په متحدو ايالتونو کې د ټيک ټاک د بنديدو تر ګواښونو وروسته د خواله رسنيو د چينايي اپ شياوهونګشو د بهرنيو کارنو په شمېر کې د يو دمي ډيرښت له کبله د ټيک ټاک د کډوالو اصطلاح عامه شوې ده. يوه بديل اپ ته د ګڼ شمېر کارنو مخې کولو د عوامو د علايقو او حکومتي پاليسيو تر منځ پراخ واټن را برسېره کړ. دا چې شياوهونګشو د دوشنبې په ورځ د اپل سټور د تر ټولو غوره اپ مقام ته ورسېد، نو دا ثابته شوه چې عام خلک د ټيک ټاک د په نښه کولو په برخه کې د حکومت پر سياست راضي نه دي.
پر ټيک ټاک د بنديزونو لګول د ملي امنيت له مسئلې سره تړل کيږي. د متحدو ايالتونو چارواکي په دوامداره توګه ادعا کوي چې ټيک ټاک د چينايي کمپنۍ بايټ ډانس ملکيت دی او د خصوصي معلوماتو د خونديتابه او بهرنۍ لاسوهنې د اندېښنو له کبله د دوی ملي امنيت ته ګواښ پېښوي.
په ورته مهال، يادو اندېښنو ته د عوامو بې اعتنايي او شياوهونګشو ته د هغوی لېوالتيا د متحدو ايالتونو ادعا کمزورې کوي. ځينو کسانو خو د امريکايي اپونو لکه د ميتا ملکيت فېسبوک پر ځای چيني اپونو ته مخه کړې ده. مشخصو امريکايي بلاګرو له خپلو څارونکو غوښتي چې د شياوهونګشو کارول پيل کړي څو په دې توګه له خپل حکومت او میتا څخه نارضايتي څرګنده کړي. ځينو خو یې لا د يوې اونۍ لپاره د ميتا اړوند خواله رسنيو څخه اعتراضي پرېکون هم اعلان کړی دی.
د پخواني ټويټر يا اوسني اېکس يوه کارن ابي ليکلي چې زرګونو کسانو د متحدو ايالتونو له حکومت سره د مخالفت څرګندولو په موخه د شياوهونګشو کارونه پيل کړې او متوجه شوي چې له ميليونونو چيني وګړو سره په تعامل کې دي. دا چاره په تصادفي ډول د متحدو ايالتونو د لسيزو پروپاګنډا خنثی کوي.
د شياوهونګشو په څېر پلټفارمونو په ودې سره چې خاصې ځانګړتياوې لري او د لوړ کيفيت لرونکې بصري محتوا، مجلل توکي او د ژوند بڼې انګېزې وړاندې کوي، نو کارن یې له شک پرته د ښه بديل په نظر ورته ګوري.
ګڼ عوامل د حکومت او عوامو د نظرياتو تر منځ د واټڼ د ډيريدو سبب شوي دي. لومړی خو د ټيک ټاک له لوري د متحدو ايالتونو ملي امنيت ته د ورپېښو ګواښونو د شتون په اړه د پخو ثبوتونو نشتون د دې سبب شوي چې حکومت په دې برخه کې د عوامو په قانع کولو کې پاتې راشي. په داسې حال کې چې د معلوماتو د خونديتابه په تړاو شته اندېښنې پر ځای دي، خو متحدو ايالتونو دا نه ده روښانه کړې چې د ټيک ټاک د معلوماتو رويه دغه هېواد ته څه ډول خاص ګواښ دی.
پر دې سربېره، د ټيک ټاک د بنديدو منفي پايلې ښايي خلک د ملي امنيت په تړاو د شته اندېښنو په پرتله ډير زيانمن کړي. ګڼ شمېر کارن ټيک ټاک د بوختيا، ټولنيزو اړيکو او ان کاروباري موخو لپاره کاروي. بنديز به دوی له دې ګټو خلاص کړي چې ورسره به یې پر ورځني ژوند هم اغېز پرېوځي.
پر دې سربېره، د ټيک ټاک د بندولو مسئله ښايي د بيان پر ازادۍ تېری وګڼل شي. د يوه مشخص پلټفارم پر په نښه کولو سره حکومت معلوماتو او ايډياوو ته د عوامو لاسرسی محدودوي.
دغه راز خلک ښايي د حکومت پر اراده شکمن شي چې ګنې اقتصادي او سياسي مسايل پر ټيک ټاک د بنديزونو اصلي انګيزه او د ملي امنيت اندېښنه یې پلمه وي. پر ټيک ټاک د بنديز لګول د چين او متحدو ايالتونو تر منځ له سوداګريزې جګړې سره هممهاله دي چې دې چارې شکونه لا ډير کړي دي.
د ټيک ټاک د کډوالۍ پديده د ټکنالوژۍ، سياست او عامه افکارو تر منځ يو پېچلی تعامل را برسېره کوي. سره له دې چې حکومتونه د ملي امنيت د خونديتابه مسووليت لري، بايد پر فردي ازاديو او پراخ اقتصاد د خپلو اقداماتو باالقوه اغیزو ته هم متوجه وي.
د حکومت او عوامو تر منځ د واټن د کمولو لپاره بايد چارواکي د خپلو ادعاوو د اثبات لپاره څرګند شواهد وړاندې کړي، له عوامو سره په ازادو بحثونو کې ګډون وکړي او په دقت سره د خپلو سیاستونو عواقب وسنجوي.
بالاخره، د ټيک ټاک برخليک او د ټکنالوژۍ د مقرراتو پراخه موضوع د انټرنېټ پر راتلونکې او د حکومتونو او عوامو پر اړيکو پراخ اغېز لري. دا چې ډيجيټل ليدلوری د تکامل په حال کې دی، سياستوال بايد د ملي امنيت اړوند اندېښنې د عوامو د فردي ازاديو د خونديتابه له اړتيا او د نوښتونو له هڅونې سره متوازنې کړي.