د چين په پلازمېنې بېجينګ کې د فبرورۍ په ۱۷مې نېټې د شخصي تصديو لويه غونډه ترسره شوه، چې ګڼو رسنيو پرې راپورونه ورکړي دي.
شنونکو باور ښودلی، چې د چين حکومت په کور دننه شخصي تصديو ته د پرمختيايي باور د لاټينګېدو په پار پيغام ورکړی او هڅولې يې دي، چې په ساينسي او تخنيکي برخو کې لا مهم رول ولوبوي او همهمهاله د بېلا بېلو هېوادونو شخصيتونو د چين پر نوي پرمختیايي تمايل خوشبيني ښودلې ده.
د چين د کمونېست ګوند د مرکزي کمېټې عمومي منشي، د دولت رئيس او د مرکزي پوځي کمېټې مشر شي جين پینګ له شپږ کلن ځنډ وروسته يو ځل بيا د شخصي تصديو په يادې غونډې کې ګډون او ويناوې کوي.
شنونکي وايي، د چين حکومت د ۲۰۱۸م کال په نومبر کې د هغو نظرونو په اړه، چې شخصي تصديو خپلې دندې ترسره کړي او له تاريخي صحنې څخه دې ووځي، خپل دريځ بيان کړی او د شخصي تصديو له پرمختګ څخه يې پر خپل ملاتړ ټينګار کړی دی.
د شخصي تصديو سږنۍ غونډې د شخصي اقتصاد د سالم او باکيفيته پرمختګ لوری روښانه کړی او د تصديو خاوندانو يې ډاډ ورکړی چې د شخصي اقتصادي پرمختګ د هڅونې په اړه د چين بنسټيزه تګلاره او پاليسي به بدله نه شي.
شنونکي باور د چين د پرمختګ کلي بولي.
د چين شخصي تصدیو په دې وروستيو کې نړۍ ته ځينې تولیدات وړاندې کړي، چې د ډېرو پاملرنه يې راجلب کړې او د بېلګې په توګه به يې دلته څو توليدانو ته اشاره ولرو. چين نړۍ ته د مصنوعي ځيرکتيا په برخه کې د ډيپسيک «DeepSeek» اپ وړاندې کړی، د نجا ۲ په نوم فلم يې جوړ او خپور کړی دی او د پسرلني اختر په ماښامنۍ هنري نندارې کې یې انسان شکله روبوټونو نڅا بیا د نړيوالو پاملرنه راجلب کړې ده.
دغه تخنيکي او کلتوري توليدات د چين د شخصي تصديو د حياتي ځواک ښکارندويي کوي.
د چين دولت رئیس شي جين پینګ په هېواد کې د شخصي اقتصاد پيمانه لويه بللې او په خبره یې، شخصي تصدۍ د چين په اقتصاد کې مهمه برخه لري.
په نړۍ کې ډېری هېوادونه د اقتصادي او سوداګريز پرمختګ د کمزورتيا په شمول له ډېرو ستونزو سره مخ دي او په تېره بيا د امريکا نوي حکومت د ځاني سوداګرۍ د ساتلو لپاره يو لړ تدبیرونه نيولي او نړيوال اقتصاد يې له ناڅرګندتياوو سره مخ کړی دی. د امريکا د دغو خپلسرو کړنو له امله د چين اقتصاد هم له ځينو نویو حالاتو سره مخ شوی او د شخصي اقتصادي پرمختګ پر وړاندې يې ورته ځینې ستونزې او ننګونې راپورته کړې دي.
چين دغه ستونزې څنګه لرې کولی شي؟
د يادې غونډې ګډونوالو د شخصي تصديو د موجودو ستونزو د هواري لپاره يو لړ اقدامات وړاندې کړي، چې د شخصي اقتصاد د دواملرونکي پرمختګ لپاره به ښه زمينه برابره کړي.
چين د نړۍ د دوهم اقتصاد په توګه د نړيوال اقتصاد د پرمختګ خدمتي انډول ۳۰ سلنه ساتلی، چې په دې کې شخصي تصديو هم مهم رول لوبولی دی. د چين شخصي تصدۍ حکومت ته څه باندې ۵۰ سلنه ماليه ورکوي، د کورني تولید عمومي ارزښت په سلو کې څه باندې شپېته برخه جوړوي، شاوخوا اويا سلنه تخنيکي لاسته راوړنې لري، په ښارونو او علاقه داریو کې څه باندې اتيا سلنه کاري فرصتونه برابروي او د تصدیو د عمومي شمېر په سلو کې ۹۰ برخه نیسي. د چين شخصي اقتصاد سالم او باکيفيته پرمختګ کړی او دا د نړيوال اقتصادي پرمختګ لپاره ډېر مهم بلل کېږي.
په چين کې شخصي تصدۍ د ساينسي او تخنيکي نوښت په برخه کې مهم رول لوبوي. د چين د صنایعو او سودګرۍ ټولنې د تېر کال په سپتمبر کې د ۲۰۲۴م کال په څېړنيزو چارو کې د زرو مخکښو شخصي تصدیو د نوښتي حالت راپور خپور کړی او د ۲۰۲۳م کال عمومي څېړنيز لګښت يې د ۲۰۲۲م کال په پرتله په سلو کې ۱۲ اعشاريه ۷۸ زيات ښودلی، چې دا د نړۍ د زرو مخکښو تصديو د ۶،۵۴ سلنې پرمختیايي انډول په پرتله لوړ دی.
شنونکي اوسني وخت د چين د شخصي تصديو او صنعتګرو د چارو د پراخوالي لپاره مناسب بولي او باور ښيي، چې د سوداګريز چاپېريال پر له پسې ښه والي سره به يې اقتصاد روښانه راتلونکی ولري. په چين کې پر شخصي اقتصاد باور نړۍ ته د پرمختګ نښې نښانې ورکړې دي.