له اوږده ځنډ وروسته پرون په دوحه کې بین الافغاني خبرې پیل شوې. ټاکل شوې د خبرو دا لومړی پړاو به څو ورځې دوام وکړي. دواړه اړخونه وايي چې سولې ته اراده لري او غواړي د افغانستان ستونزه د خبرو له لارې حل کړي. پر دواړو اړخونو نړیوال فشارونه هم شته چې انعطاف وښيي او د افغانستان جګړه د سولې له لارې ختمه کړي. پرون په دغو مراسمو کې د امریکا او ډېرو هېوادونو د بهرنیو چارو وزیرانو او استازو په ټینګار سره له دواړو اړخونو وغوښتل چې له شته چانس څخه استفاده وکړي او د سولې خبرې بریالۍ کړي.
دا روښانه ده چې خبرې به سختې او پېچلې وي او ډېر وخت به واخلي، خو مهمه دا ده چې خبرې دوام وکړي او پرمختګونه پکې وشي، که څه هم دا پرمختګونه واړه وي. د دواړو اړخونو ترمنځ د اختلاف لوی ټکي شته، واټن زیات دی او دواړه اړخونه له بهرني فشار پرته کم انعطاف هم کوي، نو ځکه به دا سختې خبرې وي. پکار ده چې دواړه اړخونه پیل له ساده او هغو ټکو وکړي چې اختلاف پکې کم دی. د دواړو اړخونو تر منځ داسې ټکي شته چې په اسانۍ پرې توافق کېدلی شي. د دې تر څنګ د غوښتنو مطرح کول او منل باید یو اړخیز نه وي، پکار ده چې دواړه لوري ومني چې که یو څه تر لاسه کوي، نو یو څه به له لاسه ورکوي او همدا د خبرو او جوجاړي ځانګړنه ده.
د افغانستان خلک تمه لري چې تر هر څه وړاندې پر اوربند توافق وشي او حکومت هم له وړاندې دا غوښتنه کړې ده. طالبان هم مني چې پر اوربند به خبرې کوي، خو دا چې ژر به یې مني او که نه، په دې اړه څه نه وايي. دا ښکاره ده چې طالبان به په اسانۍ اوربند ونه مني، ځکه چې جګړه طالبانو ته د فشار او نورو چارو لپاره مهمه ده، خو که طالبان اوربند مني، نو له حکومت به هم غوښتنې ولري. طالبان غواړي زرګونه نور بندیان یې خوشې شي. اوس پکار ده چې طالبان اوربند ومني او حکومت یې په بدل کې د یو پلان پر اساس د طالبانو بندیان خوشې کړي. دا چاره به له یوه اړخه د افغانستان د خلکو ستره هیله چې د جګړې بندېدل دي، پوره کړي او له بل اړخه به زرګونه بندیان له خپلو کورنیو سره یو ځای شي. د دې تر څنګ د جګړې درول او د بندیانو خوشې کول به حسن نیت، پر یو بل باور او سوله ییزه فضا لا پیاوړي کړي او په دې سره به په نورو برخو کې هم پرمختګ ته لاره پرانیزي.
د خبرو پیل د سولې په لاره کې د بریا لپاره یو ستر ګام و، خو د اساسي بریا لپاره پکار ده چې دا خبرې همداسې روانې وساتل شي، پرمختګونه پکې وشي، دواړه لوري پکې انعطاف وښيي، له خپله اړخه قرباني ورکړي او د سولې لپاره له هر ډول توندو څرګندونو او ناسمو کړنو څخه ځان وساتي. له دې سره هممهاله پر دواړو اړخونو یو ولسي فشار هم پکار دی چې روانې خبرې بریالۍ کړي او دا جګړه نوره ختمه شي.