د چين اووم نړيوال وارداتي نندارتون د نومبر په ۵مې نېټې پېل او په ۱۰مې نېټې پاتی ته ورسېد.
د فرانسې د لوريال د سينګاري توکو شرکت مشر جين پاول اګون رسنيو ته ويلي، چې د چين په اتم نړيوال وارداتي نندارتون کې یې د ګډون لپاره غوښتنليک وړاندې کړی او تمه یې ښودلې، چې په راتلونکي به هم په دغه نندارتون کې ګډون ولري.
د لوريال شرکت په شمول د نړۍ ګڼو شرکتونو د چين په سږني وارداتي نندارتون کې ګډون کړی و او ښې لاسته راوړنې ترې لري او اوس په تمه دي، چې په راتلونکو نندارتونونو کې يې هم برخه واخلي.
شمېرې ښيي، د چين اووم نړيوال وارداتي نندارتون سترې لاسته راوړنې لري او د معاملو ارزښت يې څه پاسه ۸۰ ميليارډو او ۱۰ ميليونو ډالرو ته رسېږي، چې دا د تېرې دورې په پرتله ۲سلنه زياتوالی ښيي.
د چين د وارداتو په سږني نندارتون کې د ۱۲۹ هېوادونو او سيمو ۳۴۹۶ شرکتونو او تصديو خپل توليدات پلور او نندارې ته وړاندې کړي وو او د هغو تصديو شمېر يې د تېر په پرتله ډېر و، چې د نړۍ د ۵۰۰ مخکښو تصديو په درجه بندۍ کې شاملې دي او يا په خپلو چارو کې مخکښ ځای لري.
د نړۍ ۱۸۶ تصديو او ادارو له مسلسلو اوو کالونو راهيسې په دغه نندارتون کې ګډون لري.
په سږني نندارتون کې په لومړي ځل۴۵۰ نوي توليدات، ټکنالوژۍ او خدمتونه نندارې ته وړاندې شوي وو او د سوداګرۍ او پانګونې هڅونه پکې شوې ده.
له دغه نندارتون پرته د چين يو لړ نورې پرانيستي تګلارې هم د هرکلي وړ دي.
چين د نومبر په اتمې نېټې د سلواکيا او ناروې په شمول د نهو هېوادونو وګړيو ته ويزې معاف کړي او د دغو هېوادونو وګړي کولی شي، چې پرته له وېزې چين ته سفر وکړي.
چين څه موده مخکې په صنعتي چارو کې پر بهرنۍ پانګونې محدوديتونه لرې کړي او د لږ پرمختللو هېوادونو پر توکو يې ګمرکي تعرفه هم معاف کړې ده او دغه هېوادونه اوس کولی شي، چې د ډسمبر له لومړۍ نېټې څخه چين ته خپل تولیدات بې له ګمرکي تعرفې ولېږدوي.
د چين د ورخلاصون لړيزې تګلارې ددې ښکارندويي کوي، چې بهرني وګړي به چين ته د سفر له اسانتياوو ګټې واخلي، په دغه هېواد کې به بهرنې پانګونې اسانې او د همکارۍ فضا به یې پراخه شي.
په نړيوال ډګر کې د چين د ورخلاصون هلې ځلې ډېرې ارزښتناکې ثابتې شوې دي.
اوسمهال د نړيوال اقتصاد د پرمختګ ځواک کمزوری شوی، د نړيوال کېدو ضد نظريې، يو اړخيزم او د سوداګرۍ ساتنې غوښتنې سختې او ورخلاصون او فرصتونه پکې کم شوي دي.
د چين د اووم نړيوال وارداتي نندارتون ادارې «د نړۍ د ورخلاصون د ۲۰۲۴م کال راپور» خپور کړی، چې له مخې يې په تېر ۲۰۲۳م کال کې د نړۍ د ورخلاصون شاخص د وړم کال په پرتله ۰.۱۲ سلنه او د ۲۰۰۸ م کال په پرتله ۵ اعشاريه ۴۳سلنه ټيټ شوی او نور هم د ټيټوالي په حال کې دی. برعکس په همدې کال کې د چين د ورخلاصون شاخص د ۲۰۰۸ م کال په پرتله ۱۱ اعشاريه ۸۹ سلنه زيات شوی او د زياتوالي اندازې یې مخکښ نړيوال مقام نيولی دی.
که د يو هېواد دروازه پرانيستل شوه، نو نړيوال تګ راتګ ته به اسانتياوې برابرې شي.
د چين د وارداتو سږني نندارتون کې وړاندې شوي توليدات به د دغه هېواد لوی بازار ته لاره ومومي او ګډونوال شرکتونه به يې په چين کې پانګونې وکړي.
افغان سوداګر علي فيض هر کال د چين نړيوال وارداتي نندارتون کې ګډون کوي او تولیدات یې د هرکلي وړ ګرځېدلي دي.
په دغه نندارتون کې د استراليا د سوداګريزو او تجارتي شرکتونو پيمانه د پخوا په پرتله لويه شوې او د فرانسې لوريال شرکت، د هالنډ فيليپ شرکت او نورو ډېرو بهرنيو شرکتونو په چين کې د زیاتو پانګونو لېوالتيا ښودلې ده.
چين د چين نړيوال وارداتي نندارتون په شمول د لوړې سويې ډګرونه پرانیستي، د بهرنيو وګړيو د تګ لپاره یې اسانې تګلارې جوړې کړي او بهرنيو تصديو ته یې د پرمختګ لا زيات شرايط برابر او د لوی بازار فرصتونه يې ورسره شريک کړي دي.
اوسمهال د ټېکنالوژۍ د نوښت ګامونه چټک شوي دي.
د چين د وارداتو په سږني نندارتون کې د ډايرېدونکو موادو په وسيله جوړ شوي ټايرونه، په طبي چارو کې د علمي نوښتونو درمل او ماشينونه او ډېر عالي توليدات نندارې او پلور ته وړاندې شوي وو.
بهرنيو شرکتونو د چين لوی بازار ته د ساينس او ټېکنالوژۍ ښه محصولات وړاندې کړي او په دغه هېواد کې د نوښت مرکزونه جوړوي او د چين د نوښتي توان له لارې د نويو توليداتو او ټېکنالوژو د څېړنې په هڅه کې دي.
اوسمهال چين نه يوازې د محصولاتو او د توليداتو پر پرانيستي بهیر ټينګار لري، بلکې د ورخلاصون لپاره زياتې تګلارې هم جوړوي، چې د چين نړيوال وارداتي نندارتون او د ويزو لغوه کولو تګلارې يې ښې بېلګې یادولی شو او دا به د چين او نړۍ ترمنځ اقتصادي خوځښت نور هم ګړندی کړي.
د چين د کمونېست ګوند د شلمې دورې مرکزي کمېټې په درېيمې عمومي غونډې کې ویل شوي، چين به د لويې پيمانې بازار په اتکا په نړيوالو همکاريو کې د پرانيستې توان پياوړی کړي، د لا لوړې سويې د پرانيستي شکل اقتصادي نوی ميکانيزم به جوړ کړي او اړوند ميکانيزمونه به ثابت او پراخ کړي.
د چين دغه چارې به د پرانيستي نړيوال اقتصاد لپاره هڅې ګړندۍ کړي او د نړيوال پرمختګ انجن به وګرځي.