د چين دولت رئيس شي جين پينګ د نومبر په شلمې نېټې له برازيل څخه درې ورځنۍ ليدنه کړې او نړيوالو عامه افکارو ورته لوړه پاملرنه کړې ده. چين او برازيل د نړۍ په ختيځ او لوېديځ کې دوه لوی پرمختيايي هېوادونه دي او د خپلمنځي اړيکو د پورته کولو پرېکړه يې کړې ده.
روان کال د دغو دواړو هېوادونو د سياسي اړيکو د جوړېدو له پنځوسمې کليزې سره برابر دی. د چين دولت رئیس شي جين پينګ او د برازيل ولسمشر لولا دا سیلوا د دواړو هېوادونو د اړيکو پر پرمختګ خبرې کړي او نوې ستراتيژيکه اجماع يې رامنځته کړې ده.
دواړو سیالانو پرېکړه کړې، چې د چين او برازيل د ګډ برخليک ټولنې پر بنسټ به د دوه اړخيزو اړيکو مقام لوړوي او د عادلانه نړۍ او د دواملرونکي پرمختګ لپاره به ګډې هڅې کوي او دغه راز د کمربند او لارې د ګډې ابادۍ وړانديز او د برازيل د پرمختګ ستراتيژي به سره پيوست کړي.
شنونکي د چين او برازيل د اړيکو لوړتيا د دوه اړخيزو اړيکو نوی پيل بولي او پر دې اند دي، چې دواړه هېوادونه د راتلونکي پرمختګ په اړه ګډې هيلې لري او غواړي د انسانانو د راتلونکي مسئوليت هم پرغاړه واخلي، چې له دې څخه د دواړو هېوادونو د اړيکو نړيوال، ستراتيژيکي او دايمي اهميت ښکاري.
اوسمهال نړيوال حالات په چټکۍ بدلون مومي او نوې ننګونې او بدلونونه پکې پر له پسې رامنځته کېږي او دغه راز د نړۍ په سراسري جنوب کې پرمختيايي هېوادونه د خپل پرمختګ په لټه دي.
چين او برازيل دواړه مهم ځواکونه دي او اقتصادي پرمختګ او د خلکو د ژوند ښه والی خپل مهم هدفونه بولي. دغه دواړه هېوادونه به د خپلمنځي اړيکو د لوړېدو په نوي پيل کې د راتلونکو پنځوسو کالونو کوم ډول نقشه وپنځوي؟
چين او برازيل به ګډ برخليک او ګډې دندې ولري، ګډ پرمختګ به ومومي او د ننګونو پر وړاندې به يو ځای مقابلې وکړي.
د چين دولت رئيس شي جين پينګ د چين او برازيل د راتلونکو اړيکو په هکله څلور وړانديزونه کړي، چې له مخې به يې دواړه هېوادونه پر متقابل ستراتيژيکي اطمينان ټينګار ولري، د پرمختګ ستراتيژۍ به سره ونښلوي او نړیواله سوله او عدالت به وساتي او په ګډې همکارۍ به د انسانانو د ګډ برخليک ټولنه جوړه کړي.
شي جين پينګ په دغو وړانديزونو د دواړو هېوادونو د ګډ برخليګ ټولنې د جوړولو لوری روښانه کړی دی. د برازيل ولسمشر لويز اناسيو لولا دا سيلوا ويلي، چې شي جين پينګ له برازيل څخه د ليدنې په درشل کې د دواړو هېوادونو د اړيکو نوې پاڼه پرانيستلي ده.
پرمختګ د ټولو مسئلو د حل کيلي او هم د پرمختيايي هېوادونو هيله ده.
په وروستيو کلونو کې د برازيل زرګونو کورونو ته پاکه انرژي برابره شوې، نوې نظريې او ټېکنالوژۍ یې په کرنيزو چارو کې استفاده شوې دي.
چين او برازیل د نوي پرمختګ په برخو کې همکارۍ کړي، د پرمختګ ستراتيژۍ يې سره نښلولي او برازیل ته یې سترې اقتصادي او ټولنيزې ګټې رسولي او د پانګونې فرصتونه يې ورته برابر کړي دي.
دواړو مشرانو پر خپلمنځي واقعي همکاريو نورې ژورې تبادلې هم کړې دي.
شنونکي د چين او برازيل د مشرانو د اوسنۍ لېدنې بله مهمه لاسته راوړنه دا بولي، چې د چين د کمربند او لارې د ګډې ابادۍ له وړانديز سره د برازیل د يو لړ ملي پلانونو د پيوستون سندونه لاسليک شوي، چې دا به د دواړو هېوادونو د همکاريو کيفيت لوړتيا او د عصري کېدو بهير چټکتيا وهڅوي او د چين او لاتيني امريکا ترمنځ به د هراړخيزو همکاريو سويه لوړه کړي.
د چين او برازيل اړيکې له دوه اړخيز چوکاټ څخه پورته شوي او د نړيوالې ادارې د بشپړتيا لپاره رغنده رول لوبوي
دا ځل چين او برازيل په يوه خوله ويلي، چې د ملګرو ملتونو، شل جي او برېکس په شمول څو اړخيزو ميکانيزمونو کې به همکارۍ پراخې کړي او د لوږې او بېوزليتوب د کمولو، د سيمه ايزو نښتو، د اقليمي بدلون، د انټرنېټ د خونديتوب په شمول عنعنوي او غير عنعنوي برخو کې به د امنيتي ننګونو پر وړاندې مقابله وکړي.
خلک باور لري، چې چين او برازيل يو بل ته نږدې شوي او دواړه هېوادونه به د نړۍ په سراسري جنوب کې د پرمختيايي هېوادونو ګډې ګټې خوندي وساتي او د نړۍ د سولې او پرمختګ د ساتلو قوت به نور هم پياوړی کړي.