د چين او امريکا په اقتصادي او سوداګريزو چارو کې د چین مسؤل او د چین د صدراعظم مرستيال هه لي فنګ په دې وروستيو کې د امريکا د ماليې له وزير سکوت بيسنټ سره ويډيويي خبرې اترې وکړې. دواړو خواوو د چين او امريکا د مشرانو د شويو ګډو موافقو او په اقتصادي او سوداګریزو برخو کې د چین او امریکا د مهمو مسئلو په اړه د نظریو ژوره تبادله وکړه او د دواړو هېوادونو ترمنځ د اقتصادي او سوداګریزو اړیکو پر اهمیت يې موافقه وکړه.
امریکا له يادو خبرو سره سره بيا هم د چین د پرمختګ د مخنیوي تګلارو ته دوام ورکړی او”د چين ګواښ“ تيوري يې خپره کړې ده. د امریکا د بهرنیو چارو وزارت هم په پرله پسې ډول په خپله ویبپاڼه کې چین ضد تبليغات کړي او هغه محتوا یې چې وايي “امريکا د تایوان د خپلواکۍ ملاتړ نه کوي” لرې کړې او د امریکا او چین پر سوداګریز کسر او تش په نوم د امريکايي تصدیو لپاره د چین له خوا پر اندیښنو باندې ټینګار کوي.
چين تل پر دې ټينګار کړی چې له امريکا سره د دوه اړخيزو اړيکو د ټينګښت، سالم او دوامداره ساتلو هيله لري. په تېر کال کې د چين او امريکا ترمنځ سوداګریز ارزښت ۳،۷ سلنه زيات شوی دی. تېر کال، د امريکا د سوداګرۍ کسر او د چين د بهرنۍ سوداګرۍ کچه په تاریخ کې لوړ ریکارډونه جوړ کړي. له دې څخه څرګندېږي چې د تعرفې او سوداګرۍ جګړې ستونزې نه شي حلولی او د چین د پرمختګ مخه نه شي نيولی.
په امریکا کې بېلا بېلې ټولنې په دوامداره توګه د چین په اړه خپل لیوالتیا او مثب دریځونه څرګندوي. تېر کال د چین په نړیوال وارداتي نندارتون کې د امريکايي شرکتونو د نندارځيو پراخوالی تر ټولو لوی دی او د چين په نړیوال اکمالاتي نندارتون کې د ګډوالو امریکايي شرکتونو شمېر هم تر ټولو زیات دی. په چين کې د امريکا د سوداګرۍ ټولنې وروستۍ سروې ښيي چې نږدې نيمايي امريکايي شرکتونه چين په نړۍ کې د پانګې اچونې له لومړنیو ۳ سترو ځايونو څخه يو بولي.
که امريکا د چين پرمختګ په سمه توګه وګوري، د چين په اړه د خپلې اوسنۍ تګلارې له امله رامنځته شوي زيانونه په جدي توګه په پام کې ونيسي او له چين سره د مساوې او ګډو ګټو پر بنسټ همکارۍ وکړي، د دواړو هېوادونو ترمنځ اړيکې به ثابت پرمختګ ومومي.
ټوله نړۍ ګوري چې لوی هېوادونه څه کوي. د چين او امريکا د اړيکو د عمومي ثبات ساتل نه يوازې د دواړو هېوادونو په ګټه وي، بلکې د نړیوالو حالاتو لپاره هم ډېر مهم دی. نړيواله ټولنه په عمومي توګه د مقابلې پر ځای د چين او امريکا تر منځ د همکارۍ تمه لري، د امريکا د ملګرو هېوادونو په ګډون زيات شمېر هېوادونه د چين او امريکا تر منځ د اړخونو غوره کولو ته تيار نه دي. یو لوی هېواد باید د لوی هېواد په څیر چلند وکړي او د ټولې نړۍ او ټولو انسانانو لپاره خپل مسؤلیتونه په ریښتیا سره ترسره کړي.
چين د چيني شکله عصري کولو د پرمخبيولو لپاره ژمن دی او امريکا هم د خپل اقتصاد د پرمختګ لپاره کوښښ کوي. دواړه هېوادونه د متقابلو برياليتوبونو تر لاسه کولو ته اړتیا لري او باید د متقابلو زيانونو مخنيوی وکړي ترڅو ګډې سوکالۍ رامنځته شي. چين غواړي د متقابل درناوي، سوله ييز ګډ ژوند او د همکارۍ پر بنسټ د ګډو ګټو د موندلو پر اصولو ټينګار وکړي او له امريکا سره ثابتې، سالمې او دوامدارې دوه اړخيزې اړيکې ټینګې کړي. هیله ده چې امريکا سم انتخاب وکړي، د چين او امريکا د راتلونکو اړيکو لپاره نوی خوځنده ځواک برابر کړي او نړۍ ته هم لا زيات ثبات ورکړي.