د امریکايي حکومت له خوا د اوسنیو سوداګریزو تګلارو له امله د تعرفو په اړه د اروپايي ټولنې او امریکا ترمنځ د خبرو اترو پرمختګ ورو شوی دی. که څه هم د اروپايي ټولنې او امریکا ترمنځ د تعرفو خبرې اترې اوس د بیا پیل مرحلې ته ننوځي، خو د دواړو خواوو ترمنځ توپيرونه لاهم شته دي. اروپايي ټولنه له امریکا څخه د طبیعي ګازو، وسلو او کرنیزو محصولاتو په اخیستلو کې جوړجاړي ته چمتو ده، خو د اضافي ارزښت د مالیاتو د له منځه وړلو، د ډیجیټلي مقرراتو او مالیاتو د کمولو او د خوړو معیارونو د ټيټولو په اړه د امریکا غوښتنې به ونه مني.
اوس امریکا د اروپايي ټولنې د فولادو او المونیم په محصولاتو او موټرو باندې د نورو ۲۵ سلنې تعرفې لګولو ته دوام ورکوي، په نږدې ټولو نورو محصولاتو باندې ۱۰ سلنه تعرفه ساتي او ګواښ کوي چې د درملو او کلیدي کانونو په شمول محصولاتو باندې به نورې تعرفې هم وضع کړي. اروپايي ټولنې د مې په پیل کې د امریکا د تعرفو په مقابل کې د نږدې ۱۰۰ میلیاردو یورو په ارزښت د توکو د لیست په اړه عامه مشوره پیل کړه. سربېره پر دې، اروپايي ټولنه به د امریکا د تش په نوم بالمثل تعرفو او د موټرو او د هغو اړوند برخو باندې د تعرفو تګلارو لپاره سوداګرۍ نړیوال سازمان ته دعوی وکړي. اروپايي ټولنې وویل چې که خبرې اترې د دواړو خواوو لپاره ګټورې پایلې ته ونه رسېږي، اروپايي ټولنه به ځوابي اقدامات پلي کړي.
بې له شکه د امریکا ناڅرګنده سوداګریزې تګلارې د موټرو او درملو په شمول د اروپا پر اصلي صنعتي چارو ژوره اغېزه کوي. د اروپايي ټولنې د احصائيې ادارې د شمېرنې له مخې، په ۲۰۲۴ کال کې امریکا ته د اروپايي ټولنې په صادراتي توکو کې درمل، موټر او میخانیکي محصولات نږدې نیمایي برخه نیسي. په دې لنډه موده کې، د تعرفو اغېزو او د سوداګریزې جګړې د ناڅرګندتیا له امله، د موټر او د ماشینونو جوړولو ډېری اروپايي شرکتونه د پلور او پانګې اچونې له زیانونو سره مخ دي. د موټر د ډېرو شرکتونو د پراختیا یا پانګونې پروژې او د پلور ځینې ارډر ځنډول شوي.
له بلې خوا، د امریکا ولسمشر ډونالډ ټرمپ د مې په ۱۲مه نېټه یو اجرایوي فرمان لاسلیک کړ چې په دغه هېواد کې د درملو بیې ډېرې کمې کړي او موخه یې د درملو بیې له ۵۹ سلنې څخه ۹۰ سلنې ته راټیټول دي.
د اسټرا زینیکا（AstraZeneca）او پفیزر（Pfizer）په شمول د درملو جوړولو نږدې ۳۰ لویو نړیوالو شرکتونو په تېر اپرېل کې په ګډه د اروپایي کمیسیون رئیسې وان دیر لین ته یو لیک واستاوه او پر اروپايي ټولنې یې غږ وکړ چې د اروپا د درملو چارو وده ورکولو لپاره تدبیرونه ونیسي، څو د امریکا له خوا پر درملو احتمالي تعرفو ته ځواب ووایي.
د اروپايي کمیسیون د اقتصادي چارو غړي ورډیس دونګبرووسکیس وویل چې د امریکا د تعرفو تګلارو نړیوال اقتصادي ناڅرګندتیا ته وده ورکړې او اروپایي ټولنه باید ژر تر ژره د سیالۍ توان د لوړولو لپاره خپل اقدام وکړي.