چين د مې په ۷مې نېټې د اقتصادي پرمختګ يو لړ شمېرې خپرې کړي، چې له مخې يې د دغه هېواد بېلا بېلو سکټورونو د پېچلي او سخت نړيوال وضعيت پر وړاندې پياوړی بالقوه ځواک ښودلی دی.
چين دغه برياليتوبونه په داسې حال کې تر لاسه کړي، چې د امريکا د تعرفو سياست يې پر تصديو ډېر فشارونه اچولي دي.
د چین د وارداتو او صادراتو په ۱۳۷م نندارتون کې د چيني توليداتو د سپارښتنو د فرمونو زياتوالی پر چيني بازار د بهرنيو سوداګرو د باور ښکارندويي کوي.
د چین د وارداتو او صادراتو ۱۳۷م نندارتون د مې په ۵مه نېټه پای ته ورسېد. په دغه نندارتون کې د صادراتو د کېدونکو معاملو ارزښت ۲۵ ميليارډو او ۴۴۰ ميليونو امريکايي ډالرو ته رسېدلی، چې د تېر کال د ورته شمېر په پرتله ۳٪ زياتوالی ښيي.
د معلوماتو له مخې، د امريکا د سیاسي تعرفو له امله په دغه نندارتون کې د برخوالو امريکايي سوداګرو شمېر کم و، خو بیا هم ځينو امريکايي سوداګرو پکې ګډون کړی و او د خپلو چارو په اړه یې له رسنيو سره ازادې خبرې کړې دي.
امريکايي سوداګر انډي رسنيو ته ويلي، چې شرکت يې په چين کې همکاران لري او همکارۍ یې اوسنۍ نه، بلکې له کلونو راهیسې دوام لري او دغه اړيکې په ورځ، میاشت او کال کې نه شي پرې کېدای.
د حقيقتونو پر وړاندې د امريکا د پېرودونکو سوداګرو د عاجزۍ او بېچارۍ احساس په پرتله، د نورو هېوادونو او سيمو د پېرودونکو سوداګرو شوق او ذوق زيات او په دغه نندارتون کې يې ډېر توکي اخيستي دي.
په دغه نندارتون کې د ۲۱۹ هېوادونو او سیمو له ۲۸۰ زرو زياتو بهرنيو پېرودونکو سوداګرو ګډون کړی و، چې دا د تېر کال د ورته نندارتون په پرتله ۱۷ اعشاریه ۳ سلنه زیاتوالی ښيي او په دې جملې کې د کمربند او لارې د ابادوونکو هېوادونو د برخوالو پېرودونکو سوداګرو شمېر ۱۸۷ زرو او ۵ سوو تنو ته رسېدلی، چې دا بیا د تېر کال د نندارتون د ورته شمېر په پرتله ۱۷ اعشاريه ۴ سلنه زياتوالی ښيي.
د برازيل پېرودونکې سوداګرې ماريا والګر رسنيو ته ويلي:
” ډېره خوشحاله يم چې دغه نندارتون ته راغلې يم، دلته ډېر معلومات ترلاسه کولی شم، نوي فکرونه پيدا کولی او نوې اړيکې نيولی شم او ټولې نړۍ ته د چين وړاندې شوي نوي توليدات کتلی شم. “
د چين (مينګ يي هو) ګروپ د موبايل د سکرين ساتونکې پردې توليدوي چې سلګونه ډولونه لري او کيفيت يې هم ډېر ښه او بيې يې ټيټې دي. د دې تصدۍ مشره (لي هونګ مې) د کوچنيو ساتونکو پردو توليدي چاره لوی صنعت بولي او وايي، چې تصدۍ يې هر کال ۶۰۰ ميليونه د موبايل د سکرين ساتونکې پردې جوړوي.
نوموړې ويلي، چې هر کال د هغې د تصدۍ شاوخوا ۵۰ ميليونه د موبايل د سکرين ساتونکې پردې په امريکا کې پلورل کيږي او د خرڅلاو تر ټولو لوړ شمېر يې سل ميليونو پاڼو ته رسېدلی دی.
لي هونګ مې اندېښنه ښودلې، چې د امريکا د لوړو تعرفو تګلاره ښايي د هغې پر کارو بار منفي اغېزې وکړي.
نوموړې رسنيو ته ويلي، چې له تېرې يوې مودې راهیسې اندېښمنه وه، خو د دغه نندارتون ګڼې ګوڼې ورته بیا باور ورکړی دی.
په دغه ۵ ورځني نندارتون کې د لي هونګ مې د تصدۍ د لاسليک شويو تړونونو ارزښت له ۱۰ ميليونو يوانو څخه پورته و او د منځنۍ اسيا د ۵ هېوادونو د نويو همکارانو تړونونه يې د چمتوالي په حال کې دي.
چيني توليدات د ښې بيې په ټاکلو کې پاتې نه، بلکې د ځيرک کېدو په لوري پرمختګ کوي.
د چین د وارداتو او صادراتو په ۱۳۷م نندارتون کې د نويو ځيرکو سامانونو، پرمختللو توليدوونکو ماشينونو او د نوې انرژۍ د توليداتو ځانګړی پلاټفورم تاسيس شوی و او ډېر زيات نړيوال سوداګر يې راجلب کړي وو.
په دې نندارتون کې د خدماتي روبوټونو ځانګړی نندارځی هم جوړ شوی و، چې زياتو سوداګرو به په دغه نندارځي کې له روبوټونو څخه معلومات ترلاسه کول.
د چين د سوجو ښار د الفا د روبوټونو توليدي شرکت اجرائيوي مشر (سونګ يو ګانګ) رسنيو ته ويلي، چې امريکا پر چيني توليداتو تعرفې لوړې کړي، خو په دغه نندارتون کې ۴ امريکايي شرکتونو د دوی له شرکت سره تړونونه لاسليک کړي دي.
پر روبوټونو سربېره، چين په بېلا بېلو سکټورونو کې نوښتونه موندلي او د ځيرک کېدو پرلارې يې ګامونه پورته کړي دي.
د برېتانيا سوداګر تاوشير رسنيو ته ويلي، چې هغه غواړي له يو اکمالاتي شرکت سره همکارۍ وکړي او په خبره یې، هغه په دغه نندارتون کې ښه کيفيت لرونکي توليدات چې بيې يې مناسبې وې، پيدا کړي دي.
د ارجنټاين سوداګر جازي رسنيو ته ويلي، چين د ګردې نړۍ لپاره ډېر مهم دی او په دغه هېواد ډېر ښه توکي توليديږي او د خلکو ژوند له چيني توليدات څخه نه شي جلا کېدای.