.
چين د ورخلاصون پر پراخېدو ټينګار لري او د نړيوال اقتصاد د ورخلاصون لپاره هڅې کوي.
په نړۍ کې د ورخلاصون کچه له ۲۰۰۸م کال راهيسې ټيټه شوې او د ورخلاصون تګلارې او برياليتوبونه پکې مخ په کمېدو دي، خو د چين د ورخلاصون انډول بیا مخ په زياتېدو او مخکښ ځای يې نيولی دی.
د چين د کمونېست ګوند د ۲۰مې مرکزي کمېټې ۳مې عمومي غونډې پرېکړه کړې، چې هېواد به یې د لږ پرمختللو هېوادونو لپاره بازار پرانيزي او پر توکو به یې ګمرکي تعرفې پای ته ورسوي.
د چين دولت رئيس شي جين پينګ د چين او افريقا د همکارۍ فورم د بېجينګ سرمشريزې د پرانيستې په مراسمو کې اعلان کړی، چې د ۲۰۲۴م کال د ډسمبر له لومړۍ نېټې څخه به پر هغو لږ پرمختللو هېوادونو، چې له چين سره يې سياسي اړيکې ټينګې کړي، د صفر تعرفې تګلاره پلې کړي.
چين لومړی هېواد دی، چې د پرمختيايي هېواد او د نړۍ د لوی اقتصاد په توګه يې ياد تدبیر اعلان کړی دی.
د چين نړیوال وارداتي نندارتون د دغه هېواد د ورخلاصون او هم د نړیوال اقتصاد د ورخلاصون لپاره يو مهم ډګر دی او چيني بازار او نړيوال بازار ته يې د لږ پرمختللو هېوادونو د غوره او ځانګړو توليداتو د ننوتلو لپاره يو ښه پل جوړ کړی دی.
په دغه نندارتون کې د نړۍ ۳۷ هغو هېوادونو هم ګډون کړی، چې د ملګرو ملتونو د لږ پرمختللو هېوادونو په نوملړ کې شامل دي او تصديو او شرکتونو يې خپل توليدات نندارې ته وړاندې کړي دي.
په سږني نندارتون کې د افريقايي تولیداتو ځانګړی نندارځی د تېرو نندارځيونو په پرتله ډېر پراخوالی لري او د قهوې، کونځلو، ممپليو او لوبیا په شمول د افريقا ځانګړي توليدات پکې نندارې ته وړاندې شوي دي.
چين په بېلا بېلو لارو هڅې کوي، چې نړۍ ته عامه تولیدات او خدمتونه برابر او هم خپل بازار له نورو هېوادونو سره شريک کړي، نړیوال اقتصاد په سمسورتيا او خوځښت راوالي او په ګډو همکاريو نړۍ ته ګټې ورسوي.