چين د عصري کېدو بهیر په پرمخبېولو کې يوه ډېره مهمه ستراتېژي عملي کوي، چې د سيمه ييز همغږي پرمختګ ستراتېژي نومېږي. دغه ستراتېژي د اقتصاد په اړه د شي جين پينګ د افکارو يوه مفصله عملي بېلګه ده. مونږ نن د دې ستراتېژۍ په اړه توضيحات ورکوو، چې دا څه ډول ستراتېژي ده او ولې او څنګه عملي کېږي؟
چين د رنګين «جنجالک» په شان دی، ختیځ يې د سمندر پر غاړه دی، ښارونو یې ډېر عصري پرمختګ موندلی، مرکزي او لوېديځې سیمې يې غني ايکولوژيکي او کلتوري شتمنۍ لري، شمال ختیځ يې د پولادو او اوسپنو د صنعت ستره پراختيا ليدلې او جنوب يې، چې پخوا هلته يوازې کب نيوونکي کلي وو، اوس پر ځانګړو اقتصادي زونونو بدل شوی دی او دا د دغه هېواد د اصلاحاتو او ورخلاصون تګلارو د پلي کېدو ډېره ښه نمونه بلل کېږي.
د سيمه ييز همغږي پرمختګ ستراتېژي د دې لپاره جوړه شوې، چې د «جنجالک» هره برخه رنګينه شي او په ګډه ډېر ښکلی او عالي انځور جوړ کړي، څو ګډه سمسورتيا ومومي.
د سيمه يیز همغږي پرمختګ ستراتېژي کومې ستونزې هواروي؟
چين د څلورو لسيزو د چټک پرمختګ ترڅنګ له ځينو سختو ستونزو سره هم مخ شوی دی. کله به چې د چين د ختيځ اوسېدونکو عصري او پرمختللي برېښنايي تاسیسات کارول، نو د لوېديځو کليوالو سيمو خلکو به یې يوازې شمعې کارولې.
که د چين د درېيو ځايونو (بېجينګ، تيانجين او هه بې) اوسېدونکي وغواړي، په همدې لویې سیمې کې له يوه ځايه بل ځای ته ولاړ شي، نو په ګړندي اورګاډي کې به يوازې نيم ساعت مزل ته اړتيا ولري. دغه درې ځايونه په جغرافيايي لحاظ يو بل ته نږدې دي، خو د پرمختګ په برخه کې یو بل سره لوی واټن لري.
دغسې غير متوازن پرمختګ د يو داسې سړي په شان دی، چې دوه پښې يې ډېر فرق لري او ګړندي ګامونه نه شي اخیستلی او ښايي د بدن نورې برخې يې هم ناروغې شي.
کنفوسيوس فلسفه د اندېښنې وړ ستونزه کمه شتمني نه، بلکې غير متوازن پرمختګ بولي او نسبتاً توازن تعقیبوي. د سيمه ييز همغږي پرمختګ ستراتېژي د سيمو ترمنځ د پرمختګ واټن او فاصلې کموي او د لوی غير متوازن پرمختګ مخه نيسي، څو د بېلا بېلو سيمو خلک د پرمختګ د ګټو له نعمته عادلانه برخمن شي.
د سيمه يیز همغږي پرمختګ ستراتېژي څنګه عملي کېږي؟
چينايان له تېرو ۵۰۰۰ کالونو راهیسې سیسټماتيکه نظريه لري او د هرې زمانې مشرتابه يې د حکومتوالۍ جامع پلانونو ته ډېره پاملرنه کوي. نن د دغه هېواد حکومت هڅې کوي، چې د هېواد په کچه لوی بازار او د ګړنديو رېل پټليو بشپړه شبکه جوړه کړي او همدغه چاره د حکومتوالۍ په برخه کې د چينايانو د سيسټماتیکې نظريې د عملي کېدو ښه ښکارندويي کوي.
چینايان همغږي ډېره مهمه بولي، کورنۍ يې ورورګلوۍ او خپلوانو ته په ډېره درنه سترګه ګوري او د هېواد مشرتابه يې د هېواد په مديريت کې د بېلا بېلو سيمو ترمنځ همغږۍ او همکارۍ ته ډېره پاملرنه وي او بېلا بېلې سيمې هڅوي، چې سرچېنې په همغږۍ وويشي، د چاپېريال د ککړتيا ستونزې د هوارې لپاره ګډې هڅې وکړي او د پرمختګ ګټې شريکې کړي.
چينايان په هغې فلسفې هم باور لري، چې له مخې يې بېلا بېل ځايونه له خپلو ځانګړتياوو او وضعيت سره سم مناسبې پرمختيايي لارې وهي، نو ځکه د دغه هېواد د يانګځه سيند جنوبي سيمه ډيجيټل اقتصاد ته وده ورکوي، د هېواد په لوېديځ د (ژېړې خاورې) لوړې اوسېدونکي غلې دانې کري او د شمال ختيځ خلک يې بيا د نوي کيفيت د توليدي ځواک پرمټ پخواني صنعتي مرکزونه اصلاح کوي، څو ښه عصري صنعتي سیسټم ولري. د چينايانو د هڅو په نتيجه کې د دغه هېواد بېلا بېلو سيمو له خپلو برتريو ګټې پورته کړي او خپلو ځانګړو سکټورونو ته يې وده ورکړې، څو باکيفيته پرمختګ ومومي.
د سيمه يیز همغږي پرمختګ بېلګې
بېجينګ ښار، تيانجين ښار او هه بې ولایت کې د سيمه ييز همغږي پرمختګ ستراتېژي پلې شوې او ښه نتيجه يې ورکړې ده. دغه درې ځايونه ټولټال ۲۱۶ زره کيلومتره مربع پراخوالی لري، چې پخوا د سرچېنو د ډېر تمرکز له کبله د غیر متوازن پرمختګ ستونزې سره مخ وو او وروسته يې د همغږي پرمختګ د ستراتېژۍ په رڼا کې همغږی پرمختګ موندلی دی.
په بېجينګ ښار کې د کوچنيو توليداتو د عمده فروشۍ بازار سوداګر هه بې ولایت ته کډه شوي او انلاين سوداګري يې هلته پيل او ښې ګټې يې ترلاسه کړې دي. په بېجينګ کې د جونګ ګوان څون ټېکالوژيکي زون تصديو خپل علمي او ټېکنالوژيکي پلانونه په تيانجين ښار کې ازمويلي او بيا وروسته يې نوې جوړې شوې ټېکنالوژۍ د هه بې ولایت په توليدي صنعت کې کارولي او باکيفيته او ارزښتناک توليدات يې جوړ کړي دي.
لويې ترافيکي شبکې د دغو دريو ځايونو ترمنځ تګ راتګ ډېر اسانه کړی دی. د بېلګې په توګه، د تيانجين يو سړی کولی شي، چې سباناری په خپل کور کې وخوري او بيا د کار او په غونډې کې د ګډون په پار بېجينګ ته ولاړ شي او هلته د کار له پای ته رسېدو وروسته په مازديګر کې د هه بې ولایت د جانګ جيا کو ښار د سکي وهلو ميدان ته ولاړ شي او هلته له ورزش خوند واخلي. په دغو دريو ځايونو کې ډېر خلک په ګړنديو اورګاډو کې تګ راتګ کوي او همداسې اسانه ژوند او کار کوي.
دغه درې ځايونه په ګډو هڅو د ايکولوژيکي چاپېريال په ښه والي کې هم ډېرې لاسته راوړنې لري. هغوی د هوا د کيفيت د څار ګډ نظارتي سيسټم جوړ کړی او د کاربن د ايستنې اندازې د کموالي يو معيار يې تعقیب کړی، چې پدې سره يې د هوا کيفيت ډېر ښه شوی دی.
د سمه ييز همغږي پرمختګ ستراتېژي پدې مانا نه ده، چې هر شی باید په اوسط ډول وويشل شي، بلکې پدې مانا ده، چې نوی فرصتونه باید رامنځته شي. د بېلګې په توګه په شانګهای ښار کې پیاوړو تصديو د هېواد په شمال لوېديځ شينجيانګ سيمه کې خپلې نوې فابريکې جوړې کړي او له دې لارې يې د توليد لګښت کم کړی او د شينجيانګ اوسېدونکو ته يې کاري فرصتونه برابر کړي دي. د ګوانګ دونګ – هانکانګ – مکاو لوی خليج علمي څېړنيز ځواکونه مدغم شوي او پدې سره د ډي جۍ ايي(DJI) ډرونونو برانډ په ګډون يو شمېر مخکښ برانډونه رامنځته شوي دي.
د چين د ختيځې برخې تجربې، د مرکزي برخې توليدي ظرفيت او د لوېديځې برخې سرچېنې په همغږۍ او ادعام کارول شوي، چې پر مټ يې د دغه هېواد اقتصاد د خطرونو د مخنيوي قوت خپل کړی او ډېر پياوړی شوی دی.
چينايان له هغو تجربو چې له زرګونو کلونو راهیسې يې راټولې کړي، کار اخلي او په نوې زمانه کې د هېواد د عصري کېدو ستونزې هواروي. د چين د سيمه ييز همغږي پرمختګ ستراتېژي د يوې طلايي کيلۍ رول لوبوي او د چينايانو د ګډې سمسورتيا په لور د عصريتوب دروازه خلاصوي.