د چين دولت رئيس شي جين پينګ د مې د ۷مې نېټې په شپه د روسيې د ولسمشر ولاديمير پوتين په بلنه مسکو ته ولاړ او له دغه هېواد څخه يې درې ورځنۍ رسمي ليدنه وکړه او د پخواني شوراوي اتحاد لخوا د خپل وطن د دفاع جګړې د بري د ۸۰مې کليزې د ياد په مراسمو کې يې ګډون وکړ.
د فاشيزم ضد د نړيوالې جګړې د برياليتوب په ياد فعاليت کې د چين د دولت رئيس ګډون ټولې نړۍ ته قوي نښه ورکړې، چې اتيا کاله دمخه د چين او پخواني شوراوي اتحاد په شمول د نړۍ عدالت غوښتونکو ځواکونو اوږه په اوږه جګړې وکړې او فاشيستي قدرتونو ته يې ماتې ورکړه؛ نن ورځ یواړخيزم، بادارۍ او تسلط نړۍ متزلزله کړې او انسانان يو ځل بيا د يووالي يا پاشل کېدو، د ډيالوګ يا تقابل او د ګډو ګټو همکارۍ يا زيرو سم لوبې په څلور لارې کې ولاړ دي.
چين به د نړۍ د هغو هېوادونو تر څنګ ولاړ وي چې پر مساوات او عدالت ټينګار لري، خپل حاکميت، امنيت، پرمختيايي ګټې به ټينګې وساتي، تاريخ به په یاد ولري، د پرمختګ همکار او د نړيوال عدالت ساتونکی به واوسي او د انسانانو د لا روښانه راتلونکي لپاره به ګډ خدمتونه وکړي.
فاشيزم۸۰ کاله دمخه له منځه تللی، چې دا د وحشت پر ضد د تمدن او د شيطانۍ پر ضد د عدالت لوی برياليتوب بلل کېږي.
د فاشيزم په وچېدو سره د نړۍ اوسنۍ سياسي نقشه جوړه شوه، د ملګرو ملتونو سيسټم رامنځته شو او د ۷۰ کلن مزل په درشل کې د سوله ييز نړيوال نظم بنسټ ټينګ شو.
موږ باید نه يوازې د پخوا، بلکې د راتلونکي لپاره هم تاريخ په ياد ولرو. د فاشيزم ضد جګړې موږ ته نه يوازې د بري ياد راکړی، بلکې دا د نړيوالو همکاریو، عدالت ساتنې او د مختلفو تمدونونو د درناوي په اړه له وخته تېرېدونکی رواني ميراث هم بلل کېږي. داسې ارزښتي نظريې په اوسنۍ لړزاندې زمانه کې ورځ تر بلې خپل قوي خوځنده ځواک څرګندوي.
اوسنۍ نړۍ لا هم د اقليمي بدلون او ترهګرۍ په شمول له زياتو غير دوديزو امنيتي ګواښونو سره مخ ده، چې هر هېواد پکې ښکيل دی. د نړۍ بېلا بېلو هېوادونو په ۱۹۴۵م کال کې په يو موټي او اتحاد فاشيزم ته ماتې ورکړه او اوسنۍ نړۍ هم بايد په همدې روحيې او د ګډ برخليک ټولنې په ابادۍ د يادو ننګونو پر وړاندې ګډه مقابله وکړي.
پر تاريخ سترګې پټول او يا سم نه ورته کتل د سولې بنسټ خرابوي، چې دا ډېره د اندېښنې وړه خبره ده. د جاپان ځينې سياستوال کله نا کله ياسوکوني معبد ته ځي او هلته جنګي مجرمينو ته درناوی څرګندوي، ځينې ښي لاسي ځواکونه د فاشيزم تېري کوونکي تاريخ ته رنګ او ښکلا ورکوي او ځينې هېوادونه تر دوهمې نړيوالې جګړې وروسته د نړيوال نظم له سرحداتو او د نړيوالې ټولنې له بنسټيزو اخلاقي اصولو څخه تېرېږي او يواړخيزم او تسلط غوښتونکې کړنې یې د ملګرو ملتونو په مرکزيتوب څواړخيزم ته پر له پسې زيانونه رسوي.
د روسيې او اوکراين جنګ او د فلسطين او اسرائيل شخړې نړۍ ته د خطر زنګ وهلی چې سوله د تاريخ ډالۍ نه ده، بلکې دا د هر نسل لخوا په مينه د جدي ساتنې ميراث دی.
موږ د انسانانو د ګډ برخليک ټولنې د ابادۍ لپاره اړتيا لرو، چې د فاشيزم ضد روحيه پر نظام بدله کړو، نړيوال اداري سيسټم پر له پسې بشپړ کړو، د لا پراخ استازيتوب لپاره د ملګرو ملتونو ميکانيزومونه اصلاح او د سوداګرۍ نړيوال سازمان صلاحيت زيات کړو او لا مساوي او معقول نړيوال پولي سیسټم جوړ کړو.
چين نړۍ ته د کمربند او لارې نوښت وړاندې کړی او د زېربناوو په جوړولو سره د متقابل پيوستون او ګډ پرمختګ هڅونه کوي او دا په اوسنۍ زمانه کې د ”پرمختګ د سولې بنسټ دی“ تاريخي تجربو واقعي تمرينات دي. موږ بايد په ډيجيټلي زمانه کې د مصنوعي ځيرکتيا او لويې ډېتا په شمول نويو ساحو کې نړيوال اداري اصول ټينګ کړو او د تخنيکي بادارۍ لخوا د ظلم د نوې وسيلې د ګرځېدو مخه باید ونيسو.
انسانان بايد د نوې تاريخي څلورلارې پر وړاندې د مختلفو کلتورونو ترمنځ د ډيالوګ نړيوال فکرونه ولري. د بېلا بېلو کلتورونو په منځ کې ګډ رواني ارزښتونه د انسانانو د ګډ برخليک ټولنې د ابادۍ روحي بنسټ بلل کېږي. د فاشيزم ضد د نړيوالې جګړې د بري ياد رښتينی ارزښت يوازې يو یادګار نه دی، بلکې دا په حقیقت کې انسانانو ته د تاريخ د ځيرکو تجربو راټولول او روښانه لاره ښيي.