د نړۍ د انرژۍ لېږد کمېسيون مشر اداير تورنر په دې وروستيو کې رسنيو ته ويلي، چې امريکا د اقليمي بدلون تګلارې کې علمي پېژندنو ته ځای نه ورکوي او د اړوندو نړيوالو اقداماتو مخه نیسي. نوموړي ويلي، د نړۍ نور هېوادونه او سيمې اړې دي، چې د اقليمي بدلون ضد د اقداماتو د پرمخبېولو اغېزمنه لار پيدا کړي. اداير تورنر په چين کې د پاکې انرژۍ اړوندو تخنيکونو د چټک پرمختګ ستاينه کړې ده.
د نړۍ د انرژۍ لېږد کمېسيون چې مقر يې په لندن کې دی، د انرژۍ په چارو کې د کاربن د کمې ايستنې په پار د اقليمي بدلون ضد د مقابلې سازمان دی. د دغه کمېسيون مشر اداير تورنر پخوا د برېتانيې د اقليمي بدلون ضد د ملي کمېټې لومړی مشر و.
ښاغلي تورنر څرګنده کړې، امريکا له پاريس تړون څخه د بيا وتلو په شمول يو لړ تګلارې پلې کړي، د اقليمي بدلون ضد چارو کې يې خپلې کړې ژمنې ماتې کړي او په اړوندو چارو کې به يې پانګونه ونه کړي. نوموړي د امريکا دغه کړنې او رويه له علمي پوهې څخه لرې، بلکې له علمي پوهې څخه د انکار په مانا بللې دي.
امريکا په غمدي توګه يادې کړنې ترسره کوي، څو نړۍ د اقليمي بدلون له نړيوالې ننګونې سره مقابله ونه شي کړای. ښاغلي تورنر په تاسف ويلي، ”د امريکا تګلارې د علومو خلاف دي، خو دا به د نورو د ګډو هڅو مخه ونه شي نيولی. که داسې نه وي، ټول انسانان به له سترو ستونزو سره مخ شي. “
نوموړي ويلي، نور هېوادونه او سيمې بايد خپله رويه ټينګه وساتي او د خپلمنځي همکاريو د پرمخبېولو اغېزمنه لار بايد پيدا کړي. هغه پر نورو هېوادونو او سيمو غږ کړی، چې په يووالي زرغونو چارو ته وده ورکړي، اوسنيو واقعيتونو او اقليمي بدلون ته په سمه سترګه وګوري، پر علومو باور ولري او په خپلمنځي همکاريو د اړوندو ننګونو پر وړاندې ګډه مقابله وکړي.
هغه دا هم ويلي، اروپا چې اقلیمي بدلون يې پر وړاندې ستره ننګونه ده، بايد زړورتيا او ځانبساينه ولري او پر امريکا بايد بيا تکيه ونه کړي. د ده په خبره، دا چې په دې وروستيو کې د امريکا د ټرمپ حکومت د اروپا په اړه يو لړ څرګندونې کړي، اروپايي هېوادونو ته خبرداری ورکوي، چې له مختلفو هېوادونو سره د اړيکو په اړه خپلواکې پرېکړې وکړي او د اقليمي بدلون په شمول د بېلا بېلو نړيوالو ننګونو پر وړاندې مقابله وکړي.
له اقليمي بدلون سره مقابله او د کاربن کمه ايستنه د لګښت کنټرول او د پاکې انرژۍ پرمختللو ټکنالوژيو ته اړتيا لري.
د برېتانيا د سنا مجلس غړی اداير تورنر د پاکې انرژۍ د ټکنالوژۍ د پرمختګ په پار د چين هڅې د اقليمي بدلون ضد د نړيوالې مقابلې لپاره ستر خدمتونه بولي. هغه باور ښودلی، چې چين اوس د پاکې انرژۍ د ټکنالوژۍ د څېړنې او کارونې په چارو کې د نړۍ مخکښ ځای خپل کړی او دغه ټکنالوژي یې د نورو هېوادونو په ګټه بللې ده.
نوموړي ويلي، چين د پاکې انرژۍ په تخنيکي پرمختګ کې داسې وتلې لاسته راوړنې لري، چې د چيني ساينسپوهانو، فني کارکوونکو او سوداګرو مهارتونه او نوښتونه ترې ښکاري او په خبره يې، ټول هېوادونه بايد د اقليمي بدلون پر وړاندې داسې مقابله وکړي، چې ګردې نړۍ ته يې ګټه ورسېږي.
اداير تورنر اوس يو چين جوړ برقي موټر په کرايه چلوي او د چيني تصديو تخنيکي لاسته راوړنې ستايي او پوره درناوی ورته لري. هغه ويلي، که څوک غواړي په اروپا کې د برقي موټرونو يا بېټرۍ توليدي فابريکې جوړې کړي، نو له چين سره باید همکاري وکړي او اروپا بايد په همدغو چارو کې د چين غوره تصدۍ پانګونې ته تشويق کړي.