افغانستان د تاریخي او کلتوري میراثونو یوه بډایه خزانه ده چې نړۍ ته د معرفي کولو او د نړیوال سیاحت د ودې لپاره بېساری ظرفیت لري. دغه لرغوني میراثونه نه یوازې د دې هېواد د زرګونو کلونو تمدن او تاریخ نښه ده، بلکې د نړۍ لپاره یو ارزښتناک انساني میراث هم ګڼل کېږي. له بده مرغه، په تېرو کلونو کې د جګړو او بېثباتۍ له امله د افغانستان ډېر تاریخي ځایونه زیانمن شوي او یا نړیوال تور بازار ته قاچاق شوي وو.
د افغانستان تاریخي ځایونه لکه د بامیانو بودا مجسمې، د هرات لرغونی ښار،د کندهار تاریخي ښار، د غزني تاریخي برجونه، او د بلخ لرغوني آثار د نړۍ په کچه ځانګړی ارزښت لري. دا تاریخي ځایونه د نړیوالو سیلانیانو لپاره یو بېساری زړه راښکونکی فرصت دی چې افغانستان ته د راتګ لیوالتیا ډیروي .
په دې برخه کې د افغان سرپرست حکومت مسؤلیت دی چې د دې تاریخي ځایونو د ساتنې، رغونې او نړیوالو ته د معرفي کولو لپاره یو هر اړخیز پلان جوړ کړي. د تاریخي ځایونو د ساتنې لپاره باید مشخصې بودیجې وټاکل شي، تخنیکي ټیمونه وروزل شي او د نړیوالو مرستندویو موسسو ملاتړ هم راجلب شي.
له دې سره، د افغانستان په اوسنۍ امن فضا کې د خصوصي سکتور لپاره یو ستر فرصت دی چې د سیاحت په برخه کې پانګونه وکړي. افغان سرپرست حکومت باید د خصوصي سکتور د پیاوړتیا لپاره ځانګړي اقدامات وکړي، د سیاحتي شرکتونو د رامنځته کولو او پراختیا لپاره اسانتیاوې برابرې کړي او د دوی د ملاتړ لپاره لازم قوانین تصویب کړي.
د سیاحتي شرکتونو ډېرېدل به نه یوازې د هیواد اقتصاد ته وده ورکړي، بلکې د کار موندنې نوې زمینې به هم رامنځته کړي. د نړیوالو سیلانیانو د جذب لپاره د نړيوالو معیارونو پر بنسټ د هوټلونو، سیاحتي خدمتونو او لارښوونکو روزل هم باید د لومړیتوبونو په سر کې وي. د دې ترڅنګ د سیاحتي سیمو د خوندیتوب او پاکوالي لپاره باید منظمې برنامې جوړې شي.
افغانستان باید د نړۍ په کچه د یو سیاحتي هدف په توګه په منظمه توګه معرفي شي. د بهرنیو ګرځندویانو د جذب لپاره د انټرنیټي کمپاینونو، نړیوالو نندارتونونو او رسنیزو کمپاینونو پیل کول اړین دي. د نړۍ له مخکښو سیاحتي شرکتونو سره همکاري کولی شي د سیاحت لپاره نوې دروازې پرانیزي.
د کلتوري میراثونو د خوندي کولو او نړیوال سیاحت ته د افغانستان د معرفي کولو لپاره یو منظم او هر اړخیز پلان جوړول، د افغان سرپرست حکومت، خصوصي سکتور، او نړیوالو موسسو ګډو هڅو ته اړتیا لري. د دې کار ترسره کول به نه یوازې د افغانستان کلتوري شتمنۍ وژغوري، بلکې د اقتصادي پراختیا، د نوو دندو رامنځته کېدو او د هیواد د نړیوال اعتبار لوړولو لپاره به هم ګټور تمام شي. افغانستان د یوې با ثباته راتلونکې په لور د پرمختګ لپاره دغه ستر فرصت له لاسه نشي ورکولی.
د سیاحت د پراختیا تر څنګ، د سیمهییزو کلتوري جشنونو، هنري نندارتونونو او فرهنګي پروګرامونو جوړول به د افغانستان کلتوري ژوند ته نوی روح ورکړي. دا پروګرامونه به نه یوازې د سیلانیانو لپاره زړه راښکونکي وي، بلکې د هیواد دننه د کلتور د ودې او ملي یووالي لپاره به هم مهم رول ولري.
د افغانستان کلتوري میراثونه؛ د اقتصادي ودې او نړیوال سیاحت لپاره نه ختمېدونکی فرصت
