د سولې په تودو بحثونو او هڅو کې ډاکټر عبدالله عبدالله پاکستان ته سفر کړی دی. سفر د پاکستان د لومړي وزیر عمران خان په رسمي بلنه شوی او درې ورځې به دوام کوي. د ملي مصالحې عالي شورا مطبوعاتي دفتر پرون سهار په یوه اعلامیه کې وویل چې د ډاکټر عبدالله د سفر موخه د سولې په اړه له پاکستاني چارواکو سره خبرې کول دي. عبدالله اسلام اباد ته له رسېدو سره سم د پاکستان بهرنیو چارو وزارت ته لاړ او له پاکستاني چارواکو یې وغوښتل چې طالبان اوربند او د تاوتریخوالي کموالي ته وهڅوي.
سره له دې چې پاکستان په افغانستان کې د روانې څلوېښت کلنې جګړې ستر ملاتړی بلل کېږي، خو په دې وروستیو کې داسې ښيي چې ګواکې په افغانستان کې د سولې غوښتونکي دي. دوی ویلي چې د امریکا او طالبانو ترمنځ یې د خبرو زمینه برابره کړه او ورسره جوخت یې د بین الافغاني خبرو لپاره هم هڅې پيل کړې دي. د بین الافغاني مذاکراتو د پیل په مراسمو کې د روانو مذاکراتو ټول امتیاز پاکستان ځان ته ځانګړی کړی او د دغه هېواد د بهرنیو چارو وزیر شاه محمود قریشي وویل چې دوی په افغانستان کې د جګړې د پای ته رسولو په لټه کې دي.
له دې بحثونو سره د پاکستان لومړي وزیر عمران خان د افغانستان د ملي مصالحې عالي شورا مشر ډاکټر عبدالله عبدالله ته بلنه ورکړه چې اسلام اباد ته رسمي سفر وکړي او د سولې په اړوندو مسایلو به بحثونه کېږي. څو ورځې وړاندې ولسمشر غني بیا عمران خان ته بلنه ورکړه چې کابل ته راشي. ډاکټر عبدالله عبدالله پرون اسلام اباد ته لاړ او دا سفر به دوې ورځې نور هم دوام کوي. هغه په لومړي سر کې د پاکستان د بهرنیو چارو وزیر محمود قریشي سره وکتل او ټاکل شوې چې د پاکستان له لومړي وزیر عمران خان، له ولسمشر عارف علوي او د پوځ له مشر قمر جاوید باجوه سره هم وګوري. په دې لیدنو کې به تر ټولو ډېر تمرکز پر افغان سوله وي او له قریشي سره په لیدنه کې ډاکټر عبدالله عبدالله ټینګار وکړ چې پاکستان باید طالبان د تاوتریخوالي کمولو ته وهڅوي.
د ملي مصالحې عالي شورا له لوري په خپره شوې اعلامیه کې راغلي، ډاکټر عبدالله عبدالله له پاکستان وغوښتل چې طالبان د تاوتریخوالي کمولو ته وهڅوي؛ ځکه که داسې ونه شي، نو د سولې پروسه به له خنډونو سره مخ شي. عبدالله ټینګار کړی چې د سولې له خبرو سره هممهاله د تاوتریخوالي دوام معقول چلند نه دی.
له دې سره جوخت د پاکستان د بهرنیو چارو وزیر محمود قریشي په دې لیدنه کې ډاکټر عبدالله عبدالله ته ډاډ ورکړی چې د سولې په برخه کې به خپلې همکارۍ ډېروي. د قریشي په وینا، پاکستان د افغانستان ملي حاکمیت او ارضي تمامیت ته بشپړ درناوی لري او په دغه هېواد کې د مداخلې سیاست نه لري. نوموړي ویلي چې له افغانستان سره د ښو اړیکو د لرلو په لټه کې دي او هڅه کوي چې په دغه هېواد کې د روانې جګړې په پای ته رسولو کې پوره همکاري وکړي.
پاکستان داسې مهال له افغان حکومت سره د اړیکو جوړولو په لټه کې دی، چې ویل کېږي طالبان د دغه هېواد له نفوذه وتلي دي. تازه ځینو نړیوالو رسنیو په خپلو تحلیلونو کې ویلي، پاکستان وېره لري هسې نه چې طالبان د دوی پر ضد ودرېږي او له کنټروله یې ووځي. ځينو رسنیو بیا داسې تحلیل کړی و چې پاکستان اوس پر طالبانو هېڅ واک نه لري او دغه ډلې په مستقیمه توګه له امریکا سره اړیکې جوړې کړې دي. بلخوا په دوحه کې د بین الافغاني مذاکراتو بهیر لا هم ګونګ دی او پرمختګ پکې نه تر سترګو کېږي. دواړه لوري هڅه کوي پراختلافي مواردو هوکړې ته ورسېږي، خو تر دې دمه داسې څرک نشته چې دغه اختلافونه به څه وخت حل کېږي.