په چين کې د بريتانیې او جرمني سوداګريزو ټولنو په دې ورستيو کې دوه څېړنيز راپورونه خپاره کړي، چې له مخې يې ۷۶ سلنه بريتانوي تصدۍ پلان لري په دغه هېواد کې خپلې پانګونې وساتي او نورې يې هم زياتې کړي او ۹۲ سلنه جرمني تصدۍ غواړي، چې په چين کې خپلو چارو ته دوام ورکړي او څه باندې نيمه برخه يې بیا پلان لري، چې په راتلونکو دوو کلونو کې خپلې پانګونې نورې هم ډېرې کړي. سربېره پردې د اېچ اېس بي سي(HSBC) بانک په شمول څو بهرنيو سازمانونو په ۲۰۲۵م کال کې پر چيني بازار باور ښودلی دی او په ورته وخت کې، نړيوال بانک او پيسو نړيوال صندوق هم د چين د روان کال د اقتصاد د پرمختګ وړاندوينه لوړه کړې ده.
دلته ښايي دا پوښتنه راپورته شي، چې نړيوال اقتصادي پرمختګ کمزوری او ورو روان دی، نو په داسې حال کې يادې تصدۍ او شرکتونه او نړيوال ارګانونه ولې د چين پر پرمختګ باور ښيي او ورته خوشبين دي؟
د پيسو نړيوال صندوق د لومړۍ کچې اقتصادپوه پيري اليوير ګورينچاس رسنيو ته ويلي، چې د چين د تېر کال اقتصادي پرمختګ د دغه سازمان له اټکل څخه پورته و او ټول یې حیران کړي دي. تېر کال د چين د اقتصاد پرمختيايي انډول په سلو کې پنځه و، چې د نړۍ په عمده اقتصادونو کې يې مخکښ ځای نيولی او د کورني توليد عمومي ارزښت يې په لومړي ځل له ۱۳۰ ټريليون يوانو څخه پورته تللی دی.
د چین د کورني تولید عمومي ارزښت په تېرو څو کلونو کې پرله پسې زياتوالی موندلی او دغه ټکي يې هم د پیسو نړيوال سازمان ياد کارپوه حیران کړی دی. باور دا دی، چې چين به د نړيوال اقتصادي پرمختګ لپاره لا زيات خدمتونه وکړي.
د پيسو نړيوال سازمان يوه څېړنه ښيي، د چین اقتصادي پرمختګ د نړۍ پر نورو سيمو مثبته اغيزه کړې ده. څېړنه وايي، کله چې د چين د اقتصاد پرمختیايي انډول په سلو کې يو زياتېږي، نو د نورو اقتصادونو توليدي سويه په منځنۍ توګه په سلو کې صفر اعشاريه درې لوړېږي.
بلومبورګ خبري اژانس د پيسو نړيوال صندوق د اټکل له مخې ويلي، چې چين به له روان کال څخه تر ۲۰۲۸م کاله پورې د نړيوال پرمختګ تر ټولو لوی خدمتي هېواد وي او د نړۍ د جي ډي پي(GDP) په عمومي پرمختیايي اندازې کې به یې برخه په سلو کې ۲۲ اعشاريه ۶ ته ورسېږي. د چين په حياتي ځواک لرونکي اقتصاد کې د نړيوالې اقتصادي سمسورتيا هيلې منعکس شوې دي.
چين د نړۍ په صنعتي او ارزښناکو ځنځيرونو کې مهم رول لوبوي او د ملګرو ملتونو د صنايعو د طبقه بندۍ له منسوجاتو، کورنيو ماشينونو، موټرو، بېړيو…. او ان تر صنعتي روبوټونو پورې ټول صنعتي ډولونه لري او د څه باندې ۲۲۰ صنعتي توليدي اندازې یې په نړۍ کې لومړی مقام نيولی دی او د دې ترڅنګ چين د ګړنديو اورګاډيو او سړکونو تر ټولو لويې شبکې او نړيوال بندرونه لري. سربېره پر دې په چين کې هره ورځ څه باندې اتيا زره موټرونه توليدېږي او څه باندې ۳۵ ميليارډه یوانه محصولات یې په انلاين دوکانونو کې پلورل او څه نا څه درې سوه ميليونه بسته بندۍ يې په کوردننه لېږدول کېږي.
د چین د تدارکاتي ځنځيرونو دويم نړيوال نندارتون د تېر کال په پای کې ترسره شو، چې د نړۍ ګڼو تصديو پکې برخه اخيستې وه. د اېپل شرکت عمومي مدير تيم کوک، چې په لومړي ځل يې په دغه نندارتون کې ګډون کړی و، رسنيو ته ويلي، که د چين همکاري ورسره نه وای، نو شرکت به مو اوسنۍ لاسته راوړنې نه درلودې.
د چین بهرني سوداګري ټولشموله بلل کېږي.
ملګري ملتونه وايي، چين تېر کال له نژدې ټولو هېوادونو او سيمو سره صادراتي او وارداتي تګ راتګ کړی او څه باندې ۱۶۰ همکارانو سره یې صادراتو او وارداتو پرمختګ موندلی دی.
تېر کال د چين وارداتي ارزښت ۱۸ اعشاريه ۳۹ ټريليون يوانه و او له ۱۶ کلونو راهيسې يې د نړۍ د دوهم لوی وارداتي هېواد په توګه ځای نيولی دی او په ورته وخت کې د نړۍ د ۸۳ هېوادونو او سيمو تر ټولو لوی سوداګريز همکار پاتې شوی، چې دغه شمېر د وړم کال په پرتله څلور زیاتوالی ښيي.
اوسمهال د چين په جي لين او شينجيانګ کې د یخ او واورو د سپورټي لوبو او سيلانۍ څپې روانې دي او د جه جيانګ ولايت په يي وو ښار کې کورني او بهرني سوداګر په ډېرېدو دي او په ورته وخت کې له چين څخه تر اروپا پورې باروړونکي اورګاډيو هم تګ راتګ ډېر کړی دی.
دا د دې ښکارندويي کوي، چې د چين لوی بازار ډېر فرصتونه لري او باور دا دی، چې په روان ۲۰۲۵م کال کې به د دغه هېواد اقتصادي چارې نړۍ نوره هم حیرانه کړي.