ام ټي ان د “زما لپاره ماسک واغونده” کمپاین په پیلولو سره د کرونا ویروس د خپرېدو د مخنیوي په موخه په ټولو هغو هېوادونو کې چې خپل مخابراتي خدمتونه پکې وړاندې کوي په نړیواله کچه له هڅو سره په همهاله توګه د ماسک اغوستلو د اهمیت په اړه عامه پوهاوی ورکوي.
په ټولنه کې د کرونا ویروس په پایله کې رامنځته شویو بدلونونو ته پام سره ماسک اغوستل د کرونا ویروس د خپرېدو د کچې د کمولو په برخه کې خورا اغیزناک ګڼل کیږي. سربېره پر دې هم ځینې خلک ماسک نه اغوندي، یا یې په ناسمه توګه اغوندي او ځینې نورو ته د ماسک اغوستل اړین نه بریښي.
د ام ټي ان ګروپ عمومي رییس ښاغلي رالف موپیتا په دې اړه وویل: ” کرونا ویروس په ټوله نړۍ باندې ژورې روغتیايي، ټولنیزې او اقتصادي اغیزې کړې دي. موږ له هغو خلکو سره خپل د خواشینۍ او ډاډګیرنې مراتب شریکوو چې د دې وبا له امله یې د خپلې کورنۍ غړي له لاسه ورکړي دي. په داسې حال کې چې په افریقا لویه وچه کې د ویروس د خپرېدو کچه کمه شوې ده، خو بیا هم دا حالت د قناعت وړ نه دی.”
ښاغلی موپیتا وایي: “شواهد ښیي چې د ماسک اغوستل د ویروس د خپرېدو کچه را کموي او که چېرې له 80-90 سلنه پورې وګړي ماسک واغوندي نو ویروس به له مینځه ولاړ شي، موږ باید د مثبت بدلون د رامنځته کولو لپاره هر هغه څه مو چې په توان کې وي ترسره کړو.”
د ماسک اغوستلو د فرهنګ د دودولو په موخه ام ټي ان خپل د ۲۰۲۰م کال د سپټمبر میاشتې د بازار موندنې ټولې سرچینې په دې متمرکزې کړې دي، تر څو هر وګړی وهڅوي چې د ژوند ژغورلو لپاره ډېر څه ترسره کړي. د “زما لپاره ماسک واغونده” کمپاین د ام ټي ان د یلو هېلې (Y’ello Hope) د نوښت تر چتر لاندې د کرونا ویروس پر وړاندې د مبارزې دوهم پړاو دی. د یوې چارې ترسره کولو ته د خلکو د رابللو تر ټولو غوره لار دا ده چې د مور په څیر د ټولنې د اغیزناکو شخصیتونو په ژبه دوی ته پیغام ورسول شي، د مور کرکټر به د ټولنې ټولو ماشومانو ته د یوه په زړه پورې پیغام له لارې د ماسک اغوستلو #”زما لپاره ماسک واغونده” سپارښتنه وکړي.
“زما لپاره ماسک واغونده” کمپاین چې د یلو هیلې (Y’ello Hope) د نوښت تر چتر لاندې ترسره کیږي په پایله کې به یې د خلکو د ژوند د ژغورلو سربېره د وبا د ناوړه اغیزو کچه هم را کمه شي. د دې کمپاین په لړ کې ام ټي ان په هغو هېوادونو کې چې خپل مخابراتي خدمتونه پکې وړاندې کوي د ټولنې اړتیا ته په پام سره مرستې ترسره کړې دي.
ښاغلي موپیتا د خپلو خبرو په پایله کې وویل: “د ویروس د خپرېدو د کچې د کمولو لپاره د ماسک اغوستلو سربېره په منظم ډول د لاسونو مینځل او د ټولنیز واټن مراعات کول هم ډېر اړین دي.”
“زما لپاره ماسک واغونده” کمپاین د سپټمبر میاشتې په لومړۍ نېټه پيل شوی دی. www.wearitfor.me ویب سایټ ته په مراجعه کولو سره هر چا ته پیغام واستوئ او ویې هڅوئ چې ښه کار ترسره کړي. #”زما لپاره ماسک واغونده” کله چې موږ ټول ماسک واغوندو نو یو له بل څخه ساتنه کوو.
د ام ټي ان ګروپ په اړه:
ام ټي ان ګروپ په 1994م کال کې په کار پیل وکړ، د مخکښې مخابراتي شبکې په توګه یې په هغو هېوادونو کې چې مخابراتي خدمتونه پکې وړاندې کوي، خپل پیرودونکي د روښانه لیدلوري په لرلو سره له دیجیټل نړۍ سره نښلولي دي. موږ باور لرو چې هر څوک د ډیجیټل نړۍ له اسانتیاوو څخه د ګټې اخیستلو حق لري. ام ټي ان ګروپ د سویلي افریقا د ونډو په بازار کې د “MTN” په ګډ کوډ سره ثبت دی. موږ د خپلې BRIGHT ستراتیژۍ له مخې ډېر تمرکز د انټرنټ او ډیجیټل سوداګرۍ پر وده کوو.
د یلو هیلې (Y’ello Hope) په اړه:
موږ د خلکو په ژوند کې د مثبت بدلون رامنځته کولو په موخه خپل مسوولیت درک کړی دی. د یلو هیلې (Y’ello Hope) نوښت د کرونا ویروس سره د مبارزې په برخه کې د ام ټي ان یو له مهمو ګامونو څخه ګڼل کیږي چې د برنډ، سرچینو، وړتیاوو او ټکنالوژۍ په مرسته غواړي په افریقا او منځني ختیځ کې د خلکو په ژوند کې مثبت بدلون رامنځته کړي.
د یلو هېلې (Y’ello Hope) نوښت موخه دا ده چې د اړتیا په صورت کې ام ټي ان د خپل فعالیت په سیمو کې له کارکوونکو، پیرودونکو، ټولنې او دولت څخه ملاتړ وکړي او هغوی ته سوکالي او په راتلونکي باور رامنځته کړي.
د لا زیاتو معلوماتو لپاره زموږ سره په اړیکه کې شئ:
د ام ټي ان ګروپ مطبوعاتي دفتر MTNGroup.PressOffice@mtn.com
Nompilo Morafo | Nompilo.morafo@mtn.com
موږ وڅارئ: