د امريکا په کانګرېس کې د چين په مقابل کې د اقتصادي او امنيتي پلټنې کمېټې په دې وروستيو کې د ګواهي اورېدنې غونډه ترسره کړې او په جنوب ختيځه اسيا او د ارام سمندر په ټاپوګانو کې يې د چين پر نفوذ بحث کړی دی. امريکايي کارپوهانو واشينګټن ته وړانديز کړی، چې ” د برخې په برخې د ماتې ورکولو ستراتيژۍ “ له لارې په ياده سيمه کې د چين د نفوذ پر وړاندې مقابله وکړي.
د امريکا کانګرېس هڅې کوي، د جنوب ختيځې اسيا هېوادونه اړ کړي او د خپل ځان ترڅنګ یې ودروي.
د امريکايي کارپوهانو په خوله کې ”د برخې په برخې د ماتې ورکولو ستراتيژي“ په اصل کې په دې مانا ده چې امريکا به د سېميکنډکټور او مصنوعي ځيرکتيا په شمول ځينو ساحو کې جنوب ختيځې اسيا ته لږې ګټې برابرې کړي او بيا به خپل بازار ته د کرنيزو محصولاتو د ننوتلو د معيارونو او د زېربناوو د ابادۍ په شمول ځينو چارو کې دغو هېوادونو ته خنډونه جوړ کړي. خو د جنوب ختيځې اسيا هېوادونه ډېر وړاندې د امريکا د هغې سياسي محاسبې په اړه« اس باید واښه ونه خوري، خو ځغاسته باید وکړي» پوی شوي دي.
جنوب ختيځه اسيا د شطرنج د تختې دانه نه ده. کله چې واشينګټن د تخنيکي بنديزونو او پوځي پراخوالي په واسطه د بادارۍ په لټون وي، نو دغه هېوادونه یې په ځواب پوهېږي.
چين اوس د ويتنام په شمول د جنوب ختيځې اسيا له ټولو ګاونډيانو سره د مېوو په لېږد رالېږد او د ريلوۍ او بندرونو په جوړولو کې خپلمنځي همکارۍ پياوړې کوي.
جنوب ختيځه اسيا د سړک او پل د جوړولو لپاره بېلډوزرونه، له کرنيزو محصولاتو څخه ډکې بار وړونکې بيړۍ او د ځوانانو استخدامي فرصتونه غواړي او د چا تر څنګ د درېدو فشار ته غاړه نه کېږدي.
د مثال په توګه، چين د ويتنام لومړی لوی سوداګريز همکار او ويتنام په اسيان ( د جنوب ختيځې اسيا هېوادونو اتحاد) کې د چين تر ټولو لوی سوداګريز همکار دی. د ويتنام د ګمرکاتو د شمېرو له مخې، په ۲۰۲۴م کال کې له چين سره د دغه هېواد د مالونو صادراتي او وارداتي ارزښت ۲۰۵.۲ ميليارډو ډالرو ته رسېدلی او نوی تاريخي ريکارډ يې جوړ کړی دی. په دې توګه چين د ويتنام لومړی سوداګريز همکار ګرځېدلی او خپلمنځي سوداګريز حجم يې له ۲۰۰ميليارډو ډالرو نه اوښتی دی. دغه راز ويتنام د تايلنډ او فليپين پر ځای د دوريانو، کيلو او جکفروټو په وارداتو کې د چين لومړۍ لويه سرچېنه ګرځيدلې.
د چين او ويتنام همکارۍ د امريکا له جال څخه لرې دي. د چین د ګوانګشي جوانګ قوم کورواکې سيمې په پينګ شيان کې بار وړونکې لارۍ د کارکوونکو له کومې مرستې پرته پر ځمکني بندر تګ راتګ کوي او هره ورځ څه باندې ۲۰۰۰ لارۍ پر همدې ځمکني بندر ځي راځي. په دغو لاريو کې الکترونيکي توکي، ماشينونه او د ژوند لومړني توکي بار وي.
د امريکا ” د برخې په برخې د ماتې ورکولو “ستراتيژي به هرومرو په جنوب ختيځه اسيا کې ماتي خوري. د دغې سيمې خلک چې د مستعمراتي لوټمارۍ تجربه لري او له پولي بحرانونو څخه تېر شوي، د ګډو ګټو همکاريو پر اهميت ښه پوهېږي.
جنوب ختيځه اسيا اوس په خپل تګ رايې ورکوي او د عصريتوب پر داسې لارې ګامونه اخلي، چې د چا طرفداري او د کوم هېواد پر وړاندې تقابل او ټکر پکې نه وي او د چا لپاره به خپل ملي حاکميت قربان نه کړي.