په دوحه کې د دواړو اړخونو د پلاوو ترمنځ د تماس ګډ کمېسیون جوړ شوی، خو لا هم د خبرو لپاره پر اجنډا توافق نه دی شوی. د اجنډا تر ټاکل کېدو وروسته به رسمي او مخامخ خبرې کېږي. له وړاندې د دواړو اړخونو له خوا د اجنډا په اړه متفاوتې څرګندونې شوې وې. د حکومت لپاره دا مهمه ده چې طالبان اوربند ومني، خو طالبان بیا هڅه کوي چې د نظام څرنګوالی او د پاتې طالب بندیانو خوشې کول د خبرو په اجنډا کې شامل کړي.
دواړه اړخونه به هڅه وکړي چې خپلې غوښتنې د اجنډا برخه کړي او د بل لوري غوښتنې له اجنډا وغورځوي. له همدې امله ښايي ستونزې هم رامنځ ته شي. دا سمه ده چې هر لوری باید خپلې غوښتنې د اجنډا برخه کړي، خو باید ومني چې د بل لوري غوښتنې هم باید د اجنډا برخه شي. دا چې دا غوښتنې بیا معقولې دي او که نه، منل کېږي او که نه او یا هم کوم درېیم حل ورته پیدا کېږي، دا به بیا په بین الافغاني خبرو کې معلومیږي. د اوس لپاره دا هڅه سمه نه ده چې د بل لوري خبرې او غوښتنې له اجنډا و ایستل شي. اوس باید هره غوښتنه اجنډا ته شامله شي او بحث پرې وشي. یوازې اسلام او د افغانستان سترې ګټې هغه څه دي چې پر منلو او نه منلو یې بحث نه شي کېدای، له دې پرته پر هر څه باید بحث وشي. د نظام ډول، جمهوریت، امارت، اوربند، بندیان، موقت حکومت، د امنیتي ځواکونو برخلیک، د طالب جنګیالو برخلیک او ټولې هغه چارې چې په اړه یې متفاوت دریځونه شته، باید د خبرو د اجنډا برخه شي او بحث پرې وشي.
له بحث څخه د موضوعاتو ایستل نه یوازې اوس پر اجنډا د توافق په برخه کې ستونزې جوړوي، بلکې په راتلونکي کې هم د ستونزو سبب کېدلی شي. اوس د سرو کرښو وخت تېر دی، په هر څه باید واضح او روښانه بحث وشي او توافقي پایلې تر لاسه شي. که پر ځینو مسایلو توافق ستونزمن او یا ناشونی وي، پکار ده چې ولس ته مراجعه وشي. د دې تر څنګ د نظام په شان لوی مسایل هم باید د ولس ارادې ته پرېښودل شي. د نظام په اړه د طالبانو او حکومت غوښتنې یا د نظام څرنګوالی باید ټولپوښتنې ته وړاندې شي او په دې اړه به وروستۍ پرېکړه خلک کوي. له همدې امله په هر څه باید بحث وشي، خو په ځینو مسایلو کې وروستۍ پرېکړه باید ولس ته پرېښودل شي.
د ولس هیله ده چې دواړه اړخونه پر اجنډا هم ژر توافق وکړي، ځیني پرمختګونه وشي. دا هم نه هېرېږي چې ښايي ځیني جدي ستونزې هم رامنځ ته شي. دواړه اړخونه مجبور دي چې دا ستونزې هم د خبرو له لارې حل کړي، دوی به په دې چاره کې د امریکا او بل بهرني فشار سره هم مخ کېږي، خو دوی باید د بهرني فشار پر ځای د ولس غوښتنو ته لومړیتوب ورکړي او ټولې ستونزې پخپله حل کړي.