د چين دولت رئيس شي جين پينګ څو ورځې دمخه د چين ميډيا ګروپ او انټرنېټ له لارې د ۲۰۲۵م کال په مناسبت د مبارکۍ وينا وکړه، چې د چين د مشر پاملرنه ترې احساسېږي او د چيني اقتصاد د باکيفيته پرمختګ او په ۲۰۲۵ کال کې پر پېشرفت د نوموړي د باور ښکارندويي کوي.
د چين دولت رئیس شي جين پينګ له تېرو ۱۲ کلونو راهيسې د نوي کال په مناسبت ويناوې خپروي، د تېر کال ملي لاسته راوړنو ته پکې کتنه کوي او د نوي کال پرمختيايي پلانونه پکې بيانوي.
په انټرنېټ کې د شي جين پينګ د سږنۍ وينا څو جملې ډېرې ښکته پورته کېږي: د خلکو نيکمرغه ژوند زمونږ لومړنۍ دنده. که څه هم ارمانونه ليرې ښکاري، خو امکان یې شته، چې په کوښښونو یې پوره کړو. هر څوک د چيني شکله عصريتوب د ترسره کېدو په بهير کې رول لوبولی شي. مونږ په سختۍ کې پرمختګونه موندلي او ځواکمن شوي یو او هر يو دې باور ولري.
شي جين پينګ ته د خلکو نيکمرغه ژوند لومړيتوب لري. نوموړی په تېر ۲۰۲۴م کال کې د چين د لسګونو ولايتونو کليوالو سيمو او ښارګوټو ته تللی، له نژدې يې د خلکو ژوند کتلی او د خلکو عايدات، د زړو او کوچنيو ساتنه، ښوونه او روغتيا چې د خلکو پاملرنه هم همدغو ټکو ته ده، د ده په زړه دي او بيا بیا یې ويلي، چې په ګډو هڅو به د خلکو ټولې ستونزې ليرې کوي.
د چينايانو په ژبه کور کوچنی هېواد دی، او هېواد د ټولو کور دی. د چين کمونېست ګوند د ۲۰مې مرکزي کمېټې په ۳مې عمومي غونډې کې د اصلاحاتو څه باندې ۳۰۰ مهم اقدامات وړاندې شوي، چې په هر يوه کې يې باکيفيته پرمختګ او د ولسي خلکو تر ټولو جدي اندېښنې او پاملرنې انعکاس شوې دي. د چين دولت رئيس شي جين پينګ د نوي کال په مناسبت خپلې وينا کې ژمنه کړې، چې د خلکو امنيت او ژوند به یې تل په زړه کې وي.
له يادې وينا څخه له خوځنده ځواکونو ډک چين کتلای شو. د مثال په توګه، د چين حکومت د مختلفو سيمو له ځانګړتياوو سره سم د نوي کيفيت توليدي ځواکونه روزلي او نوې صنعتي چارې او توليدي موډلونه يې يو په بل پسې رامنځته کړي، د نوې انرژۍ موټرونو توليدي اندازه يې په لومړي ځل له ۱۰ میليونو عرادو نه زياته شوې او د سرکټونو، مصنوعي ځيرکتيا او کوانټوم مخابراتو په شمول ځینو برخو کې یې نوې لاسته راوړنې راڅرګندې شوې دي. د شي جين پينګ د نوي کال وينا کې يادې شوې لاسته راوړنې په نړۍ کې هم تر سترګو کېږي. چين په ځينو ساحو، چې د ساري په توګه یې د نوې انرژۍ موټر یادولی شو، د نړۍ مخکښ ځای خپل کړی او اوس د نړۍ د ټيټ کاربن ايستنې او زرغون چارو لارښوونه کوي.
د چين حکومت په تېر کال کې د اغېزمنو لړيزو تګلارو په پلې کولو سره باکيفيته پرمختګ موندلی، په اقتصادي چارو کې یې ښه والی راغلی او د کورني توليد عمومي ارزښت يې له ۱۳۰ ټريليونو يوانو اوښتی دی. شي جين پينګ د يادو لاسته راوړنو د ستاينې تر څنګ د چيني اقتصاد پر وړاندې نوی حالت هم په ګوته کړی، لکه د نړيوال حالت بې ثباتي، له پخواني نه د اقتصاد نوی خوځنده ځواک پيدا کول او ځينې نور یې يادولی شو او ويلي يې دي، چې دا ټولې ستونزې په نه ستومانه کېدونکو کوښښونو لېرې کېدای شي.
چين په تېر کال کې، که څه هم رنګا رنګ حالات او نوې ننګونې پکې موجودې وې، پرمختيايي ګامونه پورته کړي او د اقتصادي پرمختګ خوځنده ځواکونه يې پر له پسې رامنځته کړي دي. نو چينايان ياد حالت ته کتو، د خپل هېواد پر پرمختګ پوره باور لري.
شي جين پينګ د نړۍ د سختو بدلونونو په اړه په اشارې ويلي، چې د شخړو پای ته رسېدل ټولشموليت ته اړتيا لري او په خبره یې، چين به له نورو هېوادونو سره دوستانه همکارۍ وکړي، يو له بل څخه به غوره تمدنونه زده کړي، د انسانانو د ګډ برخليک ټولنه به په ګډه اباده کړي او د نړۍ لا ښکلې راتلونکې به پرانيزي.